یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
مۆباریزه‌نین تن‌تنه‌سی…/ أفروز سئییداۏوا
نه یۏلون أوّلی بللی ایدی، نه سۏنراسې. اۏتوروب دۆشۆنمه‌ڲه ایسه ذرّه قدر نه واخت واردې، نه ده صبر.. سوسدوغوم قدر دانېشېردېم أصلینده. إشیدن یالنېزجا ربّیم’ییدی روحومون هارایېنې.. رنگ‌لرین آهنگدارلېغېنې قۏرویا بیلمه‌میشدی دوعا‌لارېم. گۆنَشدن قۏرخان اینسانې یا آغاج قۏرویار، یا بولاق… نه بولاغېم وارې’یدې، نه آغاجېم. اۏنسوز دا گؤزۆمۆن اؤنۆنده إله بولاق دا، آغاج دا گۆنَشدن دالدالانماغا قایا آختارېردې..
یئریینده تۏرپاق آیاغېنېزې قوجاقلایاجاق دئیه بیر حیصّه قاپېلمېش‌لېغېنېز وار’سا أڲیلیب تۏرپاغې اؤپۆن، بۆتۆن قاپې‌لار سۏنونا قدر آچېلاجاق اۆزۆنۆزه ..
اۆستۆمۆ باشېمې دَڲیشدیم اینسان‌لاردان… هره‌سینی چېخارېب اؤز یئرینه آسدېم. یئنی اینسان‌لار گئیینمک اۆچۆن جېغېرېمدان، یاغېشېمدان، گۆنَشیمدن، قارېمدان و کۆله‌ڲیمدن، بیر ده اوشاق‌لېغېمدان حلال‌لېق آلدېم. روحومدا تانرې، قلبیمده سئوگی، دیلیمده دوعا.. یۏلوم’سا اوزاق‌لارا، لاپ اوزاق‌لارا..
داش اۏلدوغو یئرده آغېر دَڲیل أصلینده، چۏخالماقدان قۏرخاقلاشاندا داش تۏرپاغېن باغرېنې یارالایېر، تۏرپاق دا داشې أبَدی‌لیک داشلاشدېرېر… قارالېر داشېن روحونون رنگی، سۏلور گۆنَشی، چات-چات اۏلور سۏیوق قاران‌لېغې… داشلاشېر داشېن اۆره‌ڲی.
گؤتۆرۆن داشېنېزې آتېن اؤزۆنۆزدن اوزاغا.. سئوگی’یله، سئوینج’له قارشېلانان تۏرپاقدا داشلاشېن.. هم اۆرکک، هم چېلقېن، هم اوتانجاق بیر داش پارچاسې‌نېن یۏلو هامار دا اۏلور، کَله-کؤتۆر ده…
چاتدېم… دوعامېن روحومدا دۏغولدوغو، اؤزۆمۆن اؤزۆمدن اۏیاندېغې یئره…
أفروز سئییداۏوا
Yazını bu əlifbada oxuyun: TÜRKCƏ
