قۏشابولاق پۏئماسې / دومان بختیاری
باشلانېرام إلدن– إله گلم من
بو تۏرپاغېن گؤز ياشېنې سيلم من
ايستهميرم ياد إللرده اؤلم من
هر نه اۏلسا من اۏنونام اۏ منيم
قۏشابولاق– وطنيم دير…و…(تن)يم
قۏشابولاق سرين سويون جۏشاندا
مئه تؤکۆلۆب دال زَمی‌دن آشاندا
«قۏجا بابام» سنه ماهنې قۏشاندا
سئوينَرديک ياغېش اۏلسون ياز اۏلسون
مجلیسلرده سؤز دانېشان ساز اۏلسون
ایللرکئچیر داها منده دؤزۆم يۏخ
سنسيز منيم ناغېلېم يۏخ، سؤزۆم يۏخ
من یانېرام،کۆل اۏلورام کؤزۆم يۏخ
زامان كئچيب إليميزده قالان كيم؟
كئچميشلری يادېمېزا سالان كيم؟
قۏجا يوردوم كؤكۆمۆزو قازدېلار
يازېمېزې قاران‌لېقدا يازدېلار
چۏخ آداملار كېرېخدېلار آزدېلار
بوراخدېلار إل-اۏبانې گئتديلر
غوربت إلده قالدې بيزيم كتدی‌لر
باهار فصلی چيچکلرين سۏلماسېن
آنالارېن گؤزۆ ياشا دۏلماسېن
منيم عؤمرۆم بيرگۆن سنسيز اۏلماسين
گۆوهنیرم کئچمیشینه باخاندا
«اۏيوخلو»دان قېزېل بالېق آخاندا
قۏيون چېخېم اۏيوخلونون باشېنا
قوربان اۏلوم تۏرپاغېنا داشېنا
نظر سالېم كئچميشينه ياشېنا
اۏيوخلودا اۏجاق يانار كؤز قالار
باش قالدېران زيروهسينده گؤز قالار
گۆنش قالخېب دان یئرینی سؤکنده
قاران‌لېغېن قامتینی بۆکنده
بیزیم« ولی» خَلوَر ایپین چکنده
«خانپری»دن کندین گۆنۆ چېخاردې
باش قالدېرېب یوردوموزا باخاردې
«قارۏوول» دا یۏرقون گۆنش باتاندا
اوزاق گؤڲـده آيی اولدوزا چاتاندا
«تيكيلیداش» يېخېلاندا ياتاندا
بيز يوخودا خزينهميز تالاندې
سينهميزه بير پارچا اۏد قالاندې!!!
آنا يوردوم «داشبولاغ»ېن آلماسې
«ننهقېز»ېن آرپا-بوغدا يۏلماسې
خرمنلرين بۏشالماسې دۏلماسې
خيالېمدان خَلوَر–خَلوَر آسلانار
هردن منيم كيپريکلريم ايسلانار
قاپېمېزدا قۏيون-قوزو مَلَردی
سۆرۆ–سۆرۆ قارۏوولدان گلردی
«قۏجا ننهم» كۆرۆشنهنی اَلَردی
ايندی آما مَلَرتی يۏخ، قوزو یۏخ
آيرانلارېن دادې، تامې، دوزو يۏخ
هردن إله قارق اۏلورام اؤزۆمده
خاطیرهلر دالغالانېر گؤزۆمده
کدَرلَنیر لپیریم ده ایزیم ده
بو تۏرپاغېن خاطیرینه دَڲمهیین
آی کیشