گئتمک ایسته‌ییرسن، بهانه‌سیز گئت / نۆصرت کسمنلی
گئتمک ایسته‌ییرسن، بهانه‌سیز گئت،
اۏیاتمـــــــــــــــا مۆرگۆلۆ خاطیره‌لری
سسین همن سس‌دیر، باخیشین اؤگئی،
گئدیرسن، سسین ده یاد اۏلسون باری
سن دنیز قۏینونا توللانمیش چیچک،
اۆستۆنــــــــــه دالغالار آتیلاجاق‌دیر
ساختا مَحَبّتین ساختا سند تک
نه واخت’سا اۆستۆن‌ده توتولاجاق‌دیر
دؤشه‌نیب یۏل‌لار تك آیاق‌لاری‌نـا
سنه یالواریم می، بو مۆمكۆن دَگیل.
قۏیمارام قلبیم‌تك ووقاریم سینا
آلچالیب یاشاماق عؤمۆر-گۆن دَگیل.
دئمیرم سن اوجا بیرداغ‌سان، أگیل،
دئمیرم قالیب‌دیر علاجیم سنه،
نه سن‌ده مَحَبّت قارا پول دَگیل،
نه من دیلنچی‌یم أل آچیم سنه…
گئتمک ایسته‌ییرسن، اۏ یۏل اۏ دا سن…
بیر جۆت گؤز باخاجاق آرخانجا سنین.
گئتدین می…نه‌واخت’سا دؤنمک ایسته‌سن
تیكان‌لی یاستیغا دؤنه‌جک یئرین.
گئتمك ایسته‌ییرسن… نه دانیش، نه دین!
یۏخ اۏل اوزاق‌لارتک دومان‌دا، چن‌ده…
نه‌ییمی سئومیشدین؟ دئیه بیلمه‌دین،
ایندی’سه یۆز عئیب گؤرۆرسن من‌ده.
گئتمک ایسته‌ییرسن، بهانه‌سیز گئت،
اۏیاتمــــــــــــــا مۆرگۆلۆ خاطیره‌لری
سسین همن سس دیر، باخیشین اؤگئی،
گئدیرسن، سسین ده یاد اۏلسون باری…
