سَحَر قاچېشېنـا آج، يۏخسا تۏخ چېخمالې؟
بوتون تمرین‌لرده ماکسيموم فايدانی ألده ائتمک و تمرین مودّتينـده گوجون قورونماسی اوچون ووجودون ائنئرژی‌يـه احتيياجی واردير. بونون’لا برابر تمرینـدن قاباق داها چوخ يئمک يئمه، سينديريم(هاضمه) سيستئمينين موتمادی ايشله‌مه‌سينه سبب اولاراق ناراحات‌ليق وئره بيلر.
آج قارينا باشلامايين
بوتون گئجه آج قالديغينيز اوچون سحر تمرینینـدن قاباق قان شکرينين نيظاملانماسی اوچون بير شئی يئمه‌لی‌سينيز. نورمال حالـدا سحر يئمـَگی يئمه‌سـه‌نيز ده، تمرینـدن قاباق موطلق يئمک يئمه‌لی‌سينيز.
چوخ يئمک يئديکـدن سونرا تمرین ائتمک اوچون 3-4 ساعات گؤزله‌یين
اگر سحر يئمـَگينـده چوخ يئدييسـه‌نيز، يئمکـده آلديغينيز ياغ و پروتئين‌لری هضم ائتمک اوچون زامانا احتيياجينيز اولاجاقـدير. سحر يوروشونـدن قاباق خفيف بير يئيـه‌جکلر يئيين، بؤيوک سحر يئمـَگينی تمرین‌دن سونرايا ساخلاماق داها فايدالی اولاجاقـدير. اگر تمرینـدن قاباق چوخ يئمک يئسـه‌نيز،تمرین آراسیندا عضُله‌لره گئتمه‌سی لازيم اولان قان هضمه کؤمک ائتمک اوزره معده‌يه پومپالاناجاقدير. بونا گؤره عضُله‌لرينيزين بوتون گوجو ايله ايشله‌مه‌سينی ايسته‌ييرسينيزسه تمرینـدن قاباق معده‌نيزی حددن چوخ دولدورمايين.
تمرینـدن 1-3 ساعات قاباق کيچيک بير پای يئيين
اگر سحر يئمـَگينـده خفيف و آز ياغلی قيدالار ايستيفاده ائتسـه‌نيز 1-3 ساعات ايچينـده راحات شکيلـده مشق ائده بيلير و معده‌نيزی اینجیت‌مزدن کالوری‌لردن فايدالانا بيلرسينيز.
تمرینـدن 30-90 دقيقه قاباق کربوهيدرات ترکيب‌لی بير آرا پايی يئيين
اگر تمرینـه آز قالميش بير شئی يئمک ايسترسه‌نيز، تئز هضم ائديله بيلن کربوهيدرات ترکيب‌لی کيچيک آرا پای‌لاری يئيه بيلرسينيز. موز، آز ياغلی سود-قاتیق کيمی قيدالار و ايچگی‌لری راحاتليق’لا ايستيفاده ائده بيلرسينيز.
سيزين اوچون اويغون اولانی تاپماق اوچون فرقلی شئی‌لر سينايين
تمرینـدن اؤنجـه يئمک يئمک و يا يئمه‌مک اينسان‌لارين اوزَرينـده فرقلی تأثيرلر گؤرسـه‌ده بيلير. نورمال واخت سيزه اینجیتمه‌ین قيدالار تمرین اؤنجـه‌سی ايستيفاده ائتديگينيزده بولانتی و باشقا شيکايت‌لره سبب اولا بيلر. سيزه أن اويغونونو تاپماق اوچون تمرینـدن قاباق فرقلی يئمک آلتئرناتيولری سينايا بيلرسينيز.
چئویرن: آیهان میانالی
Yazını bu əlifbada oxuyun: TÜRKCƏ
