دۆنيادان دۏيموش آداما / سئوینج إل‌سئور (شعر)

دۆنيادان دۏيموش آداما / سئوینج إل‌سئور (شعر)

داها کيمسه‌دن حؤرمت گؤزله‌مـه‌ينده
داها هئچ کيمه حؤرمت إله‌مـه‌ينده
هئچ کيمدن سئوگی اومماياندا
هئچ کيمی سئوه بيلمه‌ينـده
اؤزۆنۆ دلی يئل‌لره تسليم إله‌ينده
سامان چؤپۆ
باغچاداکې اۏيوق کيمی
گاه سرخۏش، گاه آيېق کيمی
آزادسان دئمه‌لی…
آزادسان دئمه‌لی
قۏرخمورسان اؤلۆمـدن
ايتيرمـه‌ڲه يۏخدو هئچ نـه‌يين
هئچ نه گلمير أليندن
سنی دارا چکسه‌لر ده
سۏن سؤز قۏپماز ديلينـدن
نه آمان ديلرسن
نه ألويداع سؤيلرسن
اۏ قـَدر آزادسان حتتا
اۏ قـَدر

آللاهدان قۏرخون يۏخدو
بنـده‌دن هۆرکۆن
سئوگی حيس إلـه‌ميرسن
نيفرت دئسَم
اۏ دا يۏخدو
جهنّم ناغېل کيمی
جنّته گۆلۆرسن‌سه
جنّتی هاوايی وئـره‌لر
ايسته‌ميرسن‌سه
أبدی اۏلان هر شئيـه
داییما يانماغا محکوم گۆنَشه يازېغېن گليرسه
گۆنش إلـه جهنّمـده‌دی‌سه سنـه گؤره
آزادسان
اؤلۆم تۆکۆنۆ ده ترپه‌ده بيلمز
اۆرَک-اۆرَک دؤڲر قاپېنې
ايچه‌ری گيرمَزدن قاباق
کانداردا عوذر ايستـه‌ير
مۆوققتی ناراحات‌لېغا گؤره…

کاندار: آستانا

Yazını bu əlifbada oxuyun: TÜRKCƏ