سخاوت ساحيل – گول‌وئره‌نين تويو
یئنی قاپی دات کام سخاوت ساحیلین “گول‌وئره‌نين تويو” حئکايه‌سینی تقديم ائدير
سحر آلاقارانليقدان اَلوئردی آروادی دومسوکله‌دی کی، دور چايي قاينات، ايشه تئز گئديب گون‌اورتايا اؤزومو تويا چاتديرمالييام. آرواد پيشيک چلدليگی ايله قالخيب ياشيل-قيرميزی خالاتينی(لباس خواب) اَينينه کئچيردی. ساماوارا اود سالدی، ياغی، پئنديری سويودوجودان(بوز دولابی-یخچال) چيخاريب ماسايا دوزدو، جئهيزليگيندن کریستال ایسته‌کانی يويوب سيلدی. بو گون ايکيسينين ده کئفی ياخشييدی – قونشوداکی تويدان بونلارين دا ائوينه پای دوشوردو ائله بيل.
اَلوئردی ايچَنده ائوده توی-بايرامييدی. غريبه يدی، قونوم-قونشودا کيشيلر ايچنده ائوده داوا-قيرغين ساليرديلار، بونلاردا ايسه ترسينه‌يدی. آرواد بيلنده کی، کيشينين کئفی آلا بولودلاردادی، آز قاليردی چيرتما چاليب اويناسين، نه ايستگی-آرزوسو وار ايدی اَرينه دئييردی، اَر‌ده(اَلوئردی) بيرجه کلمه: “آاز، اؤلمه‌ميشم‌کی؟”
آييق واختی آروادين نسه ايستمه‌يه، نسه دئمه‌يه جورأتی چاتميردی، دئينده ده جاوابی حاضيرایدی:
“آاز، ردد اول بوردان!”
دوزدو، اَلوئردی قونشولارين دئديگی کيمی آلکاش(دائم الخمر) دئييلدی، آما تئز-تئز ايچيردی، هفته‌ده 3-4 دفعه بوغازينی ياشلاماسا اولموردو.
ايچمه‌ينده ده ايچميردی، آدام بالاسی کيمی سحر ناخيرا، آخشام دا آخورا؛ هئچ کيمنن ايشی يوخويدو، اينتهاسی حَيَطه گيرن کيمی آروادی هايلاييردی: “آاز، هاردا باتيبسان، آجيندان قيريلديق، بير تيکه زهر گتير!” گول‌وئرن يازيق دا ايشينی بيليردی، الينده حوله اَل‌اوزيويانين(دستشویی-روشوئی) يانيندا فاراغات دورور، بيرجه کلمه ده دينيب دانيشميردی.
اَلوئردينين اوشاق صاحاب اولماق ساريدان بختی گتيرمه‌ميشدی، نه قدر پول-مال تؤکموشدو، خسته‌خانالار گزميشدی خئيری يوخويدو، حکيم دئييردی آرواد دؤل(جنین) توتا بيلمير، اورقانيزمی ضعیفدی، او دا بوشايا بيلميردی، نئجه بوشاسين دوست-دوغماجا خالاسی قيزی‌ایدی. ائله بونا گؤره ده ايتنَن پيشيک کيمی دولانيرديلار. آييق اولان گونو دقيقه باشی باشينا چیرپیب دئییردی: “اوجاغيمی کور قويدون، آ قانجيق”.
اَلوئردی ائوه “حاضير” گلنده خالاقيزينی دينج قويماز، هاواسينی آلمايينجا اَل چکمزدی، تا کی، اؤزو ده هاوادان دوشه‌يدی؛ “پریود” اولاندا ايسه اوزونه ده باخميردی، ائله بيل باجی-قارداشييديلار.
محرّم‌ليگين چيخ هاچيخیيدی، خبر ياييلدی کی، يئنگه(قارداش آروادی) يئگانه‌نين اوغلو “روسییه”دن گليب، گلن بازار(شنبه) تويودو. گول‌وئرن گؤزونه دؤندويوم بونو ائشيدن کيمی شيفونئرين آلت گؤزونده ساخلاديغی ايکی تاختاليق پارچانی گؤز قيرپيميندا درزييه(خیاط) وئريب يالوار-ياخار ائله‌دی کی، تويا کيمی چاتديرسين.
بورداکی تويلار ايکی‌پرده‌لی تئاتر کيمی ایدی – گون اورتادان آخشاما وورهاوور کيشی مجليسی، آخشام گون باتاندان تا گئجه ياريياجان کيمی چال اويناسين، وور چاتلاسين. گوندوزو کيشيلرين، گئجه‌نی آروادلارين حسابينا يازماق لازيمدی.
اَرينی يولا سالاندان سونرا گول‌وئرن تويا تيکديرديگی دونو آزی اون دفعه گئيينيب-سويوندو، سئوينديگيندن بيلميردی نئيله‌سين، آخشامی نئجه گؤزله‌سين. گئيينيب گوزگونون قاباغيندا اؤزونه تاماشا ائديردی، تئز ده سويونوردو، قورخوردو پالتار اَينينده ازيله. ايسته‌ييردی قيزيلی آليشديم-يانديم پارچاسيندان اولان پالتارينا گؤره قيزيللارينين هاميسينی تاخسين، بيليردی کي، قير-قيزيل نه قدر چوخ اولسا، ائله چوخ نظر چکه‌جک، هامی اوندان دانيشاجاق، هامي اونو گؤستره‌جک، بير سؤزنن گوندمده اولاجاق.
