یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
بس اوندا نييه أره گئدیب‌سن؟!
جينسی سيخينتی‌لاری اولان، داها دوغروسو، واژينيزم‌دن اینجیـیَن خانیم‌لارين أن چوخ إشيت‌ديگی قينايی‌جی سورغو بودور: “إله‌يه بيلميرسن’سه، اوندا نييه أره گئديردين؟! اوتورموشدون دا آتانين إوين‌ده!”
بو سورغونو اوندان سوروشان‌لاردان خالا، یول‌داش، قونشو، قايين‌آنا و بونلارا تای اولا بیلر. اولدوغو کيمی، دوکتورلار دا لیسته‌یـه قاتيلير. سونونجونو تأسّۆف حيسّی’یله يازيرام. چۆنکی اؤزل‌جه‌سی‌نـه جينسی سورونونوز وار’سا، بيری‌نـه بو حاق‌دا دانيشماق اولدوق’جا چتين‌دير. اؤزۆمۆزۆ توپلاييب دوکتورا گئتمک ايسه داها دا چتين‌دير. نه ايله اۆزلَشه‌جه‌گيميزی قاباق‌دان بيلمريک. هله اۆسته‌ليک، تام دا جسارَتيميزی توپلاميش‌کن، دوکتوردان بئله قينايی‌جی بير قارشی‌لیق گؤردۆگۆمۆزده، اۆره‌گیمیز’له ياناشی، اینجاریمیز دا قيريلميش اولور. سيز بونا، اومودو دا آرتیرا بيلرسينيز.
بير آز بالانسی قوروماق ايسته‌ييرم. قادين‌لارين جينسی سيخينتی‌لارين‌دان يازارکن، کيشی‌لری اونوتموشام ظنّ إتمه‌گين. هر هانسی’سا بير جينسی سيخينتی ياشايان کيشی‌لر ده سانکی کيشی‌ليک‌لرين‌دن بير شئی آزالمیش کيمی حيسّ إديرلر اؤزلری‌نی. بو حاق‌دا اوزمانا باش وورماق اونلار اۆچۆن ده زامان آلير. قينانماق‌دان، دامغالانماق‌دان قورخارلار. چۆنکی اونلار دا نه ايله اۆزلَشه‌جک‌لری‌نی قاباق‌دان بيلمزلر.
بو سيرايا یاشام‌یول‌داشی‌نین جينسی سورونو اۆچۆن (قادين و يا کيشى) اوزمانا گئدن اینسان‌لاری دا آرتیرا بيليريک. أخلاقی بير يانا قوياق، فیکری و دۆشۆنجه باجاريق‌لارا بئله قارشی اولان سؤز’له اۆزله‌شيرلر (اؤرنک اۆچۆن: سن بونا نئيله‌دين کی، بو دوروما دۆشدۆ؟؛ سن اؤزۆن سورونلوسان، اونون بوينونا ييخما و بونلارا تای سؤزلر…).
اؤلکه‌ميزده هر 5 جۆتلوک‌دن 4-نۆن قارشی‌لاشديغی بعضی جينسی سورون‌لاری واردير. لاکين اونلارين سورون‌لاری‌نی حل إتمک اۆچۆن اويغون، دۆزگۆن ياناشما اولمايا بيلير. يا دا بو سورون‌لاری حل إتمک اۆچۆن کيمه باش ووراجاق‌لاری‌نی بيلمه‌يه بيلرلر. هله کی، اؤلکه‌ميزده جينسی تانیم و موعاليجه ساحه‌سی تام اينکيشاف إدیلمه‌ییب‌دیر، اوزمان‌لارین سايی‌سی اولدوق’جا آزدير. بو ساحه‌يه عاييد اولان ایستک‌لره دوکتورلار تانیش اولمايا بيلرلر. و يا دۆزگۆن تانیمی اولدوغو حال‌دا، موعاليجه‌سی اۆچۆن نه إتمه‌لی اولدوغونو بيلمه‌يه بيلر. بو حال‌لار دا خسته‌نین چاره آختاريشين‌دا، سيخينتی‌لار’لا اۆزلشمه‌گی‌نـه سبب اولور.
بۆتۆن بونلاردان يۆکۆنۆزۆ بير آز دا اولسا آزالت‌ماق اۆچۆن اوتانمازدان-سيخيلمازدان، آراشديرما روحونوزو گۆجلنديره‌رک، پارتنئرینیز’له/یاشام‌يول‌داشينيز’لا بیرلیک‌ده چيخيش يول‌لاری آختارماق فايدالی اولاجاق‌دير. جينسی سورون‌لارین حل إتمه‌گی اۆچۆن دۆزگۆن اوزمانی تاپماق نه قدر اؤنم‌لی‌دیر’سه، پارتنئرین دسته‌گی ده بير او قدر اؤنم‌لی‌دير. جۆتلۆک موعاليجه‌يه بیرلیک‌ده قاتيلديق‌لاری چاغ موعاليجه‌نين سۆره‌جی قيسّالميش اولار.
یازار: شبنم صادیق‌اووا
کؤچۆرۆب اویغونلاشدیران: آیهان میانالی
