یئنی یازې‌لار / Yeni Yazılar
آنا صفحه Ana Səhifə / ادبیات / یانلیش / تایماز مییانالی

یانلیش / تایماز مییانالی

yanlis-taymaz-miyanali-yeniqapi

یانلیش / تایماز مییانالی

 

هاوانین ایستی‌سین‌دن کیریخیب، آلنین‌دان اۆزۆن‌دن تَر سۆزه-سۆزه، کُت‌ین آتیب قۏلونون اۆستۆنه تاکسی‌دان إندی.

مشدحمزه‌علی آلچاق، دیغیریق، کئچل بیر کیشی’یدی. هَمَشه دوداغی‌نین ساغ طرفین‌ده سیقاری تۆستۆله‌یَردی.

بنّا ایدی و ایشین‌ده چۏخ‌ دا باجاریق‌لی و مهارت‌لی’یدی؛ دوواری قورتاریب چوب‌بست‌دن آشاغی آتیلماق همن، ایش صاحابا یا اوردا اۏلان جاوان‌لارین بیری‌نـه دئیردی:

دووارا مؤحکم بیر تپیک وور .

ایش صاحاب یا جاوان، دووار تزه ایشله‌نیب دئیه، یاواش تپیک وورسایدی اوندا گؤرردین مشدحمزه‌علی دئیردی اۏجور یۏخ بااااا….

دالی- دالی چکیلیب دیغیریق جانی‌ینان آتیلیب دووارا إله بیر تپیک ووراردی کی هامی دئیَردی ایندی‌دی کی دووار آشسین.

آما اؤز ایشین‌دن إله آرخایین ‌ایدی کی بیلیردی هئچ اۏن‌دنـه اۏ تپیک‌لردن دۆزلتدیگی دوواری آشیرا بیلمَز.

بئله‌لیک’له هم اؤز ایشین و مهارتَین گؤزه چَکَردی هم ده دۏیونجان کَهَرله‌نردی.

اۏ گۆن‌ ده، اۆچ آی‌دان سۏنرا غوربت‌دن گلیردی، هئچ حؤوصله‌سی یۏخودو؛ اۆچ آی ایشله‌ین‌دن سۏنرا نامرد ایش صاحابی پول یۏخدو دئیه یازیق کیشی‌نی ألی بۏش یۏلا سالمیشدی.

دای چۏخ هارای داددان سۏنرا بئناوا کیشی‌یـه آزیجیق یۏل خرجی و إوه وئرمه‌گـه یاوان چؤرک پولو وئرمیشدی.

تاکسی‌دان یئنین‌جه، تئز جیبین‌دن بیر سیقار چیخاردیب قۏیدو دۏداغی‌نـا؛ کیبریتی نئچه دفعه قوطوسونون قارا یئری‌نـه چکدی، آما کیبریت اۏد آلمادی، شالواری‌نین جیبین‌ده کیبریتین قوطوسونو تَر إله ایسلاتمیشدی کی کیبریت یانمیردی.

اوزاق‌دان داماغین‌دا سیقار گلن بیر جاوانا بارماغی‌’ینـان ایشاره إله‌دی کی فندک‌ین وار؟

اۏ دا دۏداغین‌دان سیقاری گؤتۆرۆب توتدو بونا ساری، آلیب سیقاری‌نی اۏنون سیقاری‌’یلا آلیشدیردی.

سیقارا درین پۏک وورا-وورا، هئی دیلی‌نین-دۏداغی‌نین آراسین‌دا دئیینیردی:

آخی بئله ‌ده ایستی اۏلار؟

سانکی جهننمین بیر باجاسین آچیب‌لار بو خارابایا؛

آللاه کس‌سین بو تئهرانین هاواسی‌نی؛

بیر طرف‌دن ایستی بیر طرف‌دن تۆستۆ، آدامی لاپ جانا گتیریر.

قوربان اۏلوم اؤز یوردوموزون……

إئئئههه هئچ اۏرا دا بیر یئر دَگیل، قیشی شاختادان، یایی ایستی‌دن، آدامین جانی هئچ اۏردا دا بیر دینج آلمیر کی….

آما یئنه ‌ده قوربان اۏلوم وطن تۏرپاغی‌نـا،

إله بو فیکیرلرده‌’یـدی کی یئتیشدی تئرمینال‌ین قاباغی‌نـا.

 

یئنه اؤز-اؤزۆنـه باشلادی دئیینمه‌گه…

آللاه إوی‌نی ییخسین(ایش صاحابی‌نی دئییردی)، إوه چاتدیم آروادا نه دئیه‌جم؟

بیلیرَم دای آرواد دا بیلسه ألی‌بۏش-جیبی بوۏش إوه دؤنمۆشم، هئچ بیر خۏش اۆز گؤرستمه‌یه‌جک کی….

هله منه باخ منه، إوه دؤنمه‌گه اۆره‌گیم‌ده مین‌جۆره نقشه تؤکمۆشدۆم: آروادا دۏن آلاجام، بؤیۆک قیزا یای‌لیق، خیرداجا سۏن‌بئشیگه ‌ده آیاق‌قابی….

ایندی ألی‌بوش آتا-آتا هارا گئدیرم….

کئشکه یا جیبیم دۏلو اۏلایدی یا بوردا بیر تانیش‌دان زاددان اۏلایدی بو نئچه گۆن مۆرخص‌لیگی اۏردا دالدالانایدیم و بئله‌سی اۆزۆ قارا إوه گئتمه‌یَیدیم.

آما اوشاق‌لارا و اوشاق‌لارین ننه‌سی‌نـه داریخمیشام آخی….

اۏ کؤپه‌گین قیزی‌نین دیلی آجی اۏلسا دا، بیر دفعه گؤزۆمۆن ایچی‌نـه باخیب إیدیره-إیدیره مشدحمزه‌علی دئین‌ده لاپ یۏرقونلوق جانیم‌دان چیخیر.

اۏندا دا تقصیر یۏخدور کی، خرج آغیر، دۏلانیشیق چتین، پول یۏخ …. نئیله‌سین هامی‌نین حیرصین منه تؤکۆر دای، قاداسین آلدیغیم.

سیقاری‌نین أته‌گی‌نن  باشقا سیقاری آلیشدیردی، ساغا سۏلا باخاراق یئریدی اۏتوبۏس‌لارا ساری.

بیردن گؤردۆ اوزاق‌دان اۏتوبۏسون شاگیردی بونو چاغیریر:

مشدحمزه‌علی….. مشدحمزه‌علی…..

مشدحمزه‌علی ألان حرکت إله‌ییریک.

سئوینه‌رک دئدی: قوربان اۏلوم وطنه باااااا…

إله آتا-بابا دئمیش‌کن آدامی تانییان یئرده، قورد یئسین.

تئز اؤزۆن اۏتوبۏسا یئتیریب، پیلله‌سین‌دن چیخدی اۆسته، باخدی گؤردۆ اۏتوبۏسون اۏرتاسین‌دا شۆشه قیراغین‌دا بیر صندل بۏشدو، تئز کئچیب اۏتوردو اۏردا.

اؤز-اؤزۆنه دئدی: یاخشی اۏلدو باااااا….. کؤلگه طرفه دۆشدۆم؛ آز قالمیشدی گۆنۆن شاخینتی‌سین‌دان بورنوم‌دان قان آچیلا!

اۏ قَدَر یۏرقونودو کی اۏتوبۏس یۏلا دۆشمه‌میش یوخویا گئتدی، هئچ بیلمه‌میشدی اۏتوبۏس ناواخت شهردن چیخمیشدی.

هردن بیر گؤزۆن آچیب یوخولو-یوخولو یۏلا و داغ‌لارا باخیب، تزه‌دن یوخلاییردی.

یاواش-یاواش ‌دا قاش قارالیردی و هاوا سرینله‌ییردی و یۏرقون مشدحمزه‌علی‌نین یوخوسون لاپ آغیرلادیردی.

اۏتوبۏس یۏل‌دا شاما ساخلادی، آما نه اۏجۆر آج‌لیغی واریدی، هم ده جیبین‌ده پول آز اۏلدوغونا قیمیردی یئمه‌گـه پول خرجله‌سین.

اۏدور کی اۏتوبۏسون شاییردی گلدی کی:

“آقا واسه شام پیاده نمیشید؟”

بیر گؤزۆن آچیب دئدی: آج دَگیلم، یوخوم گلیر ایستیرم یاتام!

