پنجره‌میزین خبری / آرش ساعی

پنجره‌میزین خبری / آرش ساعی

چاغېرمېشدېلار منی اۏ گۆن
گئتدیم
باغېردی
تۏپراقدان سۏردو
تۏمورجوق‌لارېنې اۆزۆمه چېرپدې
گۆل‌لرینی یۏلدو

باغېردې
بایراقدان سۏردو
کؤینه‌ڲیمی جېردې

باغېردې
مین دفعه هر بیری…
سؤیله‌دی بیری:
– قانېم قانېندان داها آل‌دېر بو یئرلرده
شعرین’سه چاققال‌لارې جنازه‌ن اۆستۆنده رقصه گتیرَن شؤلن‌دیر – دئدی اۏبیری
سؤیله‌دی بوغلو کیشی:
– أسارَتیم‌دیر سنین آدېن!
قېزېل گۆلۆ قېرخا قاچلایان قېلېنج!

منی چاغېران گۆن
قۏرخموشدوم
یالان دئمه‌سم یوخولارېمدان دا إعتیراف إتمیشدیم اۏنلارا
سن هله’یدی باهاردان دانېشېردېن
بیر دفعه‌سینی اونوتمام!
گئتمیشدین اۆز سالاسان، یاغېشې تاپشېراسان گۆنَشه!
بلکه گئری گلدی دئیه!
تارلا یئنی‌دن بئجَردی یئنه!
من دۆنیانېن بۆتۆن پنجره‌لری‌نین دالېسېندان سنی گؤرۆردۆم…
اوزاقلاشارکن
من سنین دامارلارېنې گؤرۆردۆم
ایپک دۏنونون آلتېندان،
قایېدېب أسکی یارالارېمدان تَلَسدیک‌لرینی
گؤرۆردۆم
بلی! من گؤرۆردۆم
آچېنجا پنجره‌نی
بیر تایې ساغا دؤندۆ، بیری سۏلا
باغېرانمادېم
چاغېرانمادېم
گۆنش ایکی‌یه بؤلۆنۆردۆ، گؤرۆردۆم
بولود ایکی‌یه بؤلۆنۆردۆ، گؤرۆردۆم
گؤرۆردۆم، سن ایکی‌یه بؤلۆنۆردۆن
پنجره‌نی آچېنجا من
هئچ بیر یارې منیم دَڲیلدی!
سنی گۆنَشی بولودو حتتا… اۏ قوشو بئله
ایکی‌لَمیشدی پنجره!

منی چاغېران گۆن
بازار اؤز ایشینده’یدی إشیتدیم
تاکسې‌لار سارې خبرلر وئریب مین تۆمن آلېردېلار
و حتتا…
سئویشمک قرارېنا گلمیشدیلر چؤهرایې بیر اۏتاغېن ذئهنینده ایکی‌سی
سن، من‌سیز ده باهارې دۆشۆنه بیلیردین اۏ گۆن‌لر

آچېق دئسم
قاپې، گئری گله‌بیلمه‌مک اۆچۆندۆر-منجه
و منیم اۆزۆمه چېرپېلان تبریزین قارا قاپې‌سې وار
باهارېن اۆزۆنه چېرپېلان بیر فصیل!

منی چاغېران گۆن
راستلادېم پایېزدان قایېدان بیر آغاجا
بیر یارپاق آرزوسو قالمامېشدې باشېندا داها
بوداق‌لارې
سانکی دۆشمۆشدۆ گۆنَشین تپیک‌لری آلتېنا
سۏنرالار…
گؤلگه‌سیندن خبریم اۏلمادې
نه باهار
نه یای!
گؤوده‌سینی قورودان قارقالارېن حسرتینده
اۏتورمادې حتتا قار
مڲر پنجره‌میزین خبریندن ساوای!..

Podcast: Play in new window | Download