تانيماديغيم کيشی/ سئودا سۇلطان‌اووا (حیکایه)

تانيماديغيم کيشي/ سئودا سۇلطان‌اووا (حیکایه)

آروادین اؤلدۆرن کیشی ایله تانیشلیغیم – سئودانین حیکایه‌سی…

 

سبدده ‌کي أرزاقي پيشتاختايا قويماق ايسته‌ينده گؤزۆم مندن سونرا نؤوبه توتان گنج آتا و قيزينا ساتاشدي. قيزجيغاز کاسانين يانينا دۆزۆلمۆش پليتکا¹ شوکولات‌لارا أل اۇزاديب، “بۇندان ايسته‌ييرم” دئينده​، آتانين جاوابي حاضير ايدي: “پۇلۇم يوخدۇ“. 
آتا ألينده بير قۇتۇ پئچئنيئ² تۇتمۇشدۇ. 
– بۇيۇرۇن، کئچين، منده أرزاق‌لار چوخدو – اونلاري ايره‌لي بۇراخماق اۆچۆن کنارا چکيلديم. 
کيشي نزاکتله گۆلۆمسه‌دي: 
– يوخ، من گؤزله‌يه​رم. 
ايصرار ائله‌ديم: 
– خاهيش ائديرم بۇيۇرۇن. 
او، بير آز سيخيلان کيمي اولدۇ، تشککۆر ائده‌رک قيزيني دا دارتيب قاباغا کئچدي. 
يئنه سَبَده طرف اَييلمک ايسته‌ييرديم کي، بۇ دفعه گؤزۆم باشقا آليجيـيا ساتاشدي. اورتا ياشلي، آزجا ساريشين، اورتا بويلۇ کيشييـدي. ألينده بير شۆشه سۇ واردي. 
غئيري-ايختيياري ديللنـديم: 
– حتّا سيز ده بۇيۇرا بيلرسيز. 
سَسيمـده گۆجله سئزيله‌جک کينايه‌مي آنجاق اؤزۆم دۇيدۇم. 
– نئجه​؟ – او، آزجا ديکسيندي. 
اونۇ فيکريندن آييرميشديم. 
– يانی نؤوبه‌مي سيزه وئريرم. 
– چوخ ساغ اولۇن. 
او شۆشه‌ني ساتيجيـيا وئردي، چؤنۆب مئهريبانليق’لا منه باخيب، يئنه “چوخ ساغ اولۇن” دئدي. 
ايندي فيکير وئرديم، گؤزلرينين رنگي ياشيلي-قهوه​اي ايدي. چوخ دا ياراشيقلييدي. ائله بيل، 1960-جي ايللر فرانسيز مئلودرام‌لاريندان گلميشدي. پۇلۇنۇ اؤده‌ييب ساتيجيـيا تشککۆر ائله‌دي، يئنه منه باخيب خَفيف تبسّوم’له “ساغ اولۇن، خانيم” دئدي. 
يۆنگۆلجه باشيمي ترپه‌ديب، اونۇ سويۇق تبسّومله يولا سالديم. 
کاسايا پۇلۇ اؤده‌يندن سونرا اؤزۆمـدن آسيلي اولمادان گؤزۆم اونۇ آختاردي. عاغليما گلدي کي، بلکه تيجارت مرکزينده‌کي کافه​لردن بيرينده اولار. ياخينليقداکي کافه​لره گؤز گزديرديم، يوخۇيدۇ. 
“بلکه ايکينجي قاتا چيخيب، يوخ، اورا گئتمه‌يه هَوَ‌سـيم يوخدۇ.” 
اۆمیدسيزجه چيخيش قاپيسيـنا گئدنده اونۇ بانکوماتين³ قارشيسيندا دايانان گؤردۆم. همين آن چوخ وئجـسيز ايديم، بۆتۆن دۆنياني آياقلاريمين آلتيندا حيس ائديرديم. ايندي بورا تئرورچۇ دا گلسه​، او آني ساکيت، سويۇق‌قانلي قارشيلاياجاغيمدان أمين ایديم. 
– واختينيز وارسا، سيزي قهوه‌يه دعوت ائديرم. 