گول‌وئرن ائودار ایدی، بوتون گونو قاخيليب اوتوروردو ائوده. دوکانا-بازارا دا اَلوئردی اؤزو گئديردی. اونونکو قونوم-قونشو تويلارييدی، بزنيب-دوزه‌نيردی قير-قيزيلينی تاخيب گئديب اوتوروردو يوخاری باشدا، هم عئينی آچيليردی، هم ده قئر-قئيبت(غیبت) ائله‌ييردی. ايللاه دا ايری‌قاشلی اوزوکلريينَن، ايری سيرغالاريينان، باهالی پالتاريينان اورداکی آروادلارا ياندی-قيندی وئريردی.
الوئردی ده هئچ واخت آلتی‌دان سونرايا قالميردی – اونونکو توت دئيينجه ووروب گليب ياتماغييدی، چالغيينان، اويناماقنان آراسی يوخويدو.
ساعات آلتی‌يا آز قاليردی، گول‌وئرن دارانيب بَزَنميشدی، پودراسينی، پوماداسينی چکيب حاضير دورموشدو، گؤزله‌ييردی اَری گليب چيخسين، سونرا بو گئتسين – اَری گلنده کيشيلرين مجليسی داغيلميش اولوردو.
حَيَط قاپيسی اچيلاندا گول‌وئرن اؤزونو باييرا آتدی.
– آی کيشی گل چيخ دا، باياقدان مجليسين داغيلماغينی گؤزله‌ييرم. چايی تئرموسا(فلاسک) سوزموشم، ايسته‌سن ايچرسن، من گئديرم، سن ييخيل يات.
اَلوئردی آياق اوسته گوجله دوروردو، اؤزونو جمله‌ييب(توپلاییب) آروادينا باخدی، گه‌یيره-گه‌یيره گؤزلرينی قيييب آلتدان-يوخاری اونو سوزدو. آنی اولاراق باشينی آشاغی ديکيب قفيل ده يوخاری قالديردی، گؤزلرينی بَرَلديب گول‌وئرنه باخدی.
– آاز، بو نَدی، نه قشنگ‌لَشيبسن؟
گول‌وئرن گؤزونو سوزدوروب، بير آز دا اينجيک سسله دئدی:
– سن هئچ آيری واخت منه بئله باخميرسان، ياخشی کی او زهريمار وار، يوخسا…– سؤزو آغزيندا قالدی، اَری اوستونه چمکيردی.
– تئز اول کئچ ايچری، گئت سويون گليرم، توی کراواتدا اولاجاق.
– اششی، بير دايان ائ، گؤرمورسن تويا گئديرم؟ سن گئت يات، گلنده اويادارام.
– آاز، گير ايچری.
– باشينا دؤنوم، قوی گئديم، گلنده اؤزوم اوياداجام، بيرتهر بَزَنميشم، کيمدی بيرده حاظیرلانان.
ائله بيل بو سؤزلری اَلوئردييه دئميردين، قيزميش کَله کيمی گؤزلری پاريلداييردی، اوندان اولسايدی، ائله حَيَط دَجه آروادی باسمارلاياردی، اينتهاسی قونوم-قونشودان آييب ائله‌ييردی.
گول‌وئرن ايندييه‌دک اَرينين بير سؤزونو ايکی ائلمه‌ميشدی، بيليردی کی، ايکينجی سؤزه احتيياج يوخدو، ترس شيلله آياقداکی توفنگ کيمی هميشه حاضيرييدی. دی گل تويه نئچه واختی حاضيرلاشيردی، گون اورتادان بَزَنميشدی، زحمتينه حئييفی گليردی. ايلان ديلی چيخاردی، نه ايللاه ائله‌دی خئييری اولمادی – اَلوئردی “نئت” دئييب دورموشدو.
گول‌وئرن بيلميردی نئيله‌سين، اَرينی نئجه باشا سالسين. ديشی باغيرساغينی کسيردی، قيريلا-قيريلا قالميشدی.
– اَليش قوربان اولوم، آيدا-ايلده بير دفعه توی اولور، گئديب تئز قاييداجام، چوخ اوتورماياجام، هارا تَله‌سيرسن، قوی، گئديم-گليم سونرا.
اَلوئردی قفيل آروادين قولوندان توتوب دارتا-دارتا ايچری آپاردی.
…گول‌وئرن ايچريدن چيخاندا پودراسی پاماداسی بير-بيرينه قاريشميشدی، گؤزونون اوستونده‌کی ياشيل رنگ صيفتينه ياييلميشدی، ائله بيل بوياقچی کوپوندن چيخميشدی. پالتاری ازيک-اوزوکدو، ساچلاری پيرتلاشيق شاکقيلداق کيمی بوروم-بوروم اولموشدو – گول‌وئرن او گول‌وئرن دئييلدی، تويلوق اثر-علامت قالماميشدی.
آگوست، 2016، يئسسئنتوکی
سخاوت ساحيل
قایناق : ادبیات قزئتی
کؤچوروب اویغونلاشدیران : آیهان میانالی
Yazını bu əlifbada oxuyun: TÜRKCƏ
