کوهگیلویه و بویر احمدده گنجه‌یی کندلری
گنجه‌یی کندلری(گنجه‌ای بزرگ(نو)، گنجه‌ای کهنه):ایرانین گونئی‌یینـده، کُهگیلویه و بویر احمد اوستانینـدا یاشایان گنجه‌لی‌لرین یوردودور. آتالاری‌نین دئدیگینه گؤره سون یوز ایل‌لرده گنجه‌‌دن او بؤلگه‌یه کؤچوبلر. کوهگیلویه گنجه‌لی‌لری دیل‌لرینی ألدن وئریب، لور اولموشلار آما تورک کؤکنلی اولدوقلارینی اونوتماییبـلار. یاخلاشیق 300 ایل اؤنجه‌سیندن قالان بیر سندده یاسوج شهری بؤیوکلوگونده بیر بؤلگه‌نی خواجه هادی گنجه آدیندا بیر خانین آلدیغی یازیلیبدیر. سونرا لور خان‌لاری‌نین گوجلنمه‌سی ایله بو توپراق‌لاری گنجه‌لی‌لرین ألینـدن چیخاردیبلار؛ تکجه گنجه کندلری بونلارین یئیه‌لیگینده قالیبدیر. ایرانین داها گونئی‌یینه ساری گنجه‌یی شاپور و گنجه فامور کندلری ده گنجه‌لی‌لرین اوتوردوغو بؤلگه‌لردندیر.
بو بؤلگه‌لر أفشار تورک‌لرینین(گوندوزلو، أرشلو، …)أسکی یوردلاریندان دیر. ایندی کوهگیلویه و بویر احمد تورک‌لری گئنلـده اورمیه کندلرینده کوهکلانی، احمدی و بونا بنزر سوی آدلاری ایله کوهگیلویه‌لی(کوه‌گیلو) تایفالاری اوتوران کندلرده یاشاییرلار. بیر پارا یازیلاردا صفوی دؤنمینـده شاه عابباسا قارشی گلدیکلری اوچون کوهگیلویه تورک‌لرینی کؤچدوروب؛ سورگون ائتدیگی یازیلیبدیر. پیر اوبرلینگ آدینـدا یازارین کیتابینـدا بو طایفانین نادیر شاهـین اؤلوموندن سونرا اورمویا کؤچدوگونو یازیبدیر.
بو بؤلگه‌نین آدیندا”بویر”سؤزجوگو تورک”بوگر”طایفاسی‌نین آدی ایله ایلگیلی گؤرونور. بوگرلرین یوردو گئنلـده یاسوج شهری‌نین چئوره‌سینده دیر. ایندی بوگرلر قاشقایی ائلینـدن ساییلیرلار.
بؤلگه‌ده اولان تورکجه داغ-داش آدلاری بو بؤلگه‌نین أسکیـدن تورک یوردو اولدوغونون بیر باشقا قانیتی اولاراق گؤرونور: سیچانی داغی(کوه سیچانی)، تامر داغی(کوه تامر)،گنجه‌یی تنگی(تنگ گنجه‌ای)، دشت روم، کوه گؤل(اوستونده گؤل اولان بیر داغ دیر؛ لور یئرلی‌لری کوه گُل دئییرلر)، گچی(گئچی)داغی، بوراق تنگی، قره گؤل، چارتاق، گنجگان ممسنی و …
گنجه‌یی کندلرینـدن و گنجه ای نو کندینین قبیرسانلیغینـدان نئچه عکس:
نفیس سینافر
Yazını bu əlifbada oxuyun: TÜRKCƏ