گؤزلريني بانکوماتـدان آييريب قارشيسيندا مني گؤرنده اؤزۆنۆ ايتيردي. 
– آنلاماديم. 
بير آز اؤزۆمه اينام حيسّـيم لاخلاسا دا تئز توپارلانديم. سَسيمه اينجه‌ليک، کۆبارليق قاتاراق قطعيیت’له دئديم: 
– یانی واختينيز وارسا، چاي يا قهوه ايچه بيلريک. 
او، نه باش وئرديگيني هله آنلاميردي. 
– من دعوت ائديرم – دئديم 
تعجّۆبـۆ يۇمۇشاق تبسّومله عوضلندي، آما سَسينده ترددۆد واردي: 
– اولار، البتته. 
بيرينجي مرتبه‌ده‌کي خۇدماني کافه​يه کيمي سَس‌سيزجه گئتديک. صؤحبته نئجه باشلاياجاغيمي دۆشۆنۆردۆم. 
اورتاداکي ماسا بوش ايدي. 
– چاي دا اولۇر بۇردا. 
– دۆزۆ، قهوه سئون دئييلم، آما ايچرم سيزينله. 
– کاپوچينو، آمئريکانو، لاتتئ، تۆرک قهوه‌سي… 
– کاپوچينو. 
چانتامي، توربامي کرئسلويا⁴ آتديم، ويترينه طرف گئدنده​: 
– بير دقيقه . ايجازه وئرين، من قوناق ائديم 
او، بۇنۇ ائله جئنتئلمن‌ليک’له​، صميميـیَت’له دئدي کي، ايمتيناع ائده بيلمه‌ديم. منه ائله گلدي کي، بئله مدني، نزاکتلي کيشي عؤمرۆنده هئچ کسين قلبيني قيرماييب. 
– من آمئريکانو ايچه​جم. 
ماسايا قاييتديم. پالتونۇ چيخاريب، تله‌سيک اؤزۆمۆ ساهمانا سالديم. ديوارداکي ايري گۆزگۆده اؤزۆمه باخديم. يوخ، پيس دئييلديم. باياق تصادۆفن رسسام دوستۇم’لا راستلاشانـدا “چوخ جاذيبه‌دار اولمۇسان، ايسپانیا قادينلارينا اوخشاييرسان، واخت ائله گل چکيم سني ” دئديگيني خاطيرلاياندا اؤزگۆوه‌نيم آرتدي. 
…بير نئچه دقيقه يدي کي، اوز-اوزه اوتروموشدوق. دينميرديک، قهوه‌دن قورتوملاييب، نه دئيه‌جگيميزي دۆشۆنۆردۆک. 
– تانيش دا اولماديق. 
ائله آديني دئمک ايسته‌ييردي کي، آز قالا قيشقيرديم. 
– يوخ، لازيم دئييل. 
پرت اولمۇشدۇ. 
اؤزۆم ده چيغيرتيمـدان اۇتانديم: 
– عۆذر ايسته‌ييرم. آدينيزي بيلمک ايستميرم، اؤز آديمي دا دئمک ايستميرم. عۇمۇميت’له​،آدلارين اهمّيیتي يوخدۇر. 
– ياخشي… پئشه​نيزي بيلمک اولار هر حالدا؟ 
عاغليما گله‌ني دئديم: 
– تاريخ مۆزه‌سينده ايشله‌ييرم 
او، جانلاندي، گۆلۆمسه‌دي: 
– نه گؤزل، تاريخچيـسيز؟ 
– هه. هرچند، کئچميشده ائشلنمکدن خوشۇم گلمير. 
– ماراغلي پئشه​نيز وار،من مۆهنديسم. 
صؤحبتيميز ياواش-ياواش آخارينا دۆشۆردۆ. او، خاريجـده شيرکت‌لردن بيرينده ايشله‌ييردي، باکيـيا واليدئين‌لري ايله يئني ايلي کئچيرمه‌يه گلميشدي. بير ساعاتدان چوخ ايدي، اوتۇرمۇشدۇق. او ايسه دانيشير، دانيشيردي. تاريخدن، سيياست دن، تئرروردان، آوروپالي دوستلاريندان، اورداکي حايات طرزيندن، آليشا بيلمه‌ديگي نسنه‌لردن…سيخيلماغا باشلاييرديم. او، فاصيله وئرن کيمي درحال دئديم: 
