دۆنیانېن نه گؤزَل واختې گؤرۆشدۆک / زلیمخان یعقوب
أریدی حَسرَتیم، آچېلدې بوزوم،
جَنّت عطری وئردی چؤره‌ڲیم، دوزوم.
گئتدی قار-بۏرانېم، گلدی نۏروزوم،
آللاه اۆزۆمۆزه باخدې، گؤرۆشدۆک.
اۆز-اۆزه دایاندېق، گؤز-گؤزه دوردوق،
دۆنیانېن نه گؤزَل واختې گؤرۆشدۆک!
قارېن قار عطری وار، بارېن بار عطری،
بیر چیچک عطری وار، بیر ده یار عطری،
آرزې‌لار دالغاسې، دویقو‌لار عطری،
اۆرَکدن-اۆره‌ڲه آخدې، گؤرۆشدۆک،
دۆنیانېن نه گؤزَل واختې گؤرۆشدۆک!
قوربان کسیلیرم من بو آخشاما،
دانېشدېن دیلیندن بال داما-داما،
سَنین‌تک ایشېغا، منیم‌تک شاما،
طالئع اؤز اۏدونو یاخدې، گؤرۆشدۆک.
دۆنیا گؤزَل‌لَشیر گؤزَل گۆلنده،
دۆنیانېن نه گؤزَل واختې گؤرۆشدۆک!
آباد‌لېق گتیردی بیر ویران‌لېغا،
گلیشین سۏن قۏیدو لال قاران‌لېغا،
زلیمخان یئنه ده چاتدې خان‌لېغا،
گۆلدۆ گؤزَل‌لیڲین تاختې، گؤرۆشدۆک.
آی سلام گؤندردی، گۆن أحسَن دئدی
دۆنیانېن نه گؤزَل واختې گؤرۆشدۆک!
25 مارت 2000
Yazını bu əlifbada oxuyun: TÜRKCƏ
