قویروق دوغان ،قویروق دولان یا قویروق دونان / پینار شاکر
تورک اینانج سیستئمینده ،گؤی ده اولان نسنه لره داها بیر قوتسال لیقلا باخیلیردی ،اونلار گؤیو، گونشی، آیی و اولدوزلاری تاپینیردیلار ،کاهین لرین آسترولوژی بیلگیله ری و بو بیلگی ایله گله جک ده طبیعت ده نه باش وئره جه یینی بیلمه له ری شاه لاریمیز اوچون گؤیو داها اؤنملی قیلیردی بو سبب دن توپراقلاریندا رصد خانالار تیکدیریردیلر. تورک آدلارینین چوخو گؤی اوزونون نسنه لرینین آدینی داشیماسی دا بو اؤنمین گؤسترگه سی دیر.
قدیم دن تورک آسترولوژیسینده گؤیون نسنه لرینین هر بیرینین اؤزللیینه گؤره تورکجه بیر آدی واردیر اؤرنه یین:
کهکشان = سامان اوغروسو یا سامان یولو !
خوشه پروین یا ثریا = اولکر یا اورکر
ستاره میزان = اوچ اولدوز
جوزا = ایکی پیکر
بنات النعش =یئتدی قارداش یا یئتدیلر
سهیل = قویورقلو اولدوز
*قویروق؛1. بیر شئیین دالیندا اوزانان و یا دالینا یاپیشیب قوپمایان هرزاد، قوش و حیوان قویروغو، بیر پالتارین یئره دوغرو اوزانتیسی.
2.اینسانلار بیر یئرده دوراراق سیرا دوزه لتمه سی و بو سیرانین آدی. ((سن، ت(قودوروق، قوُذروق)، بو کلمه قودورماق سؤزونه باغلانیر و معناجا حددیندن گئچمیش وضعیته دئییله رک بیردن بیره حرکتده اولان اورقانا دئییلیر چونکی بو فعلین بیر معناسی ترپشمک و قیمیلداماق دیر))
*قویروق دوغدو؛ ائل ایچینده یای فصلینین اورتانجی گونونه دئییله رک ایستیلیگین آزالماسینا اشارت دیر.
* قویروق دوغماق؛ یای فصلینین یاریسیندان گئچمه گین بیلدیرن ایفاده
* قویروقلو اولدوز ؛ دالیندا اوزانتیسی اولان اولدوز
یای فصلینین اورتانجی گونو کی مردادین 15حساب اولونور قویروقلو اولدوز گؤی اوزونده دوغولار ، بو اولدوز گونشدن نئچه برابر بؤیوکدور و قوزئِی دن گؤرونر و یئرین ایستی سین آلیب یئری سرینله در ،بئله جه همان گوندن اعتبارن یئر سرینله مه یه باشلار .
قویروقلو اولدوز گؤی اوزون ده چوخ آز گؤرونر و بیزیم منطقه یا بؤلگه میزده یانی آذربایجان دا عمومیت ده 3 ساعات دان سونرا دا باتار . فارس ادبیاتیندا بو اولدوزون آز گؤرونمه خاصیه تیندن بیر کینایه وار کی دییرلر (ستاره ی سهیل شدی) یانی آز گؤزه گؤرونورسن، یوخسان..
بئله لیک له تورک تقویمینده آیلارین تورکجه آدینی او آیا عایید اولان اؤزل خاصییتینه گؤره وئریبلر اؤرنه یین:
آغلار گولر (فروردین)
گولن آی (اردیبهشت)
قیزاران آی (خرداد)
قورا پیشیرن آی(تیر )
***قویروق دوغان آی (امرداد)
زومار آیی (شهریور)
خزل آیی (مهر)
قیرووآیی (آبان)
اذر (آذر)
چیلله (دی)
دوندوران آی (بهمن)
بایرام آیی (اسفند)
آذربایجانین شیفاهی خالق دیلینده قویروق دوغان آیین هر بیر بؤلگه ده باشقا _باشقا تعبیرلری وار کی بیر بؤلگه ده قویروق دولان آی : یانی قویونون قویروغونا یئنی بیر قویروق دولور همان آی یا قویونون قویروغو پیی له دولور
باشقا بیر بؤلگه ده قویروق دونان آی : یانی یئییله بیلن قویروغو آیین او گونوندن اعتبارن ائشییه قویسان قویروق اؤزونو توتار و دونموش کیمی ییغیشار بو بئله دئمه کدیر کی هاوا ائله سرینله ییب کی قویروق ایستی زاماندا اولدوغو کیمی یوموشانمیر اؤزونو توتور و دونور.
باشقابیر بؤلگه ده سه قویروق دوغار : یانی قویروقو اولان بعضی حیوانلار او آی دوغار ..
کی بوتون بوتعبیرلر اصل موضونو بیلمه دن خالق دیلینده دئییلن یالان یانلیش تعبیرلردیر.
حاضیرلایان: پینار شاکر
