دۆنیا / حسن دمیرچی
میللت چیغیریر تۆرکم هارای حاققیمی دانما
دؤولت باغیریر کس سسی‌وی آنلاما قانما
فرمان بوراخیر وور باتومو، ووردولار آمما
سانکی خوروزون اۆستۆنه نارین جۆجه گلمیش
دۆنیا گؤزۆن آچ‌سین کی بو میللت گۆجه گلمیش
روحوم آچیلیب لذّت آلیر إل یۆرۆشۆن‌دن
زنجیری قیران سانکی چۆرۆک تئل یۆرۆشۆن‌دن
تاریخ یارادان تبریزیمین سئل یۆرۆشۆن‌دن
گۆندۆز یۆرۆشه باشلاییب آخیر گئجه گلمیش
دۆنیا گؤزۆن آچ‌سین کی بو میللت گۆجه گلمیش
تۆرکۆن بئشیگی اورمیه طوفان قوپاریب‌دیر
تورپاق‌لاری‌نا گؤز تیکه‌نه گؤز قوپاریب‌دیر
نئعمت‌لی موغان سون سؤزۆ سؤیلر قوپاریب‌دیر
قات-قات قالانیب، دردلری چۆن دیبه گلمیش
دۆنیا گؤزۆن آچ‌سین کی بو میللت گۆجه گلمیش
دان اولدوزو تک، پارلاییر اؤلکه‌م‌ده بیر اولدوز
پاک إتمیش حلال أمدیگی‌نی سۆت آنا تومروز
قافلان سایاغی قارتال اولوب قایغی‌لی سولدوز
حاققیم تالانیب سؤیله‌یه‌رک گؤر نئجه گلمیش
دۆنیا گؤزۆن آچ‌سین کی بو میللت گۆجه گلمیش
خوی تاریخی، بیر گۆزگۆ کیمی گؤز قاباغین‌دا
یاد إل‌لری‌نی دیز چؤکۆرۆب اؤز قاباغین‌دا
زنگان دایانیب اؤن جبهه ده گؤز قاباغین‌دا
گۆج‌لر بیر اولوب، داغ کیمی گۆج.دن گۆجه گلمیش
دۆنیا گؤزۆن آچ‌سین کی بو میللت گۆجه گلمیش
إل‌لر; قوشاچای’لا مییانا های دیر هارای دیر
زونوز’لا ساراب، داش ماکی‌دا گؤر نئجه های دیر
غئیرت‌لی مرندین یۆرۆشۆ تبریزه تای دیر
إل‌لر بیر اولوب میللَته بیرلیک وجه گلمیش
دۆنیا گؤزۆن آچ‌سین کی بو میللت گۆجه گلمیش
آی آستارامیز شان‌لی فیریدون گؤز سن‌ده
قالخ أردبیله یاردیم إله، شور إله سن ده
مئشگین’له أهر قان دوغوروب‌دور بیلیسن ده
دۆشمن گیجه‌لیب اۆستۆمۆزه گیج گیجه گلمیش
دۆنیا گؤزۆن آچ‌سین کی بو میللت گۆجه گلمیش
إی علم اوجاغی، إی ماراغا حۆسنۆوه حئیران
قالخ‌دین آیاغا، غئیرتی‌وی إیله‌دین إعلان
چیخ بیر رمه ده، قایناشیری میلیونی تئهران
سانکی عرفات‌دا حاجی‌لاردیر حجه گلمیش
دۆنیا گؤزۆن آچ‌سین کی بو میللت گۆجه گلمیش
بیر عصیری‌دی کی جان وئریسن قان وئریسن قان
چاتمیش زامانی، اؤزلۆگۆنۆن سئوگیلی جانان
جننت بوجاغی، علم اوجاغی، “آذربایجان”
چوخدان‌دی زامان سن’له یامان بیر لجه گلمیش
حاققیم تالانیب سؤیله‌یه‌رک گؤر نئجه گلمیش
*دۆنیا* گؤزۆن آچ‌سین کی بو میللت گۆجه گلمیش
حسن دمیرچی
