یئنی یازې‌لار / Yeni Yazılar
آنا صفحه Ana Səhifə / ادبیات / شعرلر / آزاد شعرلر / کیر‌لَنمیش سئوگی‌لر، صاف آیرې‌لېق‌لار…/ جلیل جاوانشیر

کیر‌لَنمیش سئوگی‌لر، صاف آیرې‌لېق‌لار…/ جلیل جاوانشیر

images (53)

کیر‌لَنمیش سئوگی‌لر، صاف آیرې‌لېق‌لار…/ جلیل جاوانشیر

ایندی سن،
أل‌لرینی هار‌دا گیزلَدیرسن کی،
اۆشۆمه‌سین،
ایندی سن
بو آیرې‌لېغېن هاراسېندا دارېخېرسان،
کی اؤپۆش‌لریم یادېنا دۆشمه‌سین؟

آه‌ طالئع‌سیز سئوگیلیم منیم،
یانې کئچمیش سئوگیلیم،
هله‌ ده‌ سئودیڲیم…

گۆلۆش‌لرین هئچ دَڲیشمه‌دی،
ساچ‌لارېن هله‌ ده‌ ییرمی بئش یاشېندا،
هئچ سۏلمادې گؤزلرین،
یۏرولمادېن، یارالانمدېن، آغرېمادېن.
گئتدین، هئچ آرخانا باخمازدېن.
یئنی بیر اۏیونا باشلادېن، اۆزۆن گۆلسۆن
یئنی بیر سئودایا توتولدون، بؤیۆسۆن،
یئنی یاشامېن اۏلسون، یئنی سئوگیلین اۏلسون
یئنی یالان‌لار اؤرگنسین دیلین
آه‌ طالئع‌سیز سئوگیلیم منیم…

ایندی سن
باکیره‌‌لیڲینی ایتیرمیش بَدَنینی هارا‌دا گیزله‌ده‌جَکسن کی،
آغرې چکمه‌سین؟
ایندی سن
یارالانمېش روحونو نئجه‌ قۏرویاجاق‌سان کی،
داها دا چیرکلنمه‌سین؟
آه‌ اونودولموش سئودام منیم
ساچ‌لارېنې داغېدېرمې با‌کې کۆله‌ڲی؟
یئنه‌ ده‌ هر آی عئینی آغرې‌لار’لا‌ قېورېلېرمې بَدَنین؟
گرچکدن، نه‌ ایدی دردین؟
اۆچ یۆز مین أللی آلتېنجې دفعه‌ سۏروشورام:

–نییه گئتدین؟
اۆزدۆن سئودیڲیم، چۏخ اۆزدۆن.
اۆزۆن…
اۆزۆن یئنه‌ ده‌ حۆزن دیلینده‌ یالان دانېشېرمې؟
بَدَنین یئنی بدن‌لره‌ آلېشېرمې؟
باخېش‌لارېندا‌کې آغرېنې گیزلَدیرمی کۏسمئتیکان؟
ایندی هانسې صاباح‌لارا اۏیانېرسان؟
ایندی کیمه “گۆن‌آیدېن” یازېرسان؟
ایندی سن
یئنی سئودانېن یئنی آی‌لارېندا یئنیلمیش آدامسان
ایندی نئچه‌نجی سئوگیلینه‌ دلیجه‌سینه‌ باغلانمېسان؟
ایندی سن،
منیم اونوتدوغوم یئرلرده‌ دۏنورسان،
بیر اېچکی خومارېندا کئچمیش خاطیره‌لره‌ دالېرسان
ایندی سن،
بلکه‌ ده‌ یئنی سئوگیلینه‌ منی دانېشېرسان
منی پارچا-پارچا یاد بَدَنده‌ اونودورسان…

