یئنی یازې‌لار / Yeni Yazılar
آنا صفحه Ana Səhifə / ادبیات / آتـاما بنزه‌ین اویونجاق / گۆن‌آی نریمان (حیکایه)

آتـاما بنزه‌ین اویونجاق / گۆن‌آی نریمان (حیکایه)

آتـاما بنزه‌ین اویونجاق

آتـاما بنزه‌ین اویونجاق / گۆن‌آی نریمان (حیکایه)

آرامیزدان کؤچوب گئدن آتـالارین خاطیرینه…

گونش اوفوق‌دان بويلاندی، اونون آل شفق‌لری يئرده‌کی قارين اوزرينه سپلندی. ساکيت بير قيش سحری ايدی. بو ساکيتليک او ساکيتليکلره بنزه‌ميردی. سانکی فلاکتدن اؤنجه‌کی ساکيتليگی خاطيرلاديردی.
او گون لالـه‌نين دوغوم گونو ايدی. بئش ايلی تامام اولوردو اونون دونيايا گؤز آچماسينين. دوغوم گونونون نه اولدوغونو آنلاميردی، سادجـه او بيليردی کی او گون هامی اونا هديـه‌لر آلاجاق. لالـه او قدر سئوينيردی کی، سئوينجيندن باخيشلاريندان سئوگی داميردی. گاه مطبخـده قيزی اوچون کئیک پيشيرن آناسی گولنازين، گاه دا يئمک حاضيرلايان ننـه‌سی پری‌نين يانينا قاچيردی. آناسينين پيشيره‌جگی کئیکین حاضير اولماسينی دؤرد گؤز’له گؤزله‌ييردی. آتاسی ساکيت ايسه شنبه گونونو فورصت بيليب، دوست‌لاری’لا ايستيراحت ائتمک اوچون چيخميشدی ائودن.
هاوا قارالانـدا ساکيت ائوه گلدی. آياق‌قابی‌لارينی سويونوب ائوه کئچمک ايسته‌ينـده قيزي قاچا-قاچا اونون اوستونه آتيلدی. آتاسينين أل‌لرينی بوش گؤروب دوداق‌لارينی بوزدو. ميزيلدانا-ميزيلدانا سؤزه باشلادی:
-آتا، سن منه سؤز وئرميشدين کی، منه دوغوم گونومـده بؤيوک اويونجاق آلاجاقسان. باخ، منيم دوغوم گونومدو، آنام دا منيم اچون کئیک پيشيريب سوفـره‌نی حاضيرلاييب. ننم ده دادلی يئمک‌لر پيشيريب. ايندی بيزه چوخلو آدام‌لار گلـه‌جک، منه هديـه‌لر آلاجاقلار. آما سن منيم اويونجاغيمی آلماميسان.
قيزينين بو سؤزلرينـدن سونرا ساکيت نه ائـده‌جَگينی بيلمه‌دی، بوغازينـدان آچديغی لئچـه‌گی يئنيـدن بوغازينا دولاييب ائودن چيخدی. پيلله‌کان‌لاری دوشرکن قيزينا نئجه بير هديـه آلاجاغينی دوشونوردو. آخشام اولدوغو اوچون ياخينليقداکی هديه دوکان‌لاری باغلی ايدی. ائوه يئنيـدن ألی‌بوش دؤنمک قورخوسو ساکيتی قورخودوردو. هاردان اولورسا-اولسون، موطلق قيزينا هديـه آلماليی ايدی. دوکان سوروشا-سوروشا ائـودن خئیـلک اوزاقلاشدی. بؤيوک هديه دوکانی تاپيب لالـه‌يه گؤزل بير گلينجيک آلدی. گلينجيگی گؤتوروب سئوينجک دوکانـدان چيخدی، ايکی آدديم آتماميش صدف بويـدا دمير پارچاسی اونون سينه‌سينی دليب کئچـدی. اونون گؤزونـده دونيـا، دونيـاليقدان چيخدی.
-قيزيم، قيزيم دئيـه-دئيـه يئره ييخيلدی.
بير نئچـه ساعات کئچدی، لالـه صبيرسيزليک’له آتاسينين گلمه‌سينی گؤزله‌ييردی. آتاسينين گئديشينـدن آنلادی کی، اونا هديـه آلماق اوچون گئتـدی. گؤزو قاپيـدا ايدی. تئز-تئز قاپی دؤيولوردو، گلنلرين هئچ بيری گؤزله‌ديگی دئييلدی. قوهوم-یاخین‌لار هاميسی گلميشدی. چوخلو هديـه‌لر آلميشديلار لالـه‌يه، او ايسه هئچ بيرينی سانکی گؤرمورموش کيمی گؤزونو قاپیـيا زيللـه‌ميشدی. قوناق‌لار ساکيتی سوروشدوقجـا پری ننـه دئيينمـه‌گه بـاشلادی:
– آی اوغول، سن بيليرسن کی، بو گون قوناغيميز اولاجاق. گل چيخ دا… پری ننـه دئيينديکجـه لالـه ده سئوينج’لـه قيشقيريردی:
– آتـام منه اويونجاق آلماغا گئديب، ايندی گلـه‌جک.
بير ساعات دا کئچـدی. ساکيتين ائـوه قاييدان يول‌لارينـا چؤزولمز دويون دوشموشدو. لالـه‌نين معصوم بـاخيشلار’لا قاپيـيا زيللـه‌نن گؤزلری بئلـه او دويونو آچا بيلمه‌دی.
بير طرفـده گولنـاز، بير طرفـده پری ننـه دوداق‌آلتی دئيينيردی:
– عاييب دئييل، ائـو يييـه‌سی ائـوده يوخ. قوناغا قارشی ديقّتلی اولان ساکيتـدن بو جور حؤرمت‌سيزليگی هئچ کيم گؤزلـه‌ميردی.
قـاپی دؤيولدو. لالـه “آتـام دير” دئييب، قـاپينی آچـدی. ائـوه قيرميزيـيا بوکولموش بؤيوک بير هديـه داخيل اولـدو. قوناق‌لار بير-بيرينه دَيـدی، پری ننـه بير طرف، گولنـاز دا او بيری طرفـه ييخيلـدی. لالـه ايسه هر شئيـدن خبرسيز هديـه‌نين سئوينجينی يـاشاييردی. او، هلـه بو جور بؤيوک هديـه گؤرمـه‌ميشدی. هر کس چاليشيردی کی، سوست اولموش پری ننـه‌نی و گولنـازی آييلتـسين. لالـه سس‌سيزجـه گليب هديـه‌سينی آچـدی، سئوينجک قيشقيردی:
– آنـا، آنـا آتـام منـه اؤزونـه بنزه‌ين بؤيوک اویونجاق آليب کی، او ائـوده اولمايانـدا من داريخمـاييم. باخ ننـه، آتـام ائـوده اولماياندا من اونون’لا اويناياجـام.
ايـلاهی، بو منظره جهننمين هانسی قـاتيندان گؤرونتو ايدی؟
قوناق‌لار لالـه‌نی سئويملی هديـه‌سيندن اوزاقلاشديرديلار بيرتهر. باشينی قاتيب، ياتيرتـديلار.
نهايت، سحر آچيلدی، ساکيتی دوننکی گونون ساکيتليگينی پوزان آهنگ‌لی سس‌لر’له يولا سالماق زامانی گلدی.
لالـه: – “هديـه‌می آپارمايين، اونو منه آتـام آليب. آتـام گلن کيمی دئيـه‌جم کی، منـه آلديغين هديـه‌نی عمی‌لر أليمـدن آلـدی. هديـه‌می آپـارمايين، او آتـامين منه دوغوم گونو هديـه‌سی‌دی…”

 

یازار: گۆن‌آی نریمانگونـای نریمان

کؤچورن: آیهان میانالی

کؤچورن: آیهان میانالی

Yazını bu əlifbada oxuyun: TÜRKCƏ

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

Leyli Xudayi - YeniQapi.com--

دومانلې مکتوب‌لار (1) / لیلی خدایی (اینجه أدبیات)

دومانلې مکتوب‌لار (1) / لیلی خدایی (اینجه أدبیات) نه یۏل، نه یوخو. نه چېراق، نه …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *