یئنی یازې‌لار / Yeni Yazılar
آنا صفحه Ana Səhifə / ادبیات / نثر / ادبی نثر / بو إودن هیس اییسی گلیر/ پریسا میرزایی‌ماهر (حیکایه)

بو إودن هیس اییسی گلیر/ پریسا میرزایی‌ماهر (حیکایه)

images (20)بو إودن هیس اییسی گلیر/ پریسا میرزایی‌ماهر (حیکایه)

 

تنگه ­نی دؤنوب دایانیرام قاپی­نین دالیندا. هیس اییسی گلیر… چوروموش قاپینی ایته­ له ­ییب حیطه کئچیرم. هر یئر سس­سیز سمیرسیز.

 آغاج­لارین یئلده ترپنمه ­سینه باخیرام… گیردکان آغاجی قورویوب آلما آغاج­لاری سینیب، آلچا آغاج­لاری آنجاق هله آیاق اوسته. حیط اورتاسینداکی یئکه حوضون رنگی گئدیب بؤیرو چارتلاییب.

سارماشیق­لار دولاشیب بوتون قیزیل گول­لره… اوزوم آغاج­لارینا…

پیلله­ لری چیخیرام. تندیرین یاخینلیغیندا ایله­شیرم، اوچموش دیوارلارا باخیرام، تندیرین ایچینده­ کی تیکه پارا کوللنمیش اودون­لارا.

گؤزلریمی یوموب سؤیکه­ نیرم دیوارا. بؤیوک ننه ­مین سسی گلیر. خمیری تشتده گتیریب ایلشیر تندیرین بؤیرونده. چرقدینی وئریب هؤروک­لری­نین آلتینا… “نارین خالا” دا کوچه ­نین آچیق قاپی­سینی تاققیلدادیب، ـ «کیم وار» دئیه دئیه ایچری کئچیر. قیچینی زورلا چکه چکه پیلله لری چیخیر، اؤزونو بؤیوک ننه­نین بؤیرونه وئریر… بؤیوک ننه­ باشلاییر خوش گلدینه. نارین خالا تؤوشوله­ دیکجه، سینه­ سی­نین خیسیلتی­سی قولاغیما دولور. ـ “نه یامان توستو سالیب­سان؟… کوچه ­نین باشینا گلیر اییسی”، دئییب گوللو دامنینی وئریر آلتینا. اوزوک­لرینی خینالی بارماق­لاریندان چیخاردیر، سونرا دا ال آتیر خمیره…

ـ “هئچ منه دئمه­ میشدین بو گون خمیر ائله­ یه­­ جک­سن؟”، دؤنور منه ساری، ـ “نه قاییریرسان هؤروک­لو قیز؟!”

یاواش سس­له دئییرم: ـ “ساغ اول!”

کونده ­لری بیر بویدا توتوب، برق کیمی ایشله­ ییر. اونو سپیر تاختایا، کونده­ لری فیرلادیب ییغیر تئشته سوفراداکی­لارین بؤیرونه، تئز ده اوستونو باستیریر قوروماسین­لار.

کونده ­لری یاییر، اوخلونو اوینادیر، پیچیلتی­یا باشلاییر… بیر آز کئچمه ­میش، منه باخیب گولوش­لو اوزو آجیلانیر. ـ “دور گئت بیر چای گتیر! اوشاق بؤیوگون سؤزونه قولاق وئرمز…”

یئریمدن ترپنمه­ دن، بؤیوک ننه­ نین پؤرتموش اوزونه باخیرام. خمیردن جورلادیغیم بالاجا فطیرلری بوراخام دئیه منه گؤز قاش ائله ­ییر. زورلا دورورام چای حاضیرلاماغا. سؤزلریندن باشیم چیخماسا دا، تئز قاییدیرام قالانینی ائشیتمه­ یه. نارین خالا داها بیر سؤز دئمیر. بؤیوک­ ننه ده. من دئییرم: ـ “بس هانی منیم فطیرلریم؟”

نارین خالا نارین نارین گولور. هامیسینی تزه­ دن کونده­له ­ییب لاواش ائله­ دییینی بیلیرم. حیرص بوغازیمی کسیر، قاش قاباقلا ایله ­شیرم…

نارین خالا ـ “خمیری اویناتمازلار، گوناه دیر!” دئییر، آلنی­نین ترینی سیلیر.

پیشمیش لاواش­لار تاختا کیمی قالانیر بیر بیری­نین اوستونه. بؤیوک ننه دوروب اونلاری یغییب آپاریر حیطین او باشینا.

نارین خالا ایل­شدیییی یئرده اؤزونو ترپدیب، یاخینلاشدیریر تندیرین باشینا. بیلنگ­لری­یله دامنینی آلتیندان چکیر، او حالدا یئکه قارنی ترپه­ نیر.

بؤیوک ننه گلیب ات پیتی­سینی قویور تندیره. سونرا کؤمک­له­ شیر نارین خالا دورسون. ـ “گئدک ائوه… بیر آز کئچسین، تندیر سویوسون، گلریک قیچ­لاریوی سالارسان ایچینه.”

ـ “هه باشیوا دؤنوم”، دئییب دورور آیاغا.

 قاچیرام ائوه ساری. بؤیوک حیطین ایچینده ایتمک ایسته­ ییرم… نالچانی سالیرام ائیوانا، نارین خالا ایله­ شرکن بالیشی گتیریب قویورام دالینا. منه باخدیغیندا، بالاجا گؤزلری ایشیلداییر، ـ “منیم جئیران بالام ساغ اولسون؟!”

الیمدن یاپیشیب منی ایل­شدیریر بؤیرونده. جورابی­نین اوستونده­ کی کئشی آچیب اوردا گیزلتدیییی  شیقالاتی اوزادیر منه ساری… گولومسه ­ییر.

یئل چوخالیر. یارپاق­لار تؤکولور حیطه، بوش حاووضون ایچینه…

بؤیوک ننه چؤرک­لری سولاییر، اونلاری قاتلاییر. سونرا لاواش­لارین آراسیندان بالاجا بیر فطیر چیخاردیب توتور منیم قاباغیما. ـ “بو دا سنین اؤزون بویدا فطیرین!”

گولور. گولمک همه شه کی کیمی اوزونه یاراشیر. ال­لریمی اوزادیرام بؤیوک ننه­ مه ساری… یئل کوچه­ قاپی­سینی چیرپیر. قاپی­نین آچیلی تاق­لارینا باخیرام، اوچموش دیوارلارا، بوش تندیره.

سئرچه ­لرین سسیندن باشقا هئچ زاد ائشیتمیرم. بیر آز اوشویورم. دوروب پالتاریمی چیرپا – چیرپا کوچه ­یه چیخیرام. قاپی آچیق قالیر.

 

یازار / Yazar : ائلمان موغانلی

بو یازېنې دا اۏخویون /Bu Yazını da Oxuyun

solmuş gül yarpaqları-ayda şəhbazzadə-yeniqapi.com--

سۏلموش گۆل یارپاق‌لارې / آیدا شهباززاده (حیکایه)

سۏلموش گۆل یارپاق‌لارې / آیدا شهباززاده (حیکایه) گۆنَش  دۏغماق  اۆزه‌رینده دیر. پایېزېن اینتیهارې آرتېق اۆفوقدان …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *