یاز نۆمره‌نی یول‌لارا / بهرام سۆرگۆن

یاز نۆمره‌نی یول‌لارا / بهرام سۆرگۆن

شعر توپلوسو
بهرام سۆرگۆن‌دن

بیر گؤزل تورکجه رباعی بیچیمین‌ده

شعر کیتابی

 

گؤیچک گول اییی بوی آتمادایدی سیزدن
گولـدانلاری کیم یـیغیـشدیریـب دهلـیزدن
سـون قویما گـولوم شـعره اگر ایـمکانی وار
گـل بـیـر دنـه ده روباعـی یـاز نرگــیـزدن

 

 

قوچ کل لریمـیز هـایاندا گیـزله نمـیشدی
تورپاق قودوزون گؤزونده ایزله نمیشدی
نـاموسـلاریـنی سیـللـه لرآلتـیندا گــؤرن
ال لــر نـه یامـان اسـلـحه سـیز لنـمیشدی

 

دوش دن یازیرام دوشون، سیز آتدان قورخون
بـو قورخـولو قـالخـانـلی، حیـاتدان قورخـون
غئیـرتـلی غــزل پـیــچـاق چـکـیـر مئـیـدانـدا
جان قورخوسو وار گلین بـو لاتدان قورخـون
دؤرد بـیـر یانیـمیز آلاولانـیـر بـیـلـمیـرسن
کؤکسون کیمی تام کؤنول یانیر بیلمیرسن
ایللر بویو بیز داش آتمـیشـیق سـئوگیـمـیزه
مـنله سـنی ده سئــوگی دانــیر بیلـمـیرسـن

 

دوشدو قارا تئللره بو آغ فاجیعه سی
قالدی سینه م اوستونده بو داغ فاجیعه سی
سس دونیاسینا آیاق قویانلار دوشونور
یئر گؤیلری ترپتدی دوداق فاجیعه سی
کؤنلوم قوزو تک قالیبدیر ال لرده مه لر
گؤی گوللـه له نیر باخین سیـز الله ببـه لر
اعـدام دیـره یـیـنـدن آسیـلان بو قَـلـمـه
بویلاندی باخا یانیب کول اولدو مئشه لر
سـورگون گئـده لـی الیــمده بیر ایزلیک وار
کؤکسوم دولوسوگؤرمه لی نرگیزلیک وار
مـن، اؤز بـاشـیـمـا بـوردا قـالا بـیــلـمزدیـم
گئـتدیم کی گـؤرم دالیندا سنـسیزلیـک وار
هر ماهنی دا ساز تئللرینه ایز دوشدو
دوشدو باشیما دن بئله سنسیز دوشدو
قیزلار قـالاسین منیمسـه یـن بیر آندا
بیردن یادیما ارک ایله تبریز دوشدو
بــاتـدی قـارا نیـفـرتلـر ایچـیـنده دون لـر
پاس باغلادی بئینیمیزده آی لار ، گون لر
گؤز دورنالارین گلـمه یینه تیکمیـشدیک
سیزدن خبر اولمادی یازیـق سورگـون لر
مفتیلدن اوجا حـاصـار گـؤرن گـؤزلریـمـیـز
دؤرد بیر یانی دؤرد دووار گؤرن گؤزلریمیز
هـر پـارتـیـیا گـلـدی خـانـلیـغی تـامـسینـدی
رعیـت الـی دیـر قـابـار گـؤرن گـؤزلریـمیز
شاعــیر یارالاندی دردیــنی بیلمــک اوچـون
کیمسه تاپا بیلمه دی قانین سیـلـمـک اوچـون
قان آغلادی میصـرالار، اولدو غـزل
یوخ، دوغمادی بیر قصیده اسکیلمک اوچون
سسسیز جه اؤزون سیخیر بو سسسیز ساوچی
بیردن بیر ائوی ییـخیـر بو سسـسیز ساوچی
گـاه گـولـله لـه ییـر عـدالتی گاه قـاوزیـر
گاه محکمه دن چیخیر بو سسسیز ساوچی
دوندو، داشا دؤندو آغزیمیزدا دیللر
پاس باغلادی بئینیمیزده آیلار ایللر
اوز قویدو ارنلر تیکه لر کؤرپولری
گول آچدی بوداقلاندی یئنه مفتیللر
گاهدان قارا پول مردی سالیر سیرفالارا
مينت لی چؤرک باشین چالیر سیرفالارا
بیر کونجوده آج قالمیش اوشاقلار مله شیر
دوز دردی چؤرک دردی قالیر سیرفالارا
میندار یاتاغا سیغینماغیندان دانیشیر
قورخونج اوتاغا سیغینماغیندان دانیشیر
بیر گون ائوینه قاییتمایایدی کئشگه
پئشمان قوجاغا سیغینماغیندان دانیشیر
سئوگی بو قوشا الدی گزیر مئیداندا
آه، قورخو بو سئوگی دیر بیتیر هر یاندا
پارکین یولو آغزیندا کمر اسلحه لی …
بو قورخو همیشه لیک قالیر اینساندا
یاز … میله لر آرخاسیندا قوچ کل لردن
یاز … خوفلانیریق سیلاحلی هئیکل لردن
دار کندیریدیر حالقالانیب بوغماق اوچون
چک … دیسکینیرم بویونداکی ال لردن
بو اؤلکه ده من معناسی من سیزلیک دیر
سورگون آدیمین معناسی سن سیزلیک دیر
قیش شاللاغی، گولـله لر ده اؤلدورمه دی هئچ
امّا هله قوشلارا وطن سیزلیک دیر
بوز پارچاسیجدیر، داشدی اورکلر قارداش
قارداش اوریین توتور کلکلر قارداش
هر آن الیمیز خمیرلیدی قارنیمیز آج
تندیرده یانیر بیزیم چؤرکلر قارداش
یاد سیلله سی دیر هر آن یاناقلاردا گزیر
باشماق کیمی دوستلوغون آیاقلاردا گزیر
دوزلا چؤریین حؤرمتی دیر آل وئر اولور
دوز سیندیران آل وئرچی یولاقلاردا گزیر
بئش قاتلی چپییله باغلامیشدی باشینی
سیلدی دووارا آسدی قارداشینی
همیشه یاغیشدا آغلایان پنجره دی
دستماللی قادین سیلیر اونون گؤز یاشینی
هر سؤز یاراشیر آتیلمامیش بیر اوره یه
هر یوک سواشیر چاتیلمامیش بیر کوره یه
مندن آرالی گزین قومار اوینامیشام
من منلیییمی اوتوزموشام بیر چوره یه
آی آیناسی تک سینیب اوغولسایدیم اگر
آیدان آری گوزگوده بوغولسایدیم اگر
هامی آنا تک سئوردی بو کورپه سینی
شاعیر یئرینه پیلله دوغولسایدیم اگر
سینماقدی بو قورخو آینانی سیلمکدن
لای لای بالالار یورولموسوز ایلمکدن
سیزده هله بو دوشونجه لر درد آرتیر
من خوفلانیرام، دیسکینیرم بیلمکدن
بیزده بو پاییز گؤزون اییر پنجره دن
هر دن یاهالیب یاغیش دییر پنجره دن
یاز غملی باخیر، گؤز یاشینی سیلمک اوچون
بیردن بو گونش ایشیق سه ریر پنجره دن
آی گؤرکمی نه پاسدی بیزیم پنجره دن
یاغمور اوتاغا باسدی بیزیم پنجره دن
مفتیل تیکن اللر یئنه ده ظولم ائله دی
بو پرده لری آسدی بیزیم پنجره دن
دونیا دلیلر ییغینجاغینداندا بیزه
ایز وئرمه دیلر سیغینجاغینداندا بیزه
بیز کورپه اوگئی قیزیق، سیز اؤيرتمه دینیز
بو کایناتین اویونجاغینداندا بیزه
دیندیر بئله حبسده اوزانمیش آرازی
گز تاپ کوچه لرده دولانان سئوگی نازی
باس بو باسا باسدا یارالی کؤنلوموزه
میخدان داها تاخچادان یورولموش بو سازی
ویترین، شوشه، بو قیزین اؤلن آرزیلاری
هر آن اونو آغلادیب، گولن آرزیلاری
مین ایلدی بو ویترینده گؤزون قالدی سنین
یاز نومره نی یوللارا دیلن آرزیلاری
اؤز سئوگیسینه سیغیشدیران یوخدو منی
بو عادتیله بوغوشدوران یوخدو منی
قالدیم کوچه لرده، گؤزوم الله دالیجا
من بیر دلی یم ییغیشدیران یوخدو منی
جوت گؤز قاماشیر شاخیر منه پنجره دن
جوت گؤز سوزولور آخیر منه پنجره دن
سندن پارادوکس فلسفه اؤیرندیکجه
بیر کؤرپه اوشاق باخیر منه پنجره دن
کؤرپه اوشاغین دیزینده بیر پارچا زیغام
یوخ کؤرپه اوشاقداندا بتردن یازیغام
آه اؤز ایچیمین ساواشلاریندان قاچیرام
من دیرناغیلان یئره چکیلمیش جیزیغام
فندک اودو پاپریزلاری یاندیردیقجا
مجهول او ایزین منی اوساندیردیقجا
سنسیزلییمی بیر کاغاذا بوک گؤندر
من سیزلییمی مندن اوتاندیردیقجا