مارالېن جئیران قۏناغې / محمد حسن‌نژاد
عزیز بالام گل یانیما گل اۆره‌گیم،
بارماق‌لاریم داریخیب ساچ‌لاریندان ساری؛
یام یاشیل داغین یاماجین‌دا بۏل اۏت‌لی، گۆللۆ اۏتلاق وار ايدی کندین آداخلی چۏبانی هر گۆن قۏیون سۆرۆسۆن اۏرا آپاریب اۏتاراردی؛ بیر کیچیک گؤزل بولاق‌لی تارلاسی دا واریدی کی سویو یارغان‌لارا ساری آخاردی، دورو آخدیغی‌نـا خاطیر “آی بولاغی” آدلانمیشدی.
بو ایل تارلانین قۏناغی گۆنه‌باخان‌لار ایدیلار، یازین اۏرتا گۆن‌لری‌نین بیرینده چۏبانین مارال آدلی آداخلی‌سی ناهار ألینده یاماجا دۏغرو یولا دۆشدۆ، داغ باشی دۏلو ایدی آغ بولودلاری’لا آداخلی قیز ایسته‌ییردی سهنگ‌ینده چۏبانا سو آپارسین اۏ اۆزدن یۏلونو چئویردی تارلایا ساری کی سئرچه‌لرین قیشقیرتیسینی إشیتدی، دۆشۆندۆ هله گونه‌باخان‌لاردا تۏخوم یۏخ، بو هارای-داد نه‌دیر قوش‌لار ایچینده؟ کئچدی یارغانین یانیندان سهنگین دۏلدورسون کی گؤردۆگۆنه حئیران قالدی!
آی کیمی دورو سو قریب لیل‌‌لنمیش دی!
مارال بیردن سئرچه‌لرین قیشقیرتیسینی خاطیرلاییب، بولاغا دۏغرو تارلانین ایچینه کئچدی، اوزاق‌دان بولاغین باشیندا قارالتی گؤردۆگۆنه خاطیر قۏرخدو آما گئری گئتمک گۆجۆ یۏخويدو، إله بیل بیری مارالی ایره‌لی گئتمک اۆچۆن ایته‌لَییردی یاخینلاشاندا گؤردۆ آمان تانریم بیر یارالی جئیران، هله بۏغازدی دا!!
مارال توتولدو بیلمه‌دی نه إله‌سین، جئیران مارال‌دان قۏرخدو! قۏرخدوغونا گؤره دورماق ایسته‌ییردی…
مارال بیر حزین ماهنی زۆمزۆمه إله‌دی:
گۆلـله‌لردن یارالی
هارالی‌سان هارالی
سنه قوربان اۏلایدی
بو داغ‌لارین مارالی
جئیران سانکی ماهنی‌نین سؤزلرین دۆشۆندۆ و دۆشدۆگۆ یئرده قالدی، قیز جئیرانی تومارلایارکن ألی‌نی یارایا ساری آپاردی و تیکان‌لاری گؤتۆردۆ، وااای اۏخا توش گلیب دئییب ناراحات اۏلدو، آخی یازدا دا اۏوا چیخارلار؟ نئجه اۆره‌گیندن گلدی بۏغاز حئیوانی اۏخلویاسان؟ سنی دۆشۆنجه‌سیز اۏوچو!! مارالین یوباندیغی اۆزدن آداخلی‌سی نیگران اۏلوب، سۆرۆنۆ یاماج‌دان قایتاردی. مارال جئیرانی تومارلایارکن زینقیرۏولارین سسی‌نی إشیدیب کؤمک آلماق اۆچۆن تارلادان إشیگه قاچیب، چۏبانا یئتیرجک گؤردۆک‌لرین دانیشدی بیرلیکده جئیرانا دۏغرو گلدیلر مین گۆج ایله بیرلیکده جئیرانی داشقا کیمینه چیخاردیب اؤزلری’له آپاردیلار.
طؤوله‌ده اونا یئر حاضیرلاییب اۏت سو وئریب و یاراسی‌نـا مرحم قۏيدولار. دان یاریلانا قدر مارال جئیرانی’لا طؤوله‌ده اۏتورموشدو کی جئیرانین حالی‌نین دَگیشیلمه‌سی‌نی حیس إدیب کؤمک آلماق اۆچۆن قاچدی إشیگه، آتاسی’لا قاییداندا گؤردۆلر وااای جئیران آلا گؤز بالاسی‌نی سئوگی ایله یالاییر.
