یئنی یازې‌لار / Yeni Yazılar
آنا صفحه Ana Səhifə / دیل-دۆشۆنج / نسیلدن نسیله کورلانان دیل سزیرگیسی! / ناصر منظوری

نسیلدن نسیله کورلانان دیل سزیرگیسی! / ناصر منظوری

نسیلدن نسیله کورلانان دیل سزیرگیسی! / ناصر منظوری

نسیلدن نسیله کورلانان دیل سزیرگیسی! / ناصر منظوری

عزیزیمیز آلاندا الینه قلمی دونیانین بولودلاری، داغ‌ـ‌دره‌لری، آغاجی، گؤی‌ـ‌گؤیرتیسی، سئوگیسی . . . ائله لاپ گؤز.گؤره‌سی بیرجه بیرجه چئوریلیر مربع اولور، مستطیل اولور، مکعب مستطیل اولور، قائم‌الزاویه بیر مثلث اولو . . . آی بالام، بئله نییه؟

*   *   *

یوز ایل قاباق، هانسی اوزاق بیر کندین اوجقارلاریندا ساوادسیز بؤیوک آتا‌ـ‌آنا گؤرموش اولسا‌یدیز ایندی یاخشی بیلردیز؛ اونلارین باش‌لاری اؤز اکینچی‌لیک ایش‌ـ‌گوجونده ایکن _آمان آللاه_ آنجاق دانیشاندا، [ایللاه کی هاوا آیاز دا اولسایدی]، سس‌لری گورولدردی! دئیه‌ردین بس، دیلی ده، دیلدن تؤره‌نن دیل‌ـ‌آغیزی دا، ائله بونلار اؤزلری یاراتدیقدا، ائله‌جه ده، _آللاه قووات وئرسین! _هرآن بئجردیرلر.

دیل دئمه؛ اونلارا وارلیغین لاپ اؤزو، وارلیغین گؤزه‌سی دئ!

یئییردیلر ایچیردیلر؛ کسیردیلر بیچیردیلر. چاققاچوققونان جان‌آتیب یاشاییردیلار، آنجاق سؤزلرینده، بو نه‌دیر مئه‌ین سرین‌لیـیی، بو نه‌دیر داغین ظالیم شاختاسی، بو نه‌دیر آغیزدا أرییه‌ن أریک‌ین دادی . . . هامیسی جانلاردان، آغیزلاردان جانلانیب آنجاق سؤزلره ده سوزوردو. هر بیرزادین اؤز سزیرگیسی دیله دامیردی. باخ، ائله ایدی کی، دوُزـ‌چؤرک یئییلنده، دوُز، دیلین اؤزونده ده، دیلین سؤزونده ده، ائله، دوُز دادی وئریردی، چؤرک ده چؤرک دادی.

بیریسی، بو دادآلما قایدالارینی، بو سزیرگی‌لری دوز اؤز یول‌ـ‌یولاجاغیندا ایشلتمه‌سه‌یدی هامی تئز باشا دوشردی!

*   *   *

أللی ایل سونرا، بالا بالا شهـَر هاواسی دولور کنده.

میراثا قالمیش بو هاوانی، «توستو» دئییم یوخسا «چن» دئییم، «دومان» دئییم نه دئییم؛ گؤزل‌لیگی ده وار ایدی چیرکین‌لیگی ده! بالا بالا، گنج‌لرین دیلینه _بیراز بو یان بیراز او یان_ اویارـ‌اویماز سؤزلر قاریشیر. بالالار دانیشارکن لحن‌لرینه تردیدلی بیر قورخو حیسی آرتیر. بئله باخ! دیلین ایلیگینه بالا بالا قورخو جومور.

گل ایندی کی، جانلارینا قورخولو بیر اوشنمک دولان جاوان‌لار باشلاییرلار دیله ایکی‌ـ‌اوزلولوک گتیریرلر.

بو دؤورون نسلی، نه بو یانلیق نه او یانلیق، کئچیت بیر دؤورون آدام‌لاری کیمی، دیله تردید آرتیریرلار، اؤز هویوخمالارینی قاتیرلار دیله.

*   *   *

یوز ایل سونرا، نوه‌لر ساوادلی دیرلار، اونلار قرامئر بیلیرلر؛ آنجاق، دئمک اولار، اونلارین دیل سزیرگی‌لری کورلانیبدیر. اونلار دیلی چوخلو قراردادی بیر شئی باشا دوشورلر. بونلارین بئیین‌ـ‌زئـیین‌لرینده نئچه دیل اویناییر؛ هئچ‌بیریسی ده اوستون دئییل. بونلار بولودون فورماسینی مربع.مستطیل کیمی باشا دوشورلر. آغاجی دیجیتالی آنلاییرلار. دیل ده قراردادی بیرزاد دیر (بو یانلیق دا یوخ او یانلیق دا یوخ! آپ.آوارا بیرزاد!)

بونلارین دیل‌ـ‌دوشونجو گرگین بیر دورومدا دیر (گؤلون قوروماسی کیمی، مئشه‌لرین کورلانماسی کیمی، سو قیتلیغی کیمی، آتموسفئرده‌کی اوزون قاتی‌نین ییرتیلماسی کیمی . . .)

*   *   *

ایندی‌لیکده، دئمه‌لی، یاراتدیغیمیز بیر هویوخدوـ‌کیریخدینی دیله دولدوروروق؛ دیل سزیرگیسینی تانیمیریق. او دیر کی، بئـیین‌ـ‌زئـیینیمیز دیله ارکین یاناشا بیلمیر بلکه قراردادی بیر هاوایا دادانیر، اعتیاد کیمی!

دیلین سزیرگیسی اؤز شستـلی ووقارینی ساخلاماق‌لا یاناشی دیلین عئلمی قایداـ‌قانون‌لاری دا قورونمالی ایدی. آنجاق، اؤز آرامیز دیر، بیزیم قراردادی‌لشمیش بئـیین‌ـ‌زئـیین‌لریمیز دیل سزیرگیسینی بیر آنلام سیستئمی کیمی، بیر بیلگی سیستئمی کیمی باشا دوشنمیر.

باشلامیشیق (قولوموزا چؤپدن دیرک!) ۳۰۰ دنه سؤزجوک‌له اؤز دیلیمیزده، ۵۰۰ دنه ایله ده فارس دیلینده، آللاه قویسا، رومان یازیریق! (اوسته‌لیک، هله، ۱۵۰ کلمه ده اینگیلیس دیلینده بیلیریک!)

اورمو گؤلونون دورنالاری گئدن سایاقدا آنلامیمیزدان بیزیم ارکین‌لیک ده گئدیر، باخ . . .

Yazını bu əlifbada oxuyun: TÜRKCƏ

یازار / Yazar : ناصر منظوری

بو یازېنې دا اۏخویون /Bu Yazını da Oxuyun

IMG_20160905_010918

الفبای زبان تورکی در طول تاریخ

الفبای زبان تورکی در طول تاریخ برای نگارش زبانهای تورکی در طول تاریخ الفبا‌های مختلف …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *