قاران‌‌لی سئوگی / آیهان میانالی

قاران‌‌لی سئوگی / آیهان میانالی

تانیق‌سیز تانری‌نین
دۏداق‌لارین‌دان،
اؤپۆش‌لر چالینیر،
یالان گئجه‌نین دوعاسین‌دا،

سن هله یالواریرسان،
یال‌سیز گئجه‌نین
یالین یۏل‌لارین‌دا
من ایسه
جهنّمه اۏدون داشیییرام،
گئجه‌نین باغرین‌دا!
باخ!
ایڪیمیزده یانیلمیشیق؛

سن
یازیلمامیش یالان تانری‌یا

من ایسه
سنین قاران‌لی سئوگی‌نین باغری‌نـا…

باخ!
ایکیمیز ده
بۏیلاندیق
وارسیز ایزین سۏن إکرانین‌دا

ایکیمیز ده
قویلاندیق
تۏرپاق‌سیز اینسانین یوردون‌دا

اؤلۆم’له اۏیناییردیق
مزارسیز سئوگی‌نین باشین‌دا

باخ!
یۏل‌لارا بۏشانیردیق
یۏل‌سیز دووارلارین آردین‌دان

سؤزلره یئنیلیردیک
یای‌سیز قیشین سۏیوغون‌دا

باخ!
نه اۏلار باخ؛
یالواریرام باخ!
باغریم سیریق‌لانیر
بو قارا باختین تاختین‌دا

باخ!
سن‌لیگیم،
یاتاق‌سیز قالیر،
یاتای‌سیز گۆنش‌لرین
سوسموش بۏغازین‌دا

باخ!
ایزله بو سئوگی‌نین سۏنونو

گئری دؤن تانری‌یـا

اونود منی قاران‌لی سئوگی‌نین اوچوشون‌دا

Podcast: Play in new window | Download

Yazını bu əlifbada oxuyun: TÜRKCƏ