 

یئنه‌ده اۏتوبۏسون ناواخت یۏلا دۆشمه‌سی‌نی بیلمه‌میشدی. گئجه‌نین یاری‌سی‌’یدی کی اۏتوبۏس ساخلادی، هامی إندیلر. اۏتوبۏسون شاییردی گلدی کی: “آقا رسیدیم پاشید پیاده شید”.

گؤزۆن آچیب اۆره‌گین‌ده دئدی:

بو قۏدوغا باخ إئئییی گؤرنه‌ ده فارسی قیریلدادیر.

گؤزلرین اؤوکه‌لییه-اؤوکه‌لییه اۏتوبۏس‌دان یئندی، ایلک اؤنجه فیکرلشدی بس یوخولودور کی شَهَر بونا ناتانیش و اؤزگه گلیر.

گؤزلری‌نین هامی‌سی‌نی آچیب دؤوره‌یه باخدی.

آللاه بورا هارادی؟؟؟!!!

یانی اۆچ آیین ایچین‌ده شَهَر بیر بئله دَگیشیب‌؟؟

سانکی بیردن برق توتدو حیرصین‌نن!

یۏخ قارداش بورا مییانا دَگیل دئیه، قاییتدی شۏفئرین اۆستۆنه.

— قارداش منی هارا گتیریب‌سیز؟ بورا مییانا دَگیل کی….

شۏفئر دئدی: کیشی نه مییاناسی؛ بورا أنزلی‌دیر

— هارا؟؟؟؟

— بندر أنزلی…

— آللاه إوینیزی ییخسین، من أنزلی‌ده نه جان وئریرم؟ من مییانایا گئده‌جَیدیم

شۏفئر دئدی: کیشی مییانا هارا أنزلی هارا؟؟؟ پس سن نه‌دن بو اۏتوبۏسا مینیب‌سن؟؟؟

— آللاه تیفاغینیزی داغیت‌سین اؤزۆنۆز منی چاغیردیز کی آی مشدحمزه‌علی گل اۏتوبۏس یۏلا دۆشۆر.

من ده دئدیم حتمن منی تانیرسیز کی آدیم‌نان چاغیریرسیز دای، یۏخ’سا من إوی ییخیلان، أنزلی‌ده نه جان وئریردیم؟

شۏفئر اؤنجه چۏخ تعججۆب’له کیشی‌نین سؤزلری‌نـه قولاغ آسیردی، بیردن ألین چالدی دیزی‌نـه، إله شاققا چالیب گۆلدۆ کی، هامی دؤندۆ بونلارا ساری.

کیشی‌نین بارماغین کس‌سَیدین خبری اۏلمازدی، گۆلمک‌دن گؤزلرین‌نن یاش آخیردی.

مشدحمزه‌علی شۏفئرین گۆلمه‌گین گؤرن کیمی، لاپ عصبی‌لَنیب، حیرصی باغیرساغین کسدی. دئدی:

کیشی منی ساریـییب‌سان؟

هله یانلیش میندیریب گتیریب‌سن منی، آوارا إله‌ییب‌سن ایندی ‌ده منه گۆلۆرسن؟؟؟

شۏفئر گۆلمه‌گین ییغیشدیریب دئدی:

یۏخ قادان آلیم، سنی لاغ إله‌میرم؛ جریان آیری بیر شئی‌دی.

منیم شاییردیم تئهرانین ترمینالین‌دا، چاغیریردی  “رشت – أنزلی”، سن دئییب‌سن پس چاغیریر مشدحمزه‌علی….

آما هئچ اۆزۆلمه، گئجه‌نی منه قۏناق‌سان، صاباح اؤزۆم سنی آپاریب تئهران‌دا مییانا اۏتوبۏس‌لاری‌نـا میندیریب یۏلا سالاجاغام.

کئچ گئدک إوه هلـــه ……

تایماز مییانالی

taymaz-miyanali-yeniqapi-3

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

sevinc elsevər-yeniqapi

قارېشقا قادېن / سئوینج إل‌سئور

قارېشقا قادېن / سئوینج إل‌سئور بۆتۆن قېشې مطبخ‌ده‌کی ایشکافېن آلت گؤزۆن‌ده گؤزله‌دی إوین خانېمې‌نېن باهاردا …

Leave a Reply

Your email address will not be published. Required fields are marked *