أل‌وئـردی‌نین ایلانې / سخاوت ساحیل (حیکایه)
حیکایه‌نین دیلی گئرچک و آجی‌دیر؛ أصلین‌ده رئال‌دیر، رئــــــال.
بو دیلی سئومه‌ین اۏخوماسین!
آیهان میانالی
قادين صاحيب اۏلدوغو، قازانديغی شئيی پايلاشماق گۆجۆنده دَگيل.
زيقمۏند فرئيد
أری نه قازاندی، نه قازانمادی گۆل‌وئر‌ن-ين عئينين‌ده دَگيلييدی. هئچ واخت پال-پالتار، قير-قيزيل صؤحبتی إلـه‌مزدی. أل‌وئردی هامی‌یا أل توتوردو، نسلی-نجابتی اۏنون هاواسی‌نا اوچوردو، کيشی‌نين تک’جه آدی-سانی يۏخ، هم ده خيرتده‌گـه جن پولو-مالی وار ايدی. تۏی اۏلوردو أل‌وئردی، وای اۏلوردو أل‌وئردی –قۏهوم-یاخینین خئيری-شرّی اۏنون چيگين‌لرين‌ده ايدی. حاتم ساياق سخاوت‌لی ايدی. آرواد دئييلن کس بير دفعه آغزی‌نی آچمازدی کی، آی کيشی، أل چک بو یاخشی‌لیق‌دان، أل چک اۏنا-بونا گؤروم-باخيم إله‌مک‌دن. ظاليم قيزی إله بيل أل‌وئردی‌نين آروادی دَگيلیدی، ساخلاديغی ايدی، ميقّ إلـه‌ييب سسی‌نی چيخارمازدی.
آخشام اۏلدو مو، والسّلام، گول‌وئـرن‌ين باشی‌نا يئکه بير داش دوشوردو؛ گؤزو قاليردی قاپی‌دا. بير ساعات کئچيردی، ايکی ساعات کئچيردی، أری گلمک بيلميردی کی، بيلميردی. گؤيوم-گؤيوم گؤينه‌ييردی ايچی، دئييردی گؤره‌سن أری ايندی هانسی’سا سۏنادا، هانسی’سا رئستوران‌دا سوتول-موتول قيزلار’لا واختی‌نی کئچيردير. اۏ ساعات گؤزونون قاباغی‌نا أری‌نين شاهمار ايلانی گليردی. دوشوننده کی، ايندی اۏنون شاهماری اؤزگه يووادا دينجه‌لير، سرينله‌نير، اؤز زهرينی کيمين‌سه دردی‌نه درمان وئرير، ايچين-ايچين قۏورولوردو، توستوسوز، دومان‌سيز آليشيب يانيردی…
دونيا مالين‌دا گؤزو يۏخويدو، أری‌نين پولونو، واری‌نی هامی‌يا وئرمـه‌گه حاضير ايدی. هئچ کيمه وئرمک ايستمه‌ديگی، بؤلوشه بيلمه‌ديگی يئگانه شئی أری‌نين ايلانی ايدی! اۏنو هامی‌يا قيزيرقالانيردی.
گول‌وئـرن اوشاق کيمی تئز آلدانان ایدی، اؤز تسلّی‌سی‌نه اؤزو ده اينانيردی – دئييردی نه اۏلايدی مؤعجيزه باش وئرَيـدی، أريمين ايلانی آچيليب-ييغيلان اۏلايدی، هَمَشه اؤزوم’له گزديررديم، لازيم اۏلاندا يئری‌نه قۏشارديم، اۏلمايان‌دا چيخاريب قۏيارديم بانکانين ايچی‌نه. تا بير ده اۏنون دردی‌نی چکمزديم، قيسقانمازديم، اوره‌گيم ده راحات اۏلاردی.
أل‌وئردی يايی-قيشی چيلپاق ياتيردی، يئری‌نه گيرنـده تی‌شئرتی‌نی ده سۏيونوب آتيردی، آزارتی بئله ايدی ظاليم اۏغلونون. اوشوموردو، يۏرقان‌دان، پتودان هئچ نه اؤرتموردو اوستونه، ائله‌جن، لوت-آنابولبول تيرره‌نيردی يئری‌نه…
آرواد بونا عادت إلـه‌سه ده، ديشی باغيرساغی‌نی کسيردی، شورو-شوبهه‌سی بوتون عؤمرونو زَهَر إلـه‌ميشدی، دی گل کی، عاييب إله‌ييردی، جينقيری‌نی دا چيخاردا بيلميردی.
…گول‌وئـرن اوياناندا هاوا عمل‌لی-باش‌لی ايشيق‌لانميش‌دی، يوخودان دۏيماق نـه‌دی بيلمه‌يـَن أل‌وئردی تيسّ ووروب ياتيردی. أن چۏخ دا سود‌گون‌لری(یکشنبه) گون‌اۏرتاياجان ياتماغين آلیشقانی ایدی. برک ياتيردی، خۏرولداما’سا دا ايلان کيمی فيسيلداييردی. خويونا-خاصيتی‌نه تانیش ایدی آروادی – جينله‌مه‌سی توتاندا اۏنو خيشداماغی‌نی، آلکاش‌ليغی‌نی، سؤيوشجول اۏلماغی‌نی، دئديگيم کيمی ياتاندا ايلان کيمی فيسيلداماغی‌نی حالال-خۏشودور دئييب باغيشلاييردی. باغيشلاماديغی بير’جه شئی واردی – أل‌وئردی‌نين ايلانی…
هميشه‌کی تکی، نه ساعاتا باخدی، نه پنجره‌يه، گؤزونو آچار-آچماز، قورد قوزويا باخان کيمی، حريص‌ليک’له أری‌نين ايلانی‌نا باخدی. ايلان دا کی، نه ايلان، دئيَردين قاباغين‌دا شاهمار شاهه قالخيب. اوره‌گی‌نی يئنه قارا شوبهه‌لر ديددی؛ إله بيليردی أری يوخودا لچرين بيری‌نی آلتی‌نا ساليب کئف چکير، اۏنا گؤره ده ايلانی ديک-ديرينگه قاليب.
کؤینه‌گی‌‌نين ياخاسی‌نی حيرص’له دوگمه‌له‌يه-دوگمه‌له‌يه ياتاق اۏتاغی‌نين قاپی‌سی‌نی چيرپيب چيخدی.
مطبخ‌دن گلن قاب-قاجاق دانقيلتی‌سی أل‌وئـردی‌نی تعطیل گونونون شيرين يوخوسون‌دان إلـه‌دی…
یازار: سخاوت ساحیل
کؤچورن: آیهان میانالی
Yazını bu əlifbada oxuyun: TÜRKCƏ
بَنزَرگه‌لر / Bənzərgələr
ایکی یاشلې کؤرپهنین آجې حیکایهسی / واریث یۏلچویئو…
یالقېز إو / سحر روحی (حیکایه)
بوز / اومان میانالې (حیکایه)
جزا / سئوینج إلسئور (حیکایه)
ایلان / رحیم علییئو (حیکایه)
قار دنهلری / آیناز بزرگان (حیکایه)
سۏیوق أللر / ناییله علییئوا (حیکایه)
زلزله / جلیل مممدقولوزاده (حیکایه)
قایېدېش / إسمیرا حۆسئینلی (حیکایه)
