یئنی یازې‌لار / Yeni Yazılar
آنا صفحه Ana Səhifə / مصاحبه‌لر / مصاحبه‌لر / مهرداد کسانی

مصاحبه‌لر / مهرداد کسانی

مصاحبه‌لر / مهرداد کسانی

مصاحبه‌لر / مهرداد کسانی

اؤن سؤز:

ایران ایسلامی اینقیلابیندان سونرا تورک پاپ موسیقی‌سی بو اؤلکه‌ده بیر یوخو پروسئسی کئچیریب بو ساحه‌ده دونیا گونجل موسیقی‌سیندن دالی قالمیشدی!

ایل‌لر بئله کئچندن سونرا بو سون ایل‌لرده یئنی قان آذربایجان موسیقی‌سینین دامارلاریندا  آخماغا باشلاییب،یئنی موغننی‌لر پاپ موسیقی ساحه‌سینده عرصه‌یه چیخدیلار.و بو یئنی قان یئنی باخیش کیمی ایز قویدو بیزیم موسیقیمیزه!

داها آرتیق ماشین‌لاریمیزدا یالنیز آشیق موسیقی‌سی،یا دا آرازین اوتایینداکی ماهنی‌لار ائشیدیلمیر!

بو اولای بیزلره اؤز‌گووَنی قایتاریب،کیم اولدوغوموزو آنلاتاراق،اؤنوموزده کی یولو داها آچیق و آیدین گؤرسه‌دیر!

بو یئنی قانلاردان کی موسیقیمیزین دامارلاریندا آخماقدادیر گنج موغننیمیز مهرداد کسانی بَی دیر.

او اوزدن یئنی قاپی دات کام بو قرارا گلدی کی بو باجاریقلی موغننیمیزدن بیر قیسّا تانیتیم مصاحبه‌سی آلیب سیز سایین اوخوجولاریمیزلا ایشتیراکا قویسون!

مهرداد کسانی بَی ده آچیق اوزله بیزیم بو دعوتی قبول ائدیب بو مصاحبه‌نی بیزیمله کئچیرتدی.

هر شئی دن اؤنجه اؤزونوزدن قیسّا بیر بیوگرافی سؤیله‌یین؟

   – ۱۳۶۶’نجی گونش ایلی، سولدوز (بوگونکو نغه‌دئی یا همان نقده) دوغوملوسویام.
اؤزوم ایسته‌دیگیم گونجل تورک-پاپ ماهنی یازارینین اولمادیغی ندنی ایله ۱۳۸۸دن، اؤنجه کلاسیک قالیب‌لرده شعر یازدیم و اونونلا بیرلیکده اؤز ایسته‌دیگیم ماهنیلاری یازماغا باشلاییب بیر موزیک قوروپو یولا سالدیم.
البته بو موزیک قوروپو توی اوچون یوخ،بلکه یئنی و اوریجینال ماهنی‌لار یاراتماق اوچون قورولموشدو.
۱۳۸۹دا آلتی ماهنیلی بیر موزیک آلبوموم “سئودا یارالیسی” آدی ایله چیخدی.
(“بیزیم تیراختور” آدلی ماهنیم آلبومدان اؤنجه یایینلانمیشدی.)

 

موسیقی ایله نه زامان تانیش اولوب اونا ماراق گؤرسه‌تـدیز؟

    – یادیما گلن بودور کی اوشاق‌لیغدان(۶ یاشیمدان) اوخویاردیم و موسیقی‌یه علاقه‌م وار ایدی…

 

نه اولدو تورکجه ماهنی اوخوماغا اوز گتیردینیز؟

   – دوغروسو بودور کی ائله همیشه، یعنی اوشاق‌لیغیمدان بوگونه، آیری دیلده اوخویاندا اؤزومو اؤزومدن اؤزگه حیس ائدیرم!
دئیه سن او اوخویان هئچ من دئییلم!
اوندا کی ایسته‌دیم اوخوماغا باشلایام، گؤردوم کی هرنه دن اؤنجه اؤزوم اولمالی‌یام، یوخسا بیر عؤمور اؤزومدن قاچیب اؤزمو آلداتماغا مجبور قالاجاغام!
اودور کی بیر عؤمورلوک،اؤز آنا دیلیمده ماهنی اوخوماغی سئچدیم.

 

ایلک دفعه نئجه باشلادینیز؟

   – ایبتیدایی زامانیندان دبیریستانا کیمی سرود قوروپلاریندا تکخوان اولاراق اوخویاردیم.
البته دئمه لی‌یم کی اونونلا بیر آرادا همیشه قوتسال قورآنی صوت ایله اوخویوب مقام گتیرردیم.
آما اصلینده آماتورجاسینا ایلک دفعه، بیر سؤزله مئلودی حاضیرلاییب اؤزوموز جورله‌ییب باشاردیغیمیز قدر استودیویا اوخشاتدیغیمیز بیر خیردا توکاندا اونو رئکورد ائدیب آرانژ ائتدیک.

 

ایلک ماهنی‌نیز نه آدلا ایدی؟

   – نه بیلیرسن؟!

 

او ماهنینی اوخوماق یولوندا یارانان خاطیره‌نیز نه‌دیر؟

    – آتاما دئدیم ۳۵۰ مین خرجی وار،دئدی اؤلمه میشم کی! هر نئچه اولور اولسون! گئت اوخو و هئچ نییاران اولما! آما ائله بیر ماهنی اوخو منده سئویم! بیلیرم منیم اوغلوم ایسته‌سه لاپ گؤزل ماهنی اوخویار… اَن شیرین خاطیرَم بودور کی اونو کاسئته وورموشدوم و آتاملا آنام،هم ائوده همده ماشیندا سئوه-سئوه،منیم “یئته‌نکلریمه ایناناراق” اونو دینله ییردیلر…

 

اَن سئودیگینیز ماهنی؟

    – سئودیگیم ماهنی چوخدور آما اینانین بو گونه دک اَن سئودیگیم ماهنینی سئچه بیلمه‌میشم.

 

موسیقی دونیاسیندا اؤرنه‌یینیز سیمگه اولاراق کیم دیر؟

– سئویملی “سایین ماهسون قیرمیزی‌گول – Mahsun Kırmızıgül” جنابلاری.

 

بوگونه‌جان نئچه ماهنی اوخویوب سینیز؟

– یایینلانمیش ماهنی‌لاریم ۲۵ پارچادیر آما اوخویوب یایینلامادیغیم ۳ ماهنیمدا وار کی “آه اورمیه” اونلاردان بیری اولاراق تئزلیکده اینشاللاه یایینلاناجاق دیر.

 

خالق ایچینده أن سئویلن ماهنی‌نیز هانسی دیر؟

– دقیق بیلمیرم آما “سن گئده‌لی و عاشیقینم”ین داها چوخ سئویلدیکلرینی حیس ائدیرم.

 

گله‌جه‌یه پلانینیز نه دیر؟

– داها گونجل،داها گوجلو و داها اوغورلو و اوریجینال ماهنی لار و اینشاللاه رسمی اولاراق آلبوم‌لارلا،کانسئرتلرله میللتیمیزین قوللوغونا دوام ائتمک.

 

بو یولدا یئنی یئتمه ایگیتلریمیزه اؤنه‌رینیز نه‌دیر؟

–  اؤزلرینه اینانیب،اوریجینال ماهنی لار یاراتماغا چالیشسینلار.
کپی ائتمه‌سینلر، گوجسوزده اولسا یئنی ماهنی چیخارتماغا چالیشسینلار.
صنعتچی اودور کی ائلینین وارلیغینا بیر شئی آرتیرسین، دوغرو بیر صنعتچی اولماغا چالیشسینلار!
فولکلورلاریمیزی تیکرار ائتمکله، اونو-بونو کپی ائدیب کور-کوراسینا تقلید ائتمکله هئچنه‌یه چاتمادیقلارینی بیلسینلر.

 

موسیقینین گله‌جه‌یی آذربایجاندا نئجه گؤرونور؟

–  سون زامانلاردا موسیقیمیزده کی چالیشمامازلیقدان یارادیلمیش بوشلوقلاری گؤروب بعضی فورصت طلبلر خالقین آراسیندا شور سالماقلا بولاندیریق سودان بالیق توتماغا باشلاییب اؤزلرینی میدان اَرلری خیطاب ائده‌رک موسیقیمیزین فضاسینی داها آرتیق بولاندیریبلار کی اینانیرام بو اولای موسیقیمیزین فضاسینین یاخین گله‌جک‌لرده دورولاجاغینین خبرینی وئریر.
منجه موسیقیمیز، اؤزللیکله پاپ موسیقیمیز داها خیزلی یولا دوشمه‌لی دیر و بو اولایین اوز وئرمه‌سینه موزیک صنعتچی‌لریمیزین ایسپونسورلاری اولمالی دیر چونکو موزیک بوگونکو دؤنمده چوخ آغیر هزینه‌لی بیر هونردیر.

 

خالقیمیزا اؤزل سؤزونوز نه‌دیر؟

– هرنه دن اؤنجه منه دَیر وئریب،دستکله‌ییب، آلقیشلاییب،منی ریاسیز سئودیکلری اوچون بوتون خالقیمیزدان دونیالارجا میننتدارلیغیمی بیلدیریرم.
بیر ایستهگیم وار بؤیوک خالقیمیزدان اودا بودور کی تقلیدی و کپی اولونموش ماهنی‌لارا دَیر وئرمه‌ییب اوخویانلاریمیزدان ایصرارلا اؤزللیکله اؤز آنا دیلیمیز،یعنی آذربایجان تورکجه‌سینه اوریجینال و گونجل ماهنی لار ایسته‌سینلر.

 

سون سؤز؟

– یئنی قاپی سیته‌سیندن،اؤزللیکله سایین آیهان میانالی جنابلاریندان منه دَیر وئریب بو فورصتی وئردیکلری اوچون چوخ تشککور ائدیرم.

اؤنجه یاشاسین وطن،
سونرا وطن یاشاسین!
سیزی همیشه‌لیک سئوه‌نین بیری؛
مهرداد کسانی. ۲۴ . ۱۰ . ۱۳۹۵

یازار / Yazar : آیهان میانالیAyhan Miyanalı


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

بیر یۏروم / Bir Yorum

  1. یاشااسین مهرداد کسانی تورک پاپ موسیقیسینین بیرینجی سولطانه…
    سنه و ماهنیلارینی اورکدن سویییب و سنه میننداریخ که بیزیم باش اوجالدانیمیزسان.

Leave a Reply

Your email address will not be published. Required fields are marked *