– گئدک؟ 
– گئديرسيز؟ نئجه ايسته​يیرسيز… 
آياغا قالخاندا: 
– سيزه بير شئي دئمک ايسته‌ييرم – دئدي. 
– بۇيۇرۇن – يئنيدن اَيلشديم. 
او، دانيشماغا چتينليک چکيردي. 
– ائشيديرم سيزي – حؤوصله​م دارالدي. 
– من… من طبيعتن قاپالي، سويۇق آدامام، اۆنسيـیته چتين گيريرم. هئچ بيلميرم، نئجه اولدۇ کي، سيزله راحات دانيشا بيلديم… آما دئمک ايسته‌ديگيم باشقادير.
مني هيجان بۆرۆدۆ، اۆره​گيمين ريتمي پوزۇلدۇ. 
– حايات يولداشيمي اؤلدۆرمۆشم. نييه​سه سيزه اعتيراف ائله​مک ايسته‌ديم بۇنۇ – او، بۇنۇ بيرنفسه دئدي. 
اؤزۆمۆ نئجه ايتيرديمسه​، هيجاندان نئجه اسمه‌جه توتدوسا چانتامي تؤکۆب تؤکۆشدۆرمه‌يه باشلاديم. اوّلجه سببـسيز يئره جۆزدانيمي قۇردالاديم، سونرا داراغيمي چيخاريب ساچلاريمي داراماغا باشلاديم. 
– ساکيت‌لَشين، تام دۆشۆندۆيۆنۆز کيمي اولماييب. تزييقـدن⁵ اذيّت چکيردي. بير دفعه ده تزييقي قالخاندا قصدن تجيلي يارديمي گئج چاغيرديم. حکيم گلنده ايش-ايشدن کئچميشدي. 
– ياني اونۇ عذابدان قۇرتاردينيز؟ 
– اونۇن عذاب‌لاري مني او قدر ده ماراقلانديرميردي. بيرليکده‌ليگيميز باشدان يانليش ايدي… منه مأيۇس اولدۇنۇز؟ 
دريندن، راحاتليقلا نفس آلديم. بلکه ده حاياتيمـدا ايلک دفعه‌يدي کي، بۇ قدر راحاتليق’لا نفس دريرديم. 
– قطعاً. من ده أريمي اؤلدۆرمه​گي دۆشۆنۆردۆم. طالع ائله گتيردي کي، قضادا اؤلدۆ. گؤرۆرسۆز، اورتاق نؤقطه‌ميز تاپيلدي. 
قهقهه‌ميزکافه​يه ياييلدي. 
هاوا قارالميشدي. ياخشي کي، ياديما دۆشدۆ. چانتامي ائشله‌ييب قۇطۇنۇ چتينليکله ده اولسا تاپديم. 
– يئني ايلينيزي تبريک ائديرم. بۇنۇ سئوگيليمه آلميشديم، بۇ گۆن گؤرۆشمه‌ليـيديک،آما اونۇن واجيب ايشي چيخدي. من ده دۆشۆندۆم کي، بۇنۇ تانيماديغيم کيشي‌يه هديه ائديم. سيزين قيسمت دير. 
او، مۆتأثّير اولمۇشدۇ. 
– چوخ ساغ اولۇن. موبايل تئلئفونۇنۇزۇ… 
– اينانين، احتيياج يوخدۇ. 
و اؤزۆمۆ قارشيما چيخان ايلک تاکسي‌يه آتديم. 

 

 

 

سئودا سۇلطانووا

 

 

 

کؤچۆرن : آیه​ان میانالی

---

 

اَتک یازی (حیکایه‌​نین سؤزلوگو)

1-کاشی

2-بیسکۇئیت

3-عابربانک

4-صندلی

5-فیشار،تانسییون

Yazını bu əlifbada oxuyun: TÜRKCƏ