گؤزلـلیک / کؤکـَلمه‌گين أن ساغلام يوللاری(1)

گؤزلـلیک / کؤکـَلمه‌گين أن ساغلام يوللاری(1)

هر زامان آريقلاما حاقّيندا وئريلـَن خبرلرين عکسينـه اولاراق، بو دفعه ساغلام شکيلـده کؤکـَلمک حاقيندا بیلگی وئره‌جه‌یيک.
قاينانـميش لوبياني زئيتون ياغی ايله يئـمک اينسانی کؤکـَلدير.
آغ کۆنجۆد ياغی و باغايارپاغی¹ سۇیۇ ايچـمک ده بۇ باخيمـدان فايدالي دير.
کؤکـَلمک اۆچۆن لازيم اولان قيدالاردان² ياغلي تویۇق، قاز و اؤردک أتی، دانا و قۇزۇ أتی، اينک و قویۇن سۆدۆ، تـَزه پئندير³ و سۆدلۆ سيـييغي⁴ گؤرسـَتمک اولار.
شيرين نار، اۆزۆم، يئميش يئـمک ده کؤکـَلمه‌يه مۆثبت تأثير گؤرسه‌دير.
أن فايدالی واسيطه‌لردن فينديق، پۆسته، قوز⁵ ايله شکر و يا بادام ایچی ايله شَکر حئساب اولۇنۇر.
کؤکـَلمک اۆچۆن شيرين و ياغلی يئـمک‌لر مصلحت گؤرۆلۆر.
او جۆمله‌دن، بیر ایستیکان قابيغلي نوخودۇ اينک سۆدۆنـده بیر گۆن ايسلادين، بۇ مۆدّتده اۆچ دفعه سۆدۆ تـَزَله‌ييب، سونرا يئـیه بیلرسینیز.
بیر ایستیکان یۇیۇلمۇش دۆیۆنۆ⁶، بیر ایستیکان دا شکر، آغ کۆنجۆد، بۇغدا و قابيغـسيز آرپا، یاریم ایستیکان بادام ايله قاتيشديريب دؤیۆب، هر گۆن اوندان 2-3 یئمک قاشیغی‌جان ايشله‌ده بیلرسینیز.

آريقـليق فيکيردن، غمـدن اولارسا یاشام طرزینی دَييشـمک، شَنـلَنـمک، خوش عطيرلر اييـله‌مک، یۇمۇشاق پالتار گئيـمک و راحات ياتاقـدا ياتماق مصلحت گؤرۆلۆر. کسکين، تۇرش و آجی يئـمک‌لردن پـَهريز⁷ ساخلاماق مۇناسيب دير. آريقلامانين سببی معده ضعيف‌لیگی، هضمين پيس اولماسی، کئيفيت‌سيز قيدا، قان آزلیغی، قارا جيـيَر و دالاغين خسته‌لیگی اولا بيلر. بۇ حالدا دئدیگیمیز سبب‌لرینی آرادان قالديرماق اۆچۆن مۆعاليجه آلماق لازيم دير.
آريقلامانين اساس سببی هضمين پوزۇلماسی دير. قيدالانما و هضم پروسئسيني نيظاملاماق اۆچۆن مئيوه-تـَره‌وَزی⁸ چوخ ايشلـَتمک، ايشتاها آچان يئمک‌لردن ايستيفاده ائتـمک، بۇنۇنلا ياناشی آچيق هاوادا گزمک، حرکت ائتـمک، ياخشی ايستيراحت ائتـمک لازيمـدير.
کؤکـَلمک اۆچۆن، سحرلر اۆزوۆم، يئميش، أنجير، نوخود، يئرکؤکۆ، توت، پئندير-چؤرک، کره‌ياغی ايله بال يئـمک فايدالی دير.

Yazını bu əlifbada oxuyun: TÜRKCƏ