دیلیمیزی ائوده قویوب مکتبه گئتدیک / ایواز طاها

دیلیمیزی ائوده قویوب مکتبه گئتدیک / ایواز طاها

(بو موراجیعت بیرینجی کز 1389-جی ایلده یئنی تحصیل ایلی موناسیبتی ایله یازیلمیشدی. اونون بعضی پارچالارینی بیر داها نظرینیزه چاتدیریرام. )

1. اوشاق‌لاریمیز اوخول‌لارا گئتدیلر، باجی‌لاریمیز، قارداش‌لاریمیز ایسه بیلیم‌یوردلارینا. هئچ بیری‌نین قولتوغوندا آنادیلینده بیرجه کیتاب یوخ.

2. فارس دیلی آکادئمیاسی‌ وظیفه‌لری‌نین یالنیز بئشینجی ماده‌سینده، اؤزلری دئمیشکن “یئرلی مدنیت‌لرین قورونوب ساخلانماسی”ـنا ایشاره اولونور. بو ایشاره باشقا میللت‌لره کورون ایشیق ساچیرسا، جومله‌نین داوامی اومیدلری پوچا چیخاریر. بللی اولور کی، آکادئمیک‌لر رسمی دیلی داها دا گوجلندیرمک اوچون اولکه‌نین قیراق‌ـ بوجاغیندا گؤزدن قاچیمیش “فارسجا فولکلور، آدلار و ایصطیلاح‌‌لار”ی توپلاماغا وورنوخورلار. گؤزله‌نیلمز دئییل، بو فرهنگیستانین سوی آغاجی‌‌نین کؤکو 1935‌ـجی ایله گئدیب چیخیر. همین ایلده ممالک محروسه‌ده یایغین اولان آذربایجان تورکجه‌سی ‌ایله یاناشی باشقا دیل‌لری فارسجانین خیرینه محو ائتمک اوچون بیرینجی فرهنگستان یاراندی. اینگیلیس‌لر بویورموشدولار، بیر زامان توپ‌لارینی ویئنا داروازاسینا سؤیکه‌میش تورک‌لردن زهله‌لری گئدیر.
واختیله فرهنگستان چئوره‌لری گومان ائدیردیلر چاغداش نسیل توراپاغا قاریشدیقدا دیلدن یالنیز خاطیره قالاجاق، سونراکی نسیل مکتب‌ گوجونه کوتله‌یه سیرینمیش یئنی دیله آلیشاجاق.

3. نهایت “بیزی بونا آلیشدیراجاق‌لار” دئیه، 89 ایل‌دیر بئله اولور. 89 ایل‌دیر زورلا وئریلمیش کیتاب‌لاری قولتوغوموزدا ساخلاییریق، آنا دیلیمیزی ایسه اوره‌ییمزده. من اورحان پاموکا یازاندا کی، بیزیم بیریمیز ائویمیزی ایتیرمیشیک (قاراباغدا)، او بیریمیز ایسه دیلمیزی (تبریزده)، سؤز دیلین اوغورلانمیش “یازی”سیندان گئدیردی، بی‌ریا مظلومیتی‌نین باهاسینا کؤنلوموزده قورویوب ساخلادیغیمیز دانیشیق دیلیندن دئییل. هر ایل دیلیمیزی ائوده قویوب مکتبه گئتدیک، آمما دیلسیزلییه آلیشمادیق. شاه‌لار سانیردیلار زامان آخاریندا رضا خانین یوخولاری چین اولاجاق، اولمادی. شاه دئییردی اوردونون [ارتشین] مطبخ ایشچی‌لری ده متجاسرلره (پیشه‌وری بئله آدلاندیریلمیشدی) قولاق بورماسی وئرمه‌یی باجاریرلار. آمما بئله اولمادی، پیشه‌وری دوغما کور نیفریتیمزده یاندی‌سا، شهریارین ساده دیلینده دیلیمیز پؤهره‌لندی. دیل آستارادان استرآبادا قده‌ر آیاقلانیب یئریمه‌یه باشلادی، بوغونتو ایل‌لرینده “سازیمین سؤزو” کیمی دیل آبیده‌سی یاراندی.

4. اوشاق‌لاریمیز اوخول‌لارا گئتدیلر، باجی‌لاریمیز، قارداش‌لاریمیز ایسه بیلیم‌یوردلارینا. هئچ بیری‌نین قولتوغوندا آنادیلینده بیرجه کیتاب یوخ. تکی دوغما کیملیک وئرگیسی بئیین‌لریندن، سئویملی آنادیل سئوگیسی ایسه اوره‌ک‌لریندن اکسیک اولماسین.
باجی‌لاریم، قارداش‌لاریم، مکتب یاددیرسا، دیلی یادیرغامایین، دیلیمیزی ائوینیزده یئترینجه اؤیره‌نین!

1389 ـ جو ایلین مهر آیی