یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
سئوینج چېلقېن / اۏغلوم
سنی ایلک دفعه
یوخودا گؤردۆم
اۏغلوم
ایچیم‌دن قالخېب
– آناا آناا
چاغېراراق
دۏلاندېن بۏینوما
یوپ‌یومرو اۆزۆن
دۏپ‌دۏلو گؤزلرین واردې
سارېلدېن منه
قۏرخدوم سن‌دن
آیېلدېم و همن گۆن
آللاه سنی من‌دن آلماسېن دئیه
قۏل‌لارېمې قارنېما دۏلایېب
دوعالار إتدیم…
سنی ایتیرمک اومود ایتیرمک کیمی بیر شئی‌دی
اۏغلوم
سؤیکنجه‌ییم أن سۏن دووار سنی بولدوم
بیر پارچاسان
ألیم بۏیداسان
آمّا بلکه ده
داها برکیمه‌میش چیگین‌لریوه
اومود بۏیدا
آغېر بیر یۆکم
هله دۆنیایا گتیرمزدن…
دئمیرم کی،
دوزوم، چؤره‌گیم اۏل منیم
نه وار-دؤولت ایسته‌ییرم
نه سارای‌لار، نه إولر…
بسیمدی بو کیرایه‌‌لر…
بلکه داها بؤیۆک بیر شئی
بلکه چتین اۏلدو سنه…
یاشامېم‌دا بۏم‌بۏش قالان
دۏغما کیشی یۏخلوغونو
دۏلدور، اۏغلوم
اۏلمایان قارداشېم کیمی
قایغې‌سې‌نې گؤرمه‌دیگیم آتا کیمی
آتان کیمی
سئوه بیلرسن‌می، اۏغلوم؟..
سئوه بیلرسن‌می، اۏغلوم؟..