آه‌ یۏرغون سئودا‌لارېن قۏرخاق یۏلچوسو
لۆطفَن، یئنی سئوگیلین چۏخ سئوسین سنی
سن چۏخ سئویلینجه‌ خۏشبخت اۏیانېرسان یوخودان،
اومود‌لو قالخېرسان یاتاقدان
سن سئویلینجه‌ أرکؤیۆن، دَجَل اۏلورسان.
نه‌ اۏ‌لار یئنی سئوگیلین پیس آدام اۏلماسېن،
یانې سنی گئتمه‌ڲه‌ قۏیماسېن
دارېخسېن سنین اۆچۆن، چۏخ دارېخسېن، لۆطفَن دارېخسېن
یۏل‌لارېنا باخسېن، کۆچه‌لرده‌ قارشېنا چېخسېن، سۏنرا داها چۏخ دارېخسېن
یانې چۏخ سئوسین سنی، چۏخ سئوسین و سۏنرا یئنه‌ چۏخ سئوسین
“جانېم” دئسین، “قېزېم” دئسین، “عزیزیم” دئسین…
بیر ده‌ چۏخ سئوسین…
مندن داها چۏخ سئوسین…

ایندی سن
هانسې قاپې‌نېن کاندارېندا چېخارېر‌سان آیاق‌قابې‌لارېنې؟

ایندی هانسې دیوانا اوچور چانتان؟
هانسې بالکۏندا آنان’لا‌ دانېشېرسان؟
ایندی سن
هانسې یاتاقدا آخشامېن دۆشدۆڲۆنه‌ اۆزۆلۆرسَن؟
ایندی سن
أن سفئح شئی’لره‌ کیمین’له گۆلۆرسَن؟
آه‌ اۆرکک باخېش‌لېم، روحو یارالانمېش قادېنېم
بیر دیز تاپ باشېنې قۏیماغا،
بیر أل تاپ یاپېشماغا،
بیر آدام تاپ یالان‌لار دانېشماغا
بیر چیڲین تاپ سېغېنماغا…
هئچ کسین بیلمه‌دیڲی گیز‌لی یئرلرده‌ کیرلن،
تک‌لیڲی‌نین ایچینده‌ گیزلن
یانېنداکې باشقا بدن‌لر ایسیتدیکجه سنی
پاک‌لېغېن سۏلدوقجا، معصوملوغون چکیلدیکجه‌ اۆزۆندن
اؤرگن، فرق‌لی بدن‌لر’له اۏوونماغې،
فرق‌لی دۏداق‌لار’لا‌ اؤپۆلمه‌ڲی اؤرگن…

ایندی سن،
گۆنۆن أن سۏیوق ساعات‌لارېندا دیزلرینی قوجاقلا‌،
بیر خاطیره‌ تاپ یادداشېنېن کۆنجۆندن،
واراقلا…
ایندی سن،
دورمازدان، دایانمازدان، یۏرولمازدان سنی دۆشۆندۆڲۆمۆ بیلیر‌سن،
ایندی سن،
یاشېنېن سئومک و اونوتماق چاغېنداسان،
ایندی سن عئشقین اوزون سۆرمه‌دیڲینه اینانېرسان،
ایندی سن
آلدانېرسان…
و من بۆتۆن مؤوسۆم‌لرده‌ اونودولموش، آتېلمېش روحوم’لا‌
بۆتۆن گئجه‌لری آغلاماق’لا‌ اۏوودورام اؤزۆمۆ
ایتیب گۆن‌لریمین دۆزۆمۆ…
و من بۆتۆن گئجه‌لری سنی دۆشۆنۆرم
آغرېیان و آغلایان گؤز‌لریم’له
یاواش-یاواش قېزېنېرام سن‌لی خاطیره‌لر’له،
أل‌لرین اۆچۆن دارېخېرام

ایندی داها چۏخ اؤزۆم’له دانېشېرام، اؤزۆمل…
ایندی سن
بۆتۆن سئوگی‌لرین اوزاغېنداسان…
یانې یۏخ’سان…
یانې، اۏلمایاجاقسان…

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

IMG-20190815-WA0000

یوخو سمفۏنی‌سی / زهرا نجفی

یوخو سمفۏنی‌سی / زهرا نجفی إنیر دارېخما دالانېندان اونودولموش اۏتاغېما سَریلیر بارماق‌لارېندان سۏل_باس کیلیدی یازېلېر …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *