شوبهه / بهروز صدیق

الیمده داریخیر یازدیغیم قلم،
سنین حسرتیندن، سنین بیر دنه‌م!
من یولو قایالی اوره‌یی داغلی،
آغری ییخیلمیشی قوللاری باغلی.
ییخیلمیش دیله‌ییم “جانسیز کؤلگه‌ده”،
گلیشین گؤزله‌ییر گولمز اؤلکه‌ده.
قاپالی قاپی‌دان، پنجره‌لردن
هارای قامچیلامیش حنجره‌لردن،
باخاراق هیچقیریر بیر دلی شاعیر،
وارلیقدان آجیقلی گیلئیلی شاعیر.
آغلاییر گؤزوندن کسیلمیر یاغیش،
بوروموش یوللاری یوللارجا قارغیش.
بیر پاپریز اودلاییر بوشلوغو ییخسین،
بو تشویش یوردوندان بیر یانا چیخسین.
ال آتیر سمادان دره اولدوزو،
درمه دور!:سؤیله‌ییر گؤیلرین قیزی.
اؤیره‌نیر قارانلیق آدلی دهشته،
پامبیق خیالینی باساراق شته،
چورومک یوردونا آتی یهرلی،
گؤزلری کینلی‌دیر فیکری قهرلی.
دوشونور دورغونلوق اوجوز اؤلومدور،
هر جیغیر هر بیر ایز ایپک یولومدور.
سئوینمک داغلارین آرخاسیندادیر،
کدر آغاج اوسته جوما قارغادیر.
دورغونلوق اؤلومدور، حرکت سئوینج،
یوللاردا حیاتیم کئچه‌جک‌می دینج؟!