اۏروجلوق آنې‌لارې / ذکیه ذولفقاری (حیکایه)

اۏروجلوق آنې‌لارې / ذکیه ذولفقاری (حیکایه)

بالاجا رادیودان سحر دوعاسی اوخونور: آللهم انی اسئلک…
ائوین ساغ طرفینـده بیرتیرمه سوزنی’له اورتولموش میزین اوستونـده ، نفت‌لی ساماوار سیزیلداییر. اؤنونده آلمیوندان اولان بیر مژمئیده دؤرد دانا اینجه بئل ایستکان-نعلبکی تمیز دستمالا اؤرتولوب. آنا مطبخـده یئمک‌لری اوجاق اوسته قیزدیریر.
آتا سسله‌نیر:
خانیم او قیزی اویات گلسین بئواختیـا اذانا بیر شئی قالمادی.
-قیزیم بابان دئییر دور گل بئواختی.

قیز گؤزون آچدی
– أه أه …آی آنا بیلیرسن منیم آی باشیمـدی اوروج اولمویاجام. سانجیدان گئجه‌نی یاتمامیشام قوی یاتییم دا…
– من‌لیک اولسا یات .آما من باباوا نه دئییم آخی دئییم قیزین پریوددو؟
-هن دئـنه نولار؟ بونون هاراسی پیسدی؟ طبیعی بیر شئیدی.
– قیز آبیر-حیان اولسون اوزون سویو لاپ تؤکولوب ها… هئی دئیرم او ماندانایلا گزمه ! کیمدی سوزه باخان!آری ویزیلدیر قولاندا…من دئیه بیلمرم اصلا. أل-آیاغیم دگمه‌میش سنده دیک قالخ گل.
آنا حیرصیله قاپینی چیرپدی گئتدی.قیزین بئینینـده طوفان قوپدو. یووووخ بابا بیلسه اونون اوزونه نئجه باخارام…

– یاتاقـدان قالخیب حالسیز-حالسیز أل اوزون یومامیش سفره باشینا گلیب سلام وئریب اوتوردو.آغیری کسیجی‌نین أثری گئتمیشدی سانجی‌لار اونو آماندان سالیردی. ایلان تکین قیوریلیب آچیلیردی.گاه باغداشی قوروب گاهدان دیزه کؤچوردو…
آتاسی بو حالی گؤرونجه :
قیزیم نولوب؟
– آناسی درهول جواب وئردی:
بیر شئی دگیل سویوخ وروب قولونج اولوب.
بلی بابا قولونجام احتمالا.
– تئز یئ گئت یات اوستووو باستیر دوزلرسن! گوناه بو مامانـدادی با قیزیشیر هر یئری آچیق قویور.
نئچه قاشیق دویونو هؤرپولدتدی دوردو آیاغا. أذان باشلامیشدی دای.گئدیب دستماز آلیب آتاسی نین گؤزون قاباندا چادرانی باشینا آتیب أگیل-دوزل ائلییب ،تئز قاچیب گیردی یئرینه…
ناهار واختیدی آتاسی ایشـدن گلن زامانیدی .قانامادان ضعف گلیردی و سانجیـدان دا معده‌سی آجیشیردی. گئدیب سویودوجونو آچدی. خامالی شیرنی‌لر بونا گؤز آغاردیردی بیرین گؤتوردو ائله بوتونلوک’له باسدی آغزینا .سویودوجون قاپی‌سینی اورتدو چؤندویونده آتاسی دورموشدو مطبخین قاپیسنـدا گولومسه‌یرک اونا باخیردی…

ذکیه ذولفقاری

حاضیرلایان: نفیس سینافر

Yazını bu əlifbada oxuyun: TÜRKCƏ