وطن عسگرلرین ناغیلی/ آیهان میانالی (شعر)

وطن عسگرلرین ناغیلی/ آیهان میانالی

موتلو بیر اینسان اؤلدۆ سئوینجدن بو آخشام
سون نفسین چکن زامان، آنیمسادی اؤترگی اینسان‌لاری
باراژ-باراژ گؤز یاش‌لارېنې خاطیرلاتدی سون دوراقدا!
سنی کیمدن سوروشوم دیلینده….
گؤزله‌مکدن یولوم یابان اولوب باخیشیندا
ماهنی‌لار اوخشاییردی قولاغیندان مزارلیغاجان
اینسان‌لار إشیکدن اونو موتلو گؤره‌رک ایچینده ساعات‌لارجا یالوارمیشدی بیتمک اۆچۆن تانری‌یا
اؤدۆل‌لر قازانان کیملیک‌سیز عسگریم….
دیلینده قونشونون مارشی!
اۆره‌گینده یاساق وطن سئوداسی…
یالانجی دوعالار قارشېلاشېردې اونون‌لا سون دوراقدا!
بیر گۆن گله‌جک بیزیم اولاجاق سئوداسی اۆره‌گینده اؤلن عسگریم!
هارای چکیب من تۆرکم دئین دلی‌قانلی قارتالیم
یوواسیز قالان چاغین آغلاییردی گیزلی‌جه
کیمسه گؤرمه‌سین……
قافاسېنې قوجاقلاییردی ایشیق‌سیز آخشامدا…
آناسېنې قویلاییردی اؤزگه تورپاغیندا…!
آتاسېنې تانیمیردی پئیغمبرسیز کیتاب‌لاردا…!
او اؤلۆردۆ ایچیند‌ه‌کی جننت‌لری…!
بیتیردی بیزلیگی……
گؤگ بویاغین سئویردی اوجالاردا
اونا ماهنی‌لار دانیشیردی یول‌داش‌لارینا……
ایچینده‌کی قیرمیزی سئوداسینی دلی کیمی اوخشاییردی اۆزگۆن چاغیندا
یاشیل‌لیغا وورغون اولموشدو وطن اورمان‌لاریندا
آیی سئیر إدیردی یوخوسوز زامان‌لاریندا
اولدوزلا باغلی دویغولار پایلاشیردی
جیسمی دیری کن
روحو اؤلن عسگریم
اومودسوز سون دوراغا چاتمیشدی
بیر کؤزرمیش سیقارین کۆلۆنده
قیسسالیردی، یانیردی
و بیتمک اۆچۆن یئریک‌لَيیردی
آرتیق میللت یوخلامیشدیر!
إلین کیلوسو نئچه…؟
شن‌لیک باخچامیزدان کؤچۆب گئتمیشدی
ألینده قلم اولان شاعیرلریم، گۆنه‌باخان کیمی چیچک‌لَنیرديلر
قونشو دیلین پاس! إدیردیلر….
گؤزل‌جه أثرلر یارادیردیلار اؤزگه دیلینده
و هله جانی آجیمیش عسگریم دیلینده یاساق مارشېنې آغلاییردی
ائ هئی ی ی ی ی ی
اوباسیز إلیم
مدرسه‌سیز دیلیم
بایراق‌سیز کفنیم
بونلاری دئییردی سئل کیمی آغلارکن
و دوداق‌لاری قاپانیردی،
آسیلیردی هر اۆزگۆن آخشامیندا
بیر کفن‌سیز قاراباغدا اؤلن اوشاق‌لاریمیز کیمی
دوغو تۆرکۆستاندا باتان گۆنش کیمی
آغلاییردی تبریزی، اورمونو، موغانی، مییانانی
بۆتۆن تۆرک دۆنیاسینی
و قاپانیردی وارلیغیمیز
شرفیمیز
سونا چاتیردی دۆشۆنجه‌میز

سونا چاتیردی هرنه‌ییمیز!
“آیهان میانالی”
22/07/2015
19:06
Kərəc