بیر آنی-بیر حیکایه / آجی‌لی-شیرین‌لی بیر خاطره / ذکیه ذولفقاری

بیر آنی-بیر حیکایه / آجی‌لی-شیرین‌لی بیر خاطره / ذکیه ذولفقاری

ایکی ایل اؤنجه بیر خسته‌لیک‌دن دولایی، تهرانـدا عملیات اولدوم. موعالجه‌نین دوامینا حکیم‌لرین مصلحتی ایله تورکیه‌یه گئتملی اولدوم.
تبریزدن ایزمیره دیرک گئدیش اوچاق اولمادیغیندان بیز رازی سرحدیندن دولموشلارلا هاوا آلانینا گئدیب، اورادان اوچاق’لا ایزمیره ساری یوللاناجاقدیق . تلم‌تلسیک اوغلوم’لا بلیط زاد ألده إدیب، دؤهتور سندلری’له یولا دوشدوک. دؤهتورون تاپشیریغی ایلا معالجه تئز باشلانمالی ایدی.
سرحدی کئچیب دولموشـدا اوتوردوق. دولموشـدا مسافر آز اولدوغوندا چوخلو گؤزله‌مه‌لی اولدوق. بیزی استرس-اضطراب بورویوب کی اوچاغی قاچیراجاییق. نهایت دولموش دولوب یوللاندی. اوغلوم ائله ماشیندا جئب تلفونویلا بلیط‌لری اوکی ائلدی . هاوا آلانینـدا دوشوب بیرینجی قاپیـدان ایچری کئچدیمیزده اوغلوم باخیب گؤردو شالواری‌نین دالی جیبیندن پول کیفینـده اولان 2000 دلار ، اؤیرنجی کارتی و چوخلو اؤنملی سندلری چالیبلار. شانسیـدان اوچاغین گئجیشمه‌سی واریمیش. اوغلوم 15 دیقه گئجیشمه‌نی بیر ساهات إشیدینجه منه دئدی: ذکی سن چمدان‌لاری وئر یوکه من گئدیم کیفین دالینجا.
من آپاریب چمدان‌لاری احسانین پاسپورتوی’لا وئردیم دئدیم ایندی گلر اوغلوم…آما اوغلومدان خبر یوخودو هله…
ایکینجی سالونا مسافرلری چاغیردیلار. من اضطراب’لا احسانی گؤزلوردوم؛ موبایل ألیمـده اونا تیلفونلاشیردیم . چوخ تأسوفله کیفی تاپانمادیغینی دئدی. بویاندان دا
پئیجدن بیزی سس‌لیرلر. ناچار ایکینجی سالونا کئچیب اورادا احسانی گؤزلورم دئدیم. مسافیرلرین هامیسی سون قاپیـدان کئچیب اوچاغا گئتدیلر. اوغلوم تیلفوندا دئییردی اون دیقه یه چاتیرام. مامور دئییردی اوچاغین دا سون دیقه گؤزلمه‌سی‌دیر … . مامورلار منه دئییردیلر تعجیلی کئچ اوتور. اوغلومون باشینا گلنی دئیب موبایلی وئردیم مامورا احسان’لا دانیشدی دئدی : اوچاق اوچور بوندان آرتیق گؤزله‌ینمه‌ریک.!!!
گوزونوز یامان گون گؤرمسین بو طرفدن مامور منی تلسدیریر گئت اوچاغا اوغلون او بیری اوچاق’لا گلر، او یاندان احسان تیلفوندا قیشقیریر ذکی گئتمه منیم پولوم یوخدو… . دوز فیلیم‌لر کیمی… مامور یاپیشیب ألیمدن چکیر اوچاغا ألینـده کی سیم‌سیز گوشودان دا اونو تلسدیریرلر مسافر گلسین قاپی‌لار باغلانیر. من یازیق قالمیشدیم ایکی یولون آیریمیندا. بیر یاندان چمدان‌لار و منیم دؤهتور سندلریم اوچاغلا ایزمیره گئدیردی دیگر یاندان اوغلوم پول‌سوز-پاراسیز غریب و تهلوکه‌لی شهرده قالیردی. من گئتمه‌مگه قرار وئردیم. آما او جاوان و گؤزل مامور منه دئدی سن بلیط پول‌لارینی وئر منه اوغلون گلسه وئریم او بیرسی اوچاق’لا گلسین. اورگیم اوشندی اول، آما ریسک ائله‌ییب بیر آز لیره اونا وئریب آدین سوروشوب چوخ پیس حالـدا ایکی لپتاپ چیگینیمده نئچه قیویر-زیویر ألیمده اوچاغا طرف یولادوشدوم. من آیاغیمی قویدوم ایچری قاپی‌لار باغلاندی. من یئریمـده اوتوردوغومدا احسان زنگ وردو هارداسان من یئتیردیم اؤزومو… آما تاسوفله قاپی‌لار باغلانمیشدی و من او قدر یوک و دونیا قدر پئشمانلیق’لا ایزمیره طرف اوچوردوم. بو فیکر کی او مامور پول‌لاری احسانا وئرمییه‌جک اودا آوارا-سرگردان وان دا قالاجاق، آز قالا قلبیم دایاندیریردی. ایکی ساهات زامان منه شکنجه ایله ایل‌لر سوردو سانکی. ایلگینج یئری بویودو اوشاق‌لارین یئنی ائولری‌نین آدرسینی ده بیلمیردیم.
ایزمیرده اوچاقدان إندیم احسانا زنگ آچدیم اولاشمادیغیمـدا دونیا باشیما فیرلاندی. اؤزومو بیر تهر چمدان‌لاری آلان سالونا چاتدیردیم. گلینیم زنگلشدی : آنا بوردایام احساندا آختارما گلیر استانبولـدا دیر.گلینیمین او سسی ایندی ده بیر خوش آواز تک قولاغیمـدا دیر!!! او آن سئوینجیمی وصف إده بیلمرم فقط آنا اولانلار منی آنلارلار یقین.
احسان سونرا تعریفلدی: او مامور اؤزو منی آراییب تاپدی. سن وئرن پول‌لار بلیطه یئتمدی مامور چوخ رضایت’له 50 لئره جیبینـدن چیخاریب منه وئردی!!!!.
دونیادا بیر اؤیرنجی‌نین پول‌لارینی چالان آلچاق‌لار وارسا نه یاخشی اونون کنارینـدا او مامور تک ملک‌لر ده یئر اوزونـده چوخدور؛ یوخسا یاشاماق ایمکان‌سیز اولاردی.

یازار : ذکیه ذولفقاری

نفیس سینافر

Yazını bu əlifbada oxuyun: TÜRKCƏ