کیبریت‌‌ساتان قیز / اوشاق‌لار اؤیکوسو
چوخ آما چوخ سویوق، بوز کیمی بير ایلباشی گئجه‌سی‌ایدی. گئرچکدن‌ده قاووران(کاباب کیمی یاندیران) بير سویوق واردی. اينسانين ايليکلرينه قدر سویوغو حیس ائتدیگی گئجه‌لردن بيریسی‌ایدی. يولدان کئچن هرکس پالتولارين ياخالارينی قالديريب آتقيلارينا گؤزلجه‌سینه ساريلاراق یئریییردیلر. بو اينسانلاردان کيميسی ائوينه یئتیشمه‌گه چاليشير، کيميسی ايسه گئجه‌نی ائيلنه‌رک کئچیرتدیگی یئره دوغرو گئدیردی. اوزون سؤزون قیسساسی هرکس قیزیشا بیلدیگی بير يئره گئدیردی.
اوشاق‌لار ايسه آتا،آنالارینین يانيندا بير ساغا بير سولا یوخاری گئدیب، گؤزونه گؤروشدویو باشقا اوشاق‌لارا قارتوپو آتیردیلار. بئله‌سينه سویوق بير گئجه‌نين کئيفينی لاپ چوخ بو اوشاق‌لار آنلاییردی‌لار. اوشاق‌لار،قاققیلداییب موتلولوقلارينی گؤسته‌ریردیلر. بو اوشاق‌لارین ایچه‌ری‌سینده بير اوشاق وار‌ایدی کی، باشقالارینا هئچ اوخشاماییردی.
گلیب کئچنلرین هئچ ايلگيسينی چئکمه‌ين بير اوشاق‌دی. کیچیک، مينيجيک بير قيز اوشاق‌ایدی بو. باشيندا بؤرکو يوخ، پالتارلاری ايسه یاماق‌لارلا بزنمیشدیر. بير ائوين قاپيسينين اؤنونده بوزولوب آياقلارینی او قاپی‌نین آلتينا دوغرو سالمیشدی. سویوق‌دان او قدر چوخ ائتکيلنميشدی ، سانکی تير تير تيتره‌ییردی. قاپينين اؤنونده‌کی داش پیلله چوخ سویوق‌دو. بو قیزجیغاز سانکی گئجه‌نين بوتون سویوغونو اؤز بدنینده حیس ائدیرردی.
اؤنونده بير موقاووا کارتونون ايچه‌ريسينه سيرالانان کيبريت قوتولارينا باخیب گؤزلرينی یاشلاندیریردی. او سویوق گونده بير تک کيبريت قوتوسو داها ساتاماميشدی. کيبريت قوتوسو ساتابيلسئيدی آلدیغی پول ايله ائوينين يولونو توتوب و آناسینين اَليندن بير کاسا شوربا آلیب ايچه بيلردی. آناسینا کيبريت قوتوسو ساتامادیغینی سؤيله‌مک ايستمه‌دیگی اوچون ائوه گئتمیردی. سویوق‌دان قيسيلان سسی‌ایله ” کيبريت وار، کيبريت “ دييه چیغیریردی. کیچیک قيزين سسينه هئچ بیر باش دؤنوب باخماییردی بيله… قورتولوش سسینی ائشیتمه‌یی قيزين اورادا اولدوغوندان بيله کيمسه‌نين خبری یوخدور.
قيزين آياقلاری چوخ اوشويوردو، ايچيندن کئشکه آياقلاريمدا ترلیک‌لریم(دمپایی) اولسايدی دييه کئچیردی. بوندان قيسا بير سوره اؤنجه کوچه‌لرده دولاشيرکن خیزلا(سرعتله) کئچن بير ماشیندان قاچماق اوچون ترليکلری آياغيندان چیخمیشدی. ماشیندان قورتولونجا گئرییه دؤنوب باختیغیندا ياراماز بير اوشاق ترليکلرینی آلدیغی کیمی قاچیتمیشدی.کیچیک قيز، او یاراماز اوشاغین ائتدیگینه و اونون ترلیک‌لرینی قاچیردیب آپارماغینا دوشونوب هئچ بیر آنلام تاپا بیلمیردی. تئی‌خا ” ندن؟ ” دييه سوروشوردو اؤزو _اؤزونه. بو اولايدان سونرا بير قاپينين اؤنونه سیغینیب اورادا اوتورموشدو. بارماقلاری سویوق‌دان دونموش و سيزلامايا باشلامیشدی آرتيق.کیچیک قيز، بو اولاغان‌اوستو(غیرعادی) آجييا دايانامادی و کيبريت قوتولاريندان بير کيبريت چیخاریب ياندیردی. اويوشان بارماقلاری کيبريت چؤپونو اَليندن دوشورمه‌دن چتین توتوردو. قيزجیغازین اَللری تيتريیه‌رک چتینلیک‌له دووارا کيبريت چؤپونو سورتدو. کيبريت دووارا سورتونور سورتونمز هَمن الوو آلدی، الوو قيزين گؤزونده مينيک آما چوخ سئویندیریجی و اونودولماز‌ایدی.
یازار : H C ANDERSEN
آنادولو تورکجه سیندن کؤچوروب اویغونلاشدیران : آیهان میانالی
