یئنی قاپی یئنی قاپی بیر یئنی باخیش دیر تورک دونیاسینا
بعضاً چوخ اوزاقلاردا یاشایان بیری…/ پینار شاکر
بعضا چوخ اوزاقداکی بیر شهرین هاوا دورومونو ایزلرسن. بوگون قار یاغیر، هاوا سویوق اولاجاق. قالین گئیینسه باری دییَرسن. یا، بوگون یاغیش یاغیر، گؤره سن ائشیک ده می؟ ائشیک ده اولسا باشینا توتاجاق چتری وارمی؟ دییه تدیرگین له شرسن، و او آن یاغیش آلتیندا ایسلانسا بئله بیرلیکده قول قولا ایسلانماغی دیله یرسن، و بیر آه چکیب ایسلانسا ،سویوق دَیسه ،خسته ل‍َسه، یالنیز باشینا، نه ائده جک ؟
اونا کیم باخاجاق؟
کیم آجیلی آش پیشیریب یئدیرده جک؟
بعضا چوخ اوزاقداکی بیر شهرین اینسانلارینی سئوَرسن و او شَهَرین جُغرافیاسینی ،دیلینی،کولتورونو آراشدیریب ازبر ائدَرسن.
بعضا چوخ اوزاقلاردا یاشایان بیری قولاغینین دیبینده کی اینسانلاردان داها چوخ یاخین اولار اوره گینه، اونونلا ساعاتلارجا یازیشماغی آرزولایارسان.
سوسیال شبکه لرده اَن سون نه زمان گؤروندو دییه باخارسان.
بو تئزلیکده گؤروندو یازارسا، ندن منه بیر شئی یازمادی ؟
ندن کئفیمی سوروشمادی؟
دییه فیکیرلره دالارسان. اینستاقیٰرامدا دفعه لرجه گؤردویون شکیل لرینی دفعه لرجه یئنی دن ایزلرسن.
اونا یازیلان کامنت لری گودرسن.
اونا کامنت یازانلارین یا اونون فالوو ائتدیگی اینسانلارین حایاتی ایله بئله ماراقلانارسان، و کیملیک لرینی آراشدیرارسان و اَن اؤنملی سی قیسقانارسان.
بعضا چوخ اوزاقداکی بیر شهرین زامانی ایله یاتیب دورارسان، و او شهرین یئمه ک وعده لرینده یئمه یه باشلارسان، سوفرانی سوسله یَن یئمَک لر بئله او شهرین یئمَک لرینی یانسیلار.
بعضا چوخ اوزاقداکی بیرینین دوشونجه لرینی، ایدئولوژلرینی منیمسه یَرسن، اونون اوخودوغو کیتابلاری اوخویارسان، اونون فیکیرلَرینی ساوونارسان. اونون هوبی لرینه ماراقلانارسان، فلسفه سئوسه، فلسفه بهانه سی ایله یازیشیب، سفسطه لر قوشارسان. بعضاسادَجه چوخ اوزاقلاردا یاشایان بیری آنلایار سنی، باشا دوشَر سفسطه لرینی.
بعضا چوخ اوزاقلاردا یاشایان بیری حایاتینی قاپسایان بوتون بعضا لر اولار.
بعضا چوخ اوزاقلاردا یاشیان بیری هر شئیین اولار او هر شئی اونون اَن چوخ سئودیگی و سنین بوز دولابیندا هر زامان حاضیر اولان کئیک دن ، دانیشدیغیندا اونون ان چوخ ایشلتدیگی تیکه لردن . یوخو پروقراملارینین اونون یاشادیغی شهرین گونشینه اویدوغوندان توتدو هرکسی اونون آدیلا سسلَمَیه و هرکسله اونون حاقیندا دانیشماغا قدر گئدر.
بعضا بیر باخارسان عئینی زاماندا بیر شهرده یاشاییب، باشقا بیر شهرده سه نفس آلیرسان، یا چوخ اوزاقلاردا یاشایان بیرینین حایاتینی یاشاییرسان، آرانیزدا اولانلارین بیر آدی اولماسا بیله سن سنی سئون اینسانلارلا دانیشدیغیندا یا باشقا بیرینی یوخولاریندا گؤردویونده اونا خیانت ائتدیگینی دوشونرسن یا او، او اوزاقلاردا بیرینین الینی توتارسا یا الینی بیرینین چیینینه قویارسا، سنه خیانت ائدیر دییه حیس ائدرسن.
بعضا بوتون حایاتینی قاپسایان بو بعضا لرین ندنی اولان بیرینین قارشیسیندا نه ائده جَگینی اونودارسان ،گولدویو زامان گولَرسن ،آغلادیغی زامان دا هیچقیرا_هیچقیرا آغلارسان، و اوزامان سادجه بیر شهرده یاشاییب، باشقا بیر شهرده نفس آلماق اولمور سانکی، عئینی زاماندا ایکی بدنده عئینی دویغولاری حیس ائتمک کیمی بیر شئی …
و بعضا چوخ اوزاقلاردا یاشایان بیری،
تکجه
بعضا لرین یا هر شئیین
یوخ،
سن اولور
سن….
یازار : پینار شاکر
