یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
بیزیم گۆناه‌لار / دومان بختیاری
شهَرین اوستونه دومان قالانیب
بیر گوناه سنین دیر بیر گوناه منیم
گونشین قالاسی اوچوب تالانیب
بیر گوناه سنیندیر بیر گوناه منیم
آغاجی سویوبلار یاشیل باغچادا
گونش دوستاق اولوب اوجا تاقچادا
الیم دویون توشوب قارا بوقچا دا
بیر گوناه سنیندیر بیر گوناه منیم
سینیریق ایکیمیز اوز ایچیمیزده
قوورولور کول اولور کوز ایچیمیزده
اوزونده بوغولور سوز ایچیمیزده
بیر گوناه سنیندیر بیر گوناه منیم
یازیمیز یازیلیر قارانلیقلارا
اوز قویوب گئدیریک بیلمیرم هارا
دومانی دیلیندن آسدیلار دارا
بیر گوناه سنین دیر بیر گوناه منیم
آغلاییر ایچیمده دوشونجه لریم
دریب گوزلریمی کیمه گونده ریم
بیر بئله گوناها نئجه یول وئریم
بیر گوناه سنیندیر بیر گوناه منیم
ساچلاریم آغاردی بیر آخشام چاغی
قاپ قارا یئل اسدی یاندیردی باغی
آیریلیق دولدوردو دره نی داغی
بیر گوناه سنیندی بیر گوناه منیم
“دومان”
