یئنی یازې‌لار / Yeni Yazılar
آنا صفحه Ana Səhifə / ادبیات / کؤشه یازی / کیتاب‌لاریمیزی یالقیز بوراخمایاق! / آیهان میانالی

کیتاب‌لاریمیزی یالقیز بوراخمایاق! / آیهان میانالی

IMG_20181023_085838_129

کیتاب‌لاریمیزی یالقیز بوراخمایاق! / آیهان میانالی

بیر آنادان باشلایان سؤزجۆکۆيدۆ آنا دیلی، و بیر ماهنی‌نین ساز’لا کؤک‌له‌نن سئویشمه‌سی!
اینسان‌ اۏغلو اینسان‌دان سؤز گئدیر، اۏ گؤن‌دن کی باشلادی داشی-داغی قازیب سؤزلری‌نی ساخلاماغا. هله دیر اۏ ایزلر تاریخین قیزیل وارلیغی آدلانیرلار، و کئچمیش‌ده‌کی اۏلای‌لارین روایت‌چی‌سی…
ایل‌لر’جه داش‌لار-دری‌لر قازیلیب یازیلدیلار قالارقی سؤزلر’له و اینسان‌ اۏغلو یازا-یازا چاتدی کاغاذا.
کیتاب‌لار باشلادی یاشاماغا، و یاشاتدی اؤتن چاغ‌لارین کئچن دۆشۆنجه‌سین!
هر دیل وارلیغی‌نی یادداش‌لاردا ساخلاماغا چالیشدی؛ بیر سۆرۆ‌لر چۏخ، بیر سۆرۆ‌لر بیرآز، آما یازیلدی و یازیلدی سۏنون‌دا بو گۆن‌لریمیزه چاتدی.
بو سؤزلری یازماق‌’لا، کئچمیش‌ده‌کی نیسگیل‌دن سؤز آچماغا چالیشدیم؛ یاساق گۆن‌لریمیزدن، قاندان‌لی بارماق‌لارین دوستاق‌لانمیش قلم‌لرین‌دن، یادیرقانمیش بیر نئچه سۆزۆلمۆش سؤزجۆک‌دن، بؤیۆک آنا دیلیمیزدن و بو دیلین چکدیگی أسارت‌دن، کاغاذلار’لا آیری دۆشۆب، سۆرگۆن اۏلماسین‌دان سؤز آچماق ایسته‌دیم.
ایندی اۏ گۆن‌لره دۆشۆنۆب یاغیشلانیرام هردن، پاییز آخشام‌لاریم‌دا!، و آردین‌دان گۆلۆمسه‌ییب، سئوینجه دۏلور اۆره‌گیم؛ بو گۆنكۆ دوروموموزا دۆشۆنرکن.
داها آرتیق دیلیمیز یازیلیر!
داها آرتیق دیلیمیز اۏخونور!
داها آرتیق کیتاب‌لاریمیز چۏخالیر!
داها آرتیق فخر إتمک چاغی یئتیشیب!
بو کئچن اۏن-اۏن‌بئش ایل‌ده، کیتاب صنعتیمیز اۏ قدر گۆجله‌نیب کی، قارداش اؤلکه‌لریمیزه ده بو دیلین دوغرو-دۆزگۆن یازیب-یایماغی‌نی اؤرگتمک سیراسی‌نا چاتمیشیق.
کیتاب إولریمیز دۏلودور آنا دیلیمیزده یازیلان کیتاب‌لار’لا. هر شئی اۏ قدر گؤزل اۏلوب کی، اینسان‌ آز قالیر سئوینجین‌دن آغلایا!
بو اوزون یۏلون چتین باغرین‌دا چۏخ‌لاری أمک وئریب، بو بؤیۆک دیلین باشی‌نی اوجا توتماغا چالیشدیلار. چۏخ‌لاری گنج‌لیک‌لری‌نی بو یۏلا پای وئردیلر. چۏخ‌لاری وارلیق‌لارین‌دان کئچدیلر، آدلارین‌دان بیله….
بو چالیشقان وطن اۏغول‌لارین‌دان بیری‌سی، سئویم‌لی «سعید موغانلی»، إلیمیزین جانین‌دان کئچن عسگری‌ دیر!
بو اینسانین توتدوغو یۏلون‌دان و إتدیک‌لرین‌دن، بو گۆن مین‌لر’جه بارلی آغاج‌لار بیتیب، بار وئرمک‌ده دیر.
کیتاب‌لاریمیزی گۆنده‌مه گتیرن موغان ایگیدی، آتدیغی آددیم‌لار’لا، چۏخ‌لاری‌نین آیاغی‌نی بو ساحه‌یه چکدی. سئویم‌لی یاریش یارادیب، کیتاب ناشیرلریمیزین سایی‌سی‌نا آرتدی. آغیر سؤزلر آلتین‌دا، سارسیلمادی، گاه‌دان اۏتای‌دان دؤگۆلدۆ، گاه‌دان بو تای‌دان؛ آما یۏلونا داوام إتدی، دیلی‌نی سئودی، سئودیردی. کیمسه‌یه آغالیق إتمه‌ییب، بؤیۆک‌لریمیزه قوللوق، یاشیت‌ تای‌لاری‌نا دا، قارداش‌لیق إتدی، اوشاق‌لاریمیزا دا وارلیغی‌نی پای وئردی!
ایندی بیر وطن سیمگه‌سی‌نین هئیکلین‌ده گؤرۆنن سعید موغانلی، دینج اۏلماغین ساعات‌لاری‌نی إرته‌له‌ییر، و بو دینج‌لیک‌ده قارداش سایاق بۆتۆن کیتاب نشری‌نین یۏلون‌دا آددیم‌ آتان‌لارا یاردیم إدیر.
بو یۏل‌دا چۏخ‌لاری سعید موغانلی تک چالیشیب أمک وئریب‌لر؛ جان‌لارین‌دان کئچیب‌، عؤمۆرلری‌نی پای وئریب‌لر. بو بؤیۆک اینسان‌لار گؤرَولری‌نی یئری‌نه یئتیریب‌لر و سیرا یئتیشیب بؤیۆک تۆرک خالقیمیزا!
اۏ کیتاب‌لاری سئوه-سئوه آلیب، سئوینه-سئوینه اۏخوماق، بو بؤیۆک اینسان‌لارین وئردیگی أمک‌لری‌نه سایقی گؤرستمک دیر؛ اۏنلاری سئویندیرمک، اۏنلارین جانین‌دان یۏرقونلوغو چیخارتماق‌دیر!
اۏ زامان بو سیز، بو دا بؤیۆک تبریزیمیزین کیتاب سرگی‌سی!
کیتاب‌لاریمیزی یالقیز بوراخمایین. اۏنلار سیز دگرلی اینسان‌لارین أل‌لری‌نی دادماغا یئریک‌له‌ییرلر.

یاشاسین دیلیمیز-إلیمیز اۆچۆن چالیشان‌لار
یاشاسین تۆرک دۆنیامیز
یاشاسین آذربایجان

إلیمیزین أن کیچیک قولو: آیهان میانالی

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

کیتاب سرگیسی2

دومان بختیاری‌دن تۆرکجه شعر تۏپلوسو، تبریزین کیتاب سرگی‌سی‌ده!

قال (شعر تۏپلوسو) دومان بختیاری‌دن تۆرکجه شعر تۏپلوسو، تبریزین کیتاب سرگی‌سی‌ده!

Leave a Reply

Your email address will not be published. Required fields are marked *