یئنی یازې‌لار / Yeni Yazılar
آنا صفحه Ana Səhifə / ادبیات / مکتوب / هئرمان هئسئ

مکتوب / هئرمان هئسئ

download (16)

مکتوب / هئرمان هئسئ

حؤرمت‌لی گۏلکئ جناب‌لارې،
رسّام توشو’یلا یازدېغېنېز دَڲرلی مکتوبونوزا گؤره سیزه مینّت‌دارام. سیزین إتۏدلارېنېز منیم خۏشوما گلیردی، اۏنلارېن هر بیری منه یاخېن ایدی و منی سئویندیریردی.

دۆنیا تاریخی، ساواش، هر شئیین آنلام‌لې و یا آنلام‌سېز اۏلماسې قۏنودا سیزین دۆشۆنجه‌لرینیز منیم اؤز دۆشۆنجه‌لریمه داها یاخېن‌دېر. بیزیم فیکیرلریمیز چۏخ اۏخشاردېر. لاکین یاشام‌داکې داورانېش اۆچۆن أساس اۏلان بیزیم فیکیرلریمیز یۏخ، بیزیم ایمانېمېزدېر.

من هئچ بیر میستیک اؤنه‌ری‌لره اینانمېرام. اینسان‌لارې یارادېب و اۏنلارا داش بالتالاردان توتموش چئشیدلی سیلاحې‌نـا’جان دَگیشیک واسیطه‌‌لر’له بیر-بیری‌لری‌نی قېراراق، بونون’لا فخر إتمه‌گـه ایمکان وئرن بیر تانرې‌یـا اینانمېرام. بو قان‌لې دۆنیا تاریخی‌نین اۆستۆن‌ده یۆکسلمیش گؤگ‌ده‌کی حؤکم‌دارېن بیزی چۏخ گؤزل، خۏش‌نيّت‌لی مقصد’له یارادان بیر تانرې‌یـا من اینانمېرام. بونا باخمایاراق، من‌ده حیسّییاتا چئوریلمیش بیر اینام وار.

اینسانېن خۏش‌خاصیت‌لی، عالی جناب، صۆلح‌سئور و فداکار اۏلماسې باره‌ده بیر سۏنوجا گلمک چتین دیر. لاکین من قطعی أمینم کی، بئله ایمکان وار و نۏرمال دوروم‌دا بو ایمکان بۏی وئره‌رک چیچک‌لـه‌نه بیلر. بودا، سۏقراط، عیسی کیمی دۆهالار، هیندلی‌لرین، چین‌لی‌لرین، یهودی‌لرین مۆقدس کیتاب‌لارې و اینجه‌صعنت عالَمین‌ده اینسان روحونون یۆکسک درجه‌‌سی‌نـه اوجالان یارادېجې‌لېق منیم بو أمین‌لیگیمه أساس وئریر. مۆقدس‌لرین سیمالارې، مۏنتئوئردی، باخ، بئتهۏوئنین موسیقی‌سین‌دن بیر پارچا، رۏژیئ، قواردی و رئنوارېن رسم‌لرین‌دن بیر حیصّه‌‌ کیفایت دیر کی، بۆتۆن موحاریبه‌‌لر و ایشگنجه‌لر یئری‌نـه مۆکافات‌لاندېرېلاق، بیزیم ایچیمیزده باشقا-خۏشبخت بیر عالَم آچېلسېن. حتی اۏنا گؤره کی، اینجه‌صعنت’له ایفاده، گۆج واسیطه‌‌لرین‌دن فرق‌لی اۏلاراق، مین‌ایل‌لیک‌لردن گلیب چېخېر، اۏ داها دایانېق‌لې و إعتیبارلې‌دېر.

بیز زۏر دئمک‌لیگه اینانمایان‌لار و اۏندان اوزاق دوران‌لار إعتیراف إتمه‌گـه مجبوروق کی، هئچ بیر پرۏسئس گئتمیر و دۆنیانې همیشه‌کی کیمی کاریئریست‌لر، حاکیميّت‌سئون‌لر و ظۆلم‌کارلار ایداره إدیرلر، بونلارېن هامې‌سې‌نې بیر دقیق ایفاده‌یه چئویرسک، اۏنو فلاکت آدلاندېرماق اۏلار. بیز بعضن غضب‌لی، بعضن اومودسېز حال‌دا دؤولت‌چی‌لیک و زۏر دئمک‌چی‌لیک سیستئمی‌نین إحاطه‌‌سین‌ده عؤمۆر سۆرۆرۆک (سیز بونو ایستالینقراددا حیسّ إتدینیز). بیز قلبیمیزین اوچوش‌لارې اۆچۆن صۆلح، گؤزل‌لیک، آزادلېق حسرتی‌نی چکه‌رک، بعض آرزې‌لایېرېق کی، بو دهشت‌لی أتۏم سیلاح‌لارې اۏنلارې ایستیحصال إدن‌لردن داها تئز پارتلاسېن. لاکین بو غضبیمیزه باخمایاراق، بیز بو وحشی آرزې‌لارېمېزې ایچیمیزده بۏغوروق. بیز حیسّ إدیریک کی، زۏراکې‌لېغا زۏراکې‌لېق’لا جاواب وئرمک قاداغان‌دېر. بیزیم غضبیمیز و بو نالاییق ایستک‌لریمیز بیزه گؤرسه‌دیر کی، اینسان عالَمین‌ده شرّ و خئییر قارېشېق‌دېر. شرّ آنجاق کاریئریست‌لر و ظالیم‌لرین ایچین‌ده دَگیل، بیزیم – اؤزۆنۆ بارېش‌سئور و خئییرخواه سایان اینسان‌لارېن ایچین‌ده ده یئری‌نی آلېر. شۆبهه یۏخدور کی، بیزیم غضبیمیز “حاق‌لې‌دېر”. اۏ حاق‌لې‌دېر. لاکین اۏ هردن مجبور إدیر کی، بیز دؤولت‌چی‌لیگـه نیفرت إدن‌لر بو اینتیظام‌سېزلېغا سۏن قۏیوب، اۏنو نیظاما سالماق اۆچۆن بعضن اؤزۆمۆز دؤولت‌چی‌لیگی آرزې إدک. بو هَیَجانېمېزدان اوتاناراق، بیز اۏندان همیشه‌لیک قورتولا بیلمیریک. دۆنیاداکې ساواش و شرّده بیزیم ده پایېمېز وار. و بو حال‌لارې هر دفعه‌ درک إدرکن بیزه آیدېن اۏلور کی، دۆنیانې شیطان‌لار ایداره إدیر. آیدېن اۏلور کی، اۏنلار بئله پیس حال‌لارا غضب‌دن یۏخ، هانسې’سا کۏر-کۏران‌لېق و یا تصادوف نتیجه‌سینده یۏل وئریرلر.

بو پارادۏکس‌لار منطیقی یۏل’لا حَلّ اۏلونمور. شرّ دۆنیادا، بیزیم ایچیمیزده مؤوجوددور، اۏ، یاشامېمېز’لا سېخ باغلی‌دېر. لاکین بونا باخمایاراق، بیز بشریّتین شن و گؤزل آن‌لارې‌نې دویوردوق. اۏنلار بیزی تسلّی‌وئریجی شکیل‌ده ساکیت‌لشدیریب، بیزه اومود بسله‌یه‌رک، بیزی خۏشبخت اۏلماغا چاغېرېر و بیز بارېش‌سئورلر بونو یاخشې آنلایاراق، أمین إدیریک کی، باشقالارې‌نېن ایچین‌ده ده بئله حال مؤوجوددور. بیری-بیریمیزه اویقونلاشدېرېب، محبّت ایچین‌ده یاشاماق اۆچۆن بیر إحتیمال وار.

 

کؤچۆرۆب اویقونلاشدیران: آیهان میانالې

ayhan miyanali- www.YeniQapi.com

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

IMG_20190219_234456_559

اۏ بیر قادېن‌دېر / ساناز عباسی

اۏ بیر قادېن‌دېر / ساناز عباسی قۏرخا قۏرخا یۏلونان گئدیردی. اؤز کؤلگه‌سین‌دن بیله قۏرخوردو کؤرپۆنۆن …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *