قادین‌لارین حیس‌لری گۆجلۆ اۏلار / پینار شاکر

قادین‌لارین حیس‌لری گۆجلۆ اۏلار / پینار شاکر

اصلینده قادینلارین حیس لری گوجلو اولار ، دئیه بیلمه دیک لرینیزی داورانیشلارینیزدان حیس ائدرلر ..

اؤرنه‌یین سئوگینیزی،باخیشلارینیزدان، اونلاری گؤز اوجو گیزلی‌جه سوزمه نیزدن، بیری لریندن قیسقانمانیزدان ،بیردن بیره تَرلَدیگینیزدن، یا رنگینیزین آتدیغیندان یا اونلارین گؤزونه باخیب دانیشدیغینیز زامان سؤزون اوجونو ایتیردیینیزدن آنلایا بیلرلر.

آنجاق قادینلار سئوگینی آنلاماغی یوخ ،ائشیتمه‌یی سئورلر. بونون اوچون ده اؤزلرینی او یولا ووروب آنلادیقلارینی آنلامازلیقدان گلرلر ..

بونلاری اؤزومدن بیلیرم مثلا یاخشی بیلیردیم ندن قاری سئودیینی، ندن شعرله ایلگیلندیگینی، ندن قیرمیزی گئیدیگینی، ندن هابیل دینله‌دیگینی یا ندن اطرافیمدا دولاشان بیری‌لرینی سئومه دیگینی. من بوتون بو ندن‌لری یانیتلاماغی یاخشی بیلیردیم.منی سئودییینی یاخشی بیلیردیم.

آنجاق بیلمکدن چوخ، ائشیت‌مک ایستیییردیم، و ائله‌جه اونلاری حیس ائدیب بیلدیگیم کیمی بو گون گؤروشدویوموزده، الیمی توتوب سیخدیغیندا ندن بارماقلارینین بوشالدیغینی، ندن گؤزلرینین دولوب بیر یئرلره دالدیغینی، ندن تله‌سیک بیر فینجان چای ایچدیگینی، ندن آرد_آردا سیقارئت آلیشدیریب دانیشمادیغینی، و آرا بیر اؤتَری، اوزومه باخیب بیر زامانلار قاه قاهالارلا گولدویون سؤزلریمه تبسّوم ائتدیگینی، و ندن سورَکلی قولونو چیرماییب گؤز اوجو عقربه‌لری گوددویونو یاخشی بیلیردیم.

آما ندن دئیه سوروشماقدان دیسکینیردیم. چونکی من قادینام، چونکی قادینلارین حیس لری گوجلو اولار.

چونکی قادینلار…

چونکی قادینلار بعضا بیر شئی‌لری آنلادیقلاری زامان ائشیتمک ایسته‌مزلر، یا ائشیددیک‌لری زامان آنلاماق ایسته‌مزلر. منیم آنلامادیغیم کیمی منیم حیس ائتدیک‌لریمی اؤزومه آنلادا بیلمه‌دیگیم کیمی، منیم ائله‌بئله‌سی ساچمالادیغیم کیمی. چونکی قادینلار سادجه سئوگینی آنلاماقدان چوخ ائشيتمک ایسترلر.

سئوگینین بیتدیگینی یوخ ،اونو نه آنلارلار، نه ائشیتمک ایسترلر، سادجه حیس ائدیب اؤلمک ایسترلر.

بونو اؤزومدن بیلیرم …

اؤرنه‌یین منیم بوگون بیر فینجان چای دا بوغولدوغوم کیمی، آرد آردا سیقارئت لرله کول اولدوغوم کیمی،عقربه‌لرین آراسیندا اَزیلدیگیم کیمی و تبسّومونون ایچینده اؤلدویوم کیمی.

یازار: پینار شاکر

Yazını bu əlifbada oxuyun: TÜRKCƏ