من سنه حسرتم، من سنه آرزې / آیسو مختاری

من سنه حسرتم، من سنه آرزې / آیسو مختاری

هانسې اۏباداسان؟ هانسې إلده‌سن؟

کیمین اۆره‌گینده، هانسې دیلده‌سن؟

هانسې ماهنېداسان؟ هانسې تئلده‌سن؟

من سنه حسرتم، من سنه آرزې،

یۏخلوغون چئویریب إدیب تامارزې.

سنین اۆره‌گینه سېغېنمایان من

سئوگی ننّی‌سینده اۏوونمایان من

سنین خاطیرینـه تۏخونمایان من!

من سنه حسرتم، من سنه آرزې،

یۏخلوغون چئویریب إدیب تامارزې.

ایستیرم اؤزۆمۆ چایا تاپشېرام

گؤزلرین کئفله‌دیر یاپېش آشېرام

سنه سارېلمېشام، سنده یاشېرام

من سنه حسرتم، من سنه آرزې،

یۏخلوغون چئویریب إدیب تامارزې.

عطرین أل‌لریمدن، اۏتاقدان گلیر

چېخېرام یۏلاغا، یۏلاقدان گلیر

ایپیمی قېردېغېن پېچاقدان گلیر

من سنه حسرتم، من سنه آرزې،

یۏخلوغون چئویریب إدیب تامارزې.

آند اۏلسون سئوگیمیز پایا یالقېزام

سئوگی اۆره‌گینده بیر اۏووج بوزام

داغ‌لار أته‌ڲینده نانا، یارپېزام

من سنه حسرتم، من سنه آرزې،

یۏخلوغون چئویریب إدیب تامارزې.

دالغالار گؤزۆمده دالدالانېرلار

ساعات‌لار گئت به گئت سنی دانېرلار

یامان دارېخمامې، یالان سانېرلار

من سنه حسرتم، من سنه آرزې،

یۏخلوغون چئویریب إدیب تامارزې.

آغلایا-آغلایا قالمېشام یئنه

“سئوگی دَبدن دۆشۆب” دئییرلر منه

اؤزۆمۆ بیر قوجاق یئتیرسم سنه!!؟؟

من سنه حسرتم، من سنه آرزې،

یۏخلوغون چئویریب إدیب تامارزې.

اۆره‌ڲیم دَلینیب، داملایېر، دامېر

اؤزۆنده بیر داملا سئوگی ساخلامېر

قارېيېب یۏخلوغون، کؤنلۆم تۏختامېر

من سنه حسرتم، من سنه آرزې،

یۏخلوغون چئویریب إدیب تامارزې.

آیسو مختاری

بو شعرین دکلمه‌سین ائشیدین

Podcast: Play in new window | Download

Yazını bu əlifbada oxuyun: TÜRKCƏ