عاغېل باشقا، اۆرَک باشقا / بختیار واهابزاده
بیر-بیرینه بنزه‌سه ده،
یئل باشقا‌دېر، کۆلک باشقا.
عطری ده خۏش، رنگی ده خۏش
گۆل باشقا‌دېر، چیچک باشقا.
هر دیکی یۏخوش بیلمه، گل،
هر مئیی مئیخۏش بیلمه، گل.
هر اوچانې قوش بیلمه، گل
قوش باشقا‌دېر، بؤجک باشقا.
هر دردینه اۏرتاق منم،
هر آغرېنې تن بؤله‌نم،
سن چَکَنسن، من گله‌نم
گمی باشقا، یئدک باشقا.
حاقّېن یۏلو-اؤز یۏلومدور،
أڲیلمه‌ین دۆز یۏلومدور،
خئییر’له شر ساغ – سۏلومدور
شئیطان باشقا، ملک باشقا.
بیر دیله‌یه من جالاندېم،
گاه قازاندېم، گاه تالاندېم،
عؤمرۆم بۏیو هاچالاندېم
عاغېل باشقا، اۆرَک باشقا.
دیلَک اۏلدو منیم آدېم،
پروازلاندې قۏل-قانادېم،
چاتمادې صبریم، عینادېم
عمل باشقا، دیلَک باشقا.
Yazını bu əlifbada oxuyun: TÜRKCƏ
