سؤزجۆک‌لر دارغینی‌یـام / اۆلکر قاسم‌زاده (تبریزلی)

سؤزجۆک‌لر دارغینی‌یـام / اۆلکر قاسم‌زاده (تبریزلی)

یئل‌لی گۆن‌لریمیزی داغیتدیغین‌دان بری

یازیلمایان اؤیکۆلریمی بئله یئل آپاردی
هانی گۆنش‌دن بیر من، سنه یئتردیم؟

حاق‌لی دَده مالی تک بؤلۆشۆردۆن:«گۆنش سنین! شمس منیم»

نه منیم گۆجوم چاتدی سن‌سیز گۆنشین قابارلی اۆزۆنۆ ساغالتماغا

نه مئولاناسیز شمسین سماسین‌دا داد-دوز قالدی!

یایلیغیمی سارانی آپاران سئله تاپشیرسام بئله

خزَره اوزانان ساچ‌لاریمی گؤرمزلیک‌دن گلیرکن

کؤرپه دیلک‌لریمیزی اؤزگه قیزی‌نین گۆده ساچ‌لاری‌نـا دۆگۆمله‌دین

گؤزلری اۏیولسون!
نیشاطی پۏزولسون!
قیز کؤرپۆسۆنۆن!

یایلیغیمین حؤرمتی‌نی قۏرویا بیلمه‌دی

بیلیرم آرتیق گؤزلۆگۆنه قۏنان، تۏز اۏلسام بئله، منی گؤرمه‌یه‌جک‌سن

کؤنۆل پنجره‌ن‌ده ایزیم قالماییب

دۆشۆنۆرم…

سنه یانماغا آسلی اۏلسام بئله، آنجلینا جولی تبین‌ده یاناجاق‌سان

یۏخ’سا ژولیت بینوش قیلیغینا گیرسم بئله

سن هجر’له چیگین به چیگینه آدیملاماغی اؤزله‌یه‌جک‌سن

گۆزگۆیه باخیب، شهریارین ثۆریّاسی‌نـا آغیت دئیه‌سیم گلیر

آستا’جا قولاغیما پیچیلداییر: «بو اؤنجه سینان‌لارین سسی دیر»

تۏی’دير بو گئجه!

سیندیرماغا نه اۆره‌گیم وار، نه ده غوروروم!

90/7/23