بو گوزگویه بیر واخت قوشا باخاردیق / رامیز رؤوشن
بو گوزگویه بیر واخت قوشا باخاردیق
بو گوزگوده یئرین ایندی بوش قالیب ،
بلكه سندن بو گوزگونون جانیندا ،
دوداق قالیب ، كیرپیك قالیب ، قاش قالیب ،
گؤز یاشلارین جانیندادی بلكه ده ،
داملا ،داملا ارییجك بو گوزگو ،
بیر گون سنین آیاغینلا دونیا دا ،
آیاغ آچیب یئرییه‌جك بو گوزگو ،
بلكه ، سنی آختاراجاق ، گزه‌جك ،
میلیون ، میلیون آداملارین ایچینده ،
گؤرن كیمی تانییاجاق اوزونو ،
اَن قارانلیق آخشاملارین ایچینده ،
قاچاجاقسان بو گوزگونون اَلیندن ،
دؤنه‌جكسن او دؤنگَیه ،بو تینه ،
آداملاری ، ماشینلاری ، ائولری ،
آتاجاقسان بو گوزگونون چنگینه ،
یئنه ، یئنه دویمایاجاق بو گوزگو ،
بیر شهری اودوب ، اودوب گله‌جك ،
سنی گؤزدن قویمایاجاق بو گوزگو ،
یئری – گؤیو توتوب ، توتوب گله‌جك ،
سن قاچدیقجا یئللَنه‌جك ساچلارین ،
بو گوزگویه پای دوشَجك ساچیندان ،
ایپك دونون یئللَندیكجه گوزگویه ،
پای دوشه‌جَك اَتَگینین اوجوندان،
قاچیب – قاچیب اؤزونو یوراجاقسان ،
قفیل بیر دن گؤره‌جكسن او داشی ،
بو گوزگونو داش آتیب قیراجاقسان ،
بو گوزگو دن داغیلاجاق گؤز یاشین ،
هر تیكه سی قاییق تكی اوزه‌جك ،
دؤرد طرفی گؤز یاشینلا دولونجا ،
بو گوزگونون بلكه هر تیكه سیندن ،
دوداقلارین چیغیراجاق دالینجا ،
… بو دا بئله بیر ناغیل دی یالاندی ،
سن كی یوخسان ، گئتدیگین او گئدندی ،
بو گؤزگو ده یئرینده دی ، یئرینده ،
بو گوزگو ده یئنه ساغ دی ، بوتؤودو ،
سینان گوزگو آخی بیر ده جالانماز ،
بلكه تانری اؤزو گؤروب بو ایشی ؟!
بو گوزگونون هر تیكه سی ، بلكه ده ،
داملا – داملا گؤز یاشینلا بیتیشیب ،
بلكه سندن بو گوزگونون جانیندا ،
دوداق قالیب ، كیرپیك قالیب ، قاش قالیب ،
گؤز یاشلارین جانیندادی هله ده ،
گؤز یاشلارین قورومایب ، یاش قالیب ،
بو گوزگودن گلیب كئچیر خانیملار ،
اؤزلرینه باخیب – باخیب كئچیرلر ،
دوداغیندان دوداقلاری رنگ آلیب ،
كیپریگیندن كیپریك تاخیب كئچیرلر ،
گؤز یاشینلا دولور ، دولور گؤزلری ،
باخیر یئره ، باخیر گؤیه ، آغلایر ،
بو نه درددی –هئچ بیلمیرلر اؤزلری ،
هئچ بیری سی بیلمیر نییه آغلاییر…
Yazını bu əlifbada oxuyun: TÜRKCƏ
