منیم گۆنۆم-کئچینیشیم / گاوین بئل
ساکیتجه وانېن قېراغېندا اۏتورموشدوم. سیقار چکه-چکه أل‌اۆز یویا‌نېن اۆستۆنده‌کی اۆلگۆجه باخېردېم. فیکیرلَشیردیم کی، ییرمی بیرینجی عصردی، آمّا هۏتئل‌لرده هله ده اۆز قېرخماق اۆچۆن بو قدیم آلتدن ایستیفاده إدیرلر.
منیم آتامېن دا بئله ایتی اۆلگۆجۆ واردې. اۏ، هر گۆن اۆزۆنۆ اۆلگۆج’له قېرخاردې، هر گۆن، إحتیاط’لا و صبر’له قېرخاردې اۆزۆنۆ، أحوالې‌نېن نئجه اۏلماسېندان آسېلې اۏلمایاراق…
منیم یادېمدادې، آتام عؤمرۆ بۏیو بیرجه دفعه بو عادتینی پۏزموشدو. اۏ واخت آتام ایشینی ایتیر‌میشدی، اۆچ گۆن دال‌بادال، عئینی واختدا و عئینی پالتار‌دا إودن چېخېب، ویسکی‌دن دۏیونجا ووروب سرخۏش حالدا آوارا-آوارا گزمیشدی. بیر سؤز’له، اۆز قېرخماق دا یاددان چېخمېشدې. یادېمدادېر کی، آتام همیشه دده-بابادان قالمېش ایتی اۆلگۆجۆنۆ ژیلئتدن اۆستۆن توتاردې…
نه ایسه، آتام یاخشې کیشی ایدی. یاخشې یۏخ إــــئ، لاپ بئله أعلاء کیشی ایدی. من اۏنا اۏخشامادېم، حئیف کی…
“سَنین باشېندا عاغېلدان باشقا هر شئی وار!” – دئیَردی منه.
من اۏندان فرقلی اۏلاراق عادتیم اۆزره اۆزۆ تۆکلۆ گزیرَم همیشه…
سۏنونجو قوللابې ووردوم و سیقارېن کؤتۆڲۆنۆ توالئته آتېب سویو چکدیم.
ایلک دفعه اۏن دؤرد یاشېمدا سیقارې دادمېشام. بیر پارتېیا گئتمیشدیم، اۏر‌دا بیر قېزې گؤزۆم توتموشدو. اۏ گؤزل قېز منه بیر دَنه “مارلبۏرۏ” اوزاتدې. فیکیرلَشدیم کی، ایندی بونو چکسَم اؤسکۆرَک توتاجاق منی، قېزېن یانېندا آبرې‌سېز اۏلاجام. اوشاق‌لار دئییردی کی، ایلک دفعه سیقار چَکَنده آدامې گیج اؤسکۆرَک توتور. یۏۏخ، من اؤسکۆرمه‌دیم، آمّا سینه‌مده قریبه بیر آغېر‌لېق قالدې. اوجوز قهوه ایچندن سۏنرا قالا‌ن بیر حیسّ کیمی… اۏ جۆر…
اۏ قېز’لا هئچ بیر شئی آلېنمادې، آمّا همین گئجه یاشامېم بۏیو منه أن یاخېن اۏلان بیر دۏست قازاندېم. أڲر سیقارا دۏست دئمک مۆمکۆن’سه. آتامېن بیر سؤزۆ واردې، دئییر: “إله دۏستو اۏلانا، هئچ دۆشمن لازېم دَڲیل.”
اۏن آلتې یاشېم واردې، آبیقال آد‌لې بیر قېز’لا تانېش اۏلموشدوم. بؤیۆک بیر شکیل سرگی‌سینده گؤرۆشمه‌لی ایدیک. إله باشلانقېجدان هر شئی ترسه گلدی. من پول‌قابېمې ایتیردیم، سۏنرا، اۏ، بیلمَزدن کۏلانې اۆستۆمه داغېتدې . من اۏنو اوتوبوس دایاناجاغېنا قدر اؤتۆردۆم. گئجه ایدی. ایکیمیز ده بو گئجه‌نین بیتمه‌سینی ایسته‌میردیک. قریبه‌دیر، هله ده یئدیڲیمیز اۏ یانمېش همبئرگئرین اییی بورنومدا، اۏ دیرینگی موسیقی ایسه قولاق‌لارېمدا ایلیشیب قالمېشدې…. دایاناجاقدا اۏتورقادا اۏتوروب اوزون-اوزادې اؤپۆشدۆک .
من اۏنو بیر داها گؤرمه‌دیم. من اۏنو هئچ اونوتمادېمدا. آمّا اۏ ایستی، سئوگیلی حیسّ‌لر هله ده یادېمدادېر. نه ایسه…
ساعاتا باخدېم. 11:47 ایدی. آز قالدې.
من حاماما گؤز گزدیردیم. پار-پار پارېلدایان اۏ ایتی اۆلگۆجۆ نظره آلماساق، بو اۏتاق دۆنیا‌نېن هر یانېندا اۏلان دؤرد اولدوز هۏتئل‌لرده‌کی عادی حامام اۏتاغېندان هئچ نه ایله فرق‌لَنمیردی. آغ پیله‌ته‌‌لی دؤشه‌مه. آغ‌آپپاق سئرامیک وان، أل-اۆز یویان و توالئت. کرۏملو آسېلقاندان ساللانان دستمال’لار. دوواردان آسېلمېش آخماق شکیل‌لر. سولو بۏیا ایله چکیلمیش بیر شکیلده چېلپاق قادېن آرخا‌سې منه طرف اۏتوروب ماوی سما آلتېندا ایشېلدایان گؤله باخېردې…
منجه پیس شکیل دَڲیلدی. واختې’یلا، یئنی‌یئتمه واخت‌لارېمدا من ده یاخشې شکیل‌لر چکردیم. إکسپرئسیۏنیزم’له ماراق‌لانېردېم. شکیل‌لریم’له أحوال-روحیّه‌می، نه فیکیرلَشدیڲیمی گؤرسَتمک ایسته‌ییردیم. رسم اؤرگتمَنیم دئییردی کی، چکمه‌ڲینی داوام إله‌تدیر، تنبل‌لیک إله‌مه.
آمّا ماراغېم اؤلمۆشدۆ. داها بؤیۆمۆشدۆم. منی داها چۏخ ایش-گۆج، پول-پارا، قېزلار، ماشېن‌لار ماراق‌لاندېرېردې. یقین هامېدا بئله اۏلور.
آمّا اۏ شکیل‌لر بو گۆن ده منی ماراق‌لاندېرېر. هردن اوغورسوز شکیل‌لر گؤرنده منیم آنلام‌سېز یاشامېمېن اۏ دؤورۆ یادېما دۆشۆردۆ و من بیردن – بیره اۆزۆلۆردۆم.
نه بیلیم، أششی…
دئیه‌سن واخت‌دېر. آیاغا قالخدېم، اۆست-باشېمې دۆزلتدیم. گۆزگۆیه طرف گئتدیم، بارماق‌لارېم’لا سا‌چېما، ساققا‌لېما سېغال وئردیم. هردن اۆزۆمۆ قېرخماق ایسته‌ییرم، آمّا اۆلگۆج’له یۏخ… چۏخ تهلۆکه‌لی‌دیر…
بیرآزدان من اۏتاغېن قاپېسې‌نېن آچار’لا آچېلدېغېنې إشیتدیم. تئز وان اۏتاغې‌نېن ایشېغېنې سؤندۆردۆم. وان اۏتاغې‌نېن قاپې‌سېنې آزجا آرا‌لې قۏیدوم کی، باخا بیلیم. اۏتاغېن قاپې‌سې آچېلدې و ایشېق یاندې. اۏتاغا کۏت-شالوارلې بیر کیشی گیردی. اۏ، چۏخ یۏرقون گؤرۆنۆردۆ. کۏت-شالوارې چۏخ باها‌لې ایدی، هم ده اۏنا أعلاء یاراشېردې.
من تاپانچامې قۏبوروندان چېخارتدېم و سس‌بۏغانې لۆله‌نین اوجونا تاخدېم. وانېن قاپې‌سېنې آچدېم.
کیشی معطَل-معطَل منه باخېردې. من اۆچ دفعه اۏنون سینه‌سیندن، بیر دفعه ده باشېندان ووردوم. کیشی تاپپېلتې ایله یئره یېخېلدې. اۆزۆنده حئیرَت-قارېشېق بیر تعجّۆب ایفاده‌سی واردې.
سس‌بۏغانې آچا-آچا کیشییه باخدېم. قان لکه‌لری خالچانې پیس گۆنه سالمېشدې.
من هئچ بیلمیردیم کی، بو کیشینی هانسې گۆناهېنا گؤره اؤلۆمه مَحکوم إله‌میشدیلر؟ اۏنون کیم اۏلدوغونو، نه‌چی اۏلدوغونو دا بیلمیردیم. آرواد-اوشاغې واردې، یا یۏخ؟ آتا‌سې-آنا‌سې کیم‌دیر؟
بیلمیردیم کی، ایلک محبّتی کیم اۏلوب؟ یادېندایدې، یا یادېندا دَڲیلدی؟
تکجه اۏنو دقیق بیلیردیم کی، صاباح سَحَر آلا-قاران‌لېقدا پول’لا دۏلو سارې بیر پاکئتی چؤل قاپېمېن آلتېندان ایچه‌ری آتاجاقلار. بونو لاپ دقیق بیلیردیم…
بو دا منیم گۆنۆم – ساعاتېم!!!
من نیفرت إدیرم بئله یاشاما!..
نئیله‌ییم إئ، بو دا منیم یاشامېم‌دېر دا…
گۆناه‌لارا بولاشا-بولاشا یاشایېرام اؤزۆم اۆچۆن.
أششی، إئ، تۆپۆرۆم بئله گۆنه-کئچینیشه…
Yazını bu əlifbada oxuyun: TÜRKCƏ
بَنزَرگه‌لر / Bənzərgələr
منیم إرمنی اۏغلوم / آکشین خیال (رۏمانېن بۆتۆنۆ)
ایکی یاشلې کؤرپهنین آجې حیکایهسی / واریث یۏلچویئو…
بوز / اومان میانالې (حیکایه)
جزا / سئوینج إلسئور (حیکایه)
ایلان / رحیم علییئو (حیکایه)
یالقېز إو / سحر روحی (حیکایه)
قار دنهلری / آیناز بزرگان (حیکایه)
قایېدېش / إسمیرا حۆسئینلی (حیکایه)
قۏرخو / امین ناصری (حیکایه)
