ننه‌م آی ننه‌م / محرم محمدزاده (محرم عمی)
محرم عمی آنالار حاققین‌دا تقدیم إدیر
دۆنیانین غم‌لری سیخان‌دا منی
حالیما یانان ننه‌م آی ننه‌م
گیزیلین’جه اوتوروب آغلایان‌دا من
منه هم‌زبان ننه‌م آی ننه‌م
حسرت‌لر یاش اولوب گؤزدن آخان‌دا
آرزی‌لار اوزاق‌دان منه باخان‌دا
قلبیمی یاندیریب بیری یاخان‌دا
منه مهربان ننه‌م آی ننه‌م
اۆرک‌ده محبت توخومو أکن
بالانین هر زامان قایغی‌سین چکن
إولاددان خاطیره گؤز یاش تؤکن
دیلی جیسمه جان ننه‌م آی ننه‌م
آغاردی ساچ‌لاری سارالدی اۆزۆ
نیسگیل بولاغی‌دیر او آلا گؤزۆ
یادیم‌نان چیخماییر لای‌لالی سؤزۆ
بدنیم‌ده‌کی قان ننه‌م آی ننه‌م
خیالی اینجه‌دی دسته دسته‌دی
گؤزۆمۆن نورودو, گؤزوم اوسته‌دی
نه یامان قوجالیب جانی خسته‌دی
آمان آی آمان، ننه‌م آی ننه‌م
هئی چکیر فیکیرین، إوین إشیگین،
ترپه‌در یوخولو بالا بئشیگین
هر زامان اوشاغین چکر کئشیگین
قوجالما دایان ننه‌م آی ننه‌م
گؤزۆمۆن قاراسی ننه‌م آی ننه‌م
اۆره‌گین پاراسی ننه‌م آی ننه‌م
آیری‌لیق یاراسی ننه‌م آی ننه‌م
بئلی آی کمان، ننه‌م آی ننه‌م
محرم محمدزاده (محرم عمی)
