یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
“قال” و قالارقی خاطیره‌لر
بو گۆن أدبیات دۆنیامیزدا اونودولمایان بیر گۆن یاشادی!
هر شئی سانکی اؤنجه‌دن آیارلانیب، بیر یادداش‌لاردان سیلینمز آخشام‌دان خبر وئرمه‌لی’یدی.
گۆنش، قۏجا تاریخ‌ده بسلنمیش مییانانین داغ‌لاری‌نین قوجاغین‌دا یاتمازدان، باشقا گۆنش‌لر سئویم‌لی مییانانین تن اۏرتاسین‌دا، ایشیق ساچماغا باشلادیلار. سؤز قالماق‌دان گئدیردی؛ بیر قالارقی خاطیره‌دن و بو قالماق اۆچۆن هر شئی اؤز یئرین‌ده’یدی. ایل‌لر بۏیو سؤزجۆک‌لری بۏغازی’یلا دۆگۆنلشدیگی شاعیرین دانیلماز دوراغین‌دا، بو گۆرۆنتۆلری سانکی خیال‌لاریمیز‌دا یاشامیشدیق؛ نه ایسه گئرچک دۆنیامیزدا بو اۏلای گۆرۆنن دورومو یاشاماق‌دا’یدی. هر شئی اۏلدوغو کیمی دۏغال، وارلیغی کیمی گئرچک، تام اؤز و اؤزگه‌لیک‌دن ایراق!
“قال” کیتابی حبیب ساهیرلر، محمدباقرخلخالی‌لر، ناصر منظوری‌لر، ارشد نظری‌لر و بونلار کیمی بؤیۆک اینسان‌لارین شهرین‌ده، تاریخین آناداماری بؤیۆک مییانادا أدبیاتیمیزین آل-ألوان چیچک‌لری‌نین دۏداق لؤوحه‌لری اۏلوب، عزیز أدبیات سئون‌لر تبریزدن، زنگان‌دان، کاغذکنان‌دان و گؤزل آذربایجانیمیزین باشقا جننت گؤرۆنتۆلۆ یئرلرین‌دن بو سئویم‌لی یۏل‌داش‌لیق تۏپلوما قاتیلیب بو قالارقی أثرین حاققین‌دا گؤزل دانیشیق‌لار آپاردیلار.
مییانانین ایرشاد اۏرقانی بو اونودولماز تۏپلانتی‌نین أمک‌داش‌لارین‌دان ساییلیب، هر شئیین گؤزل قاباغا گئتمه‌گین‌ده، یئترلی آددیم‌لاری‌نی آتیب، یاردیمچی اولدو.
آذربایجانین گۆر سس‌لی شاعیری‌نین آپاریجی‌لیغی’یلا بو تؤرن باشلادی. تایماز مییانالی بۆتۆن مراسیم‌لرده یارادان خاطیره‌لر کیمی، بو مراسیمی ده أعلا دوروم‌دا قاباغا آپاردی.
دۏکتۏر محمد‌رضا کریمی، دۏکتۏر ارشد نظری، بؤیوک شاعیریمیز حسین رزمی(یارای)، سایین خانیم رضوان حاجی‌قاسملو(جانای)، کیتابین حاققین‌دا دانیشیق‌لار آپاردیلار.
دانیشیق‌لار آردین‌دا، آذربایجانیمیزین بؤیۆک و سئویم‌لی شاعیرلری، تبریزدن شاهد کریم، علی شاملی، آیسو مختاری و زنگان‌دان ثریا بخشی(آیلار)، علی احمدی(وولقان زنگانلی)، ناهید نصیری و تاران زنگانلی شعر اۏخویوب ییغینتی‌نین یاشانان ایمگه‌لری‌نه گؤزل گؤرۆنتۆلر قاتدی‌لار. مییانانین شاعیرلری‌نین ورین‌دن ده، قاسم نوربخش و دۏکتۏر فیروز سیمین‌فر شعرلری‌نی اۏخویوب، دانیشیق‌لار آپاردیلار. بو آرادا قۏناق‌لارا داها آرتیق واخت آییریلسین دئیه، مییانانین باشقا شاعیرلری، شعر اۏخوماق‌دان وازکئچیب قۏناق‌لاری إشیتمه‌گی باشدا توتدولار. بو مراسیم‌ده ایشتیراک إدن‌لرین سایی‌سی، سالۏنون توتومون‌دان داها آرتیق اۏلدوغو اۆچۆن، ایگنه سالماغا بیله یئر قالمامیش‌دی!
بو گؤزل شعر و أدب آخشامین‌دا، آشیق عباس ستاری و آشیق عاریف قاسمی، سازلاری’یلا و سؤزلری’یله چۏخ مؤحتشم بیر گئجه‌نی، ایشتیراک إدن‌لره یاشاتدیلار.
یئنی قاپی اؤز سیراسی’یلا بو بؤیۆک و اونودولماز اۏلایی سایین و بؤیۆک شاعیریمیز “دومان بختیاری” جنابلاری‌نا تبریک دئییب، توتدوغو یۏل‌دا، سارسیلماز آددیم‌لاری‌نی و داها گؤزل یارادیجیلیغی‌نی آرزی‌لاییب؛ بؤیۆک و گؤزل آذربایجانیمیزین دَگرلی شاعیر و یازارلاری‌نین بو تۏپلانتی‌دا، ایشتیراک إدیب، بو گؤزل آنی‌لاری یارتدیق‌لاری اۆچۆن، هامی‌سی‌نین أل‌لری‌نین بورادان اؤپۆر.
یئنی قاپی™
قال و قالارقی خاطیره، شکیل‌لر دیلین‌ده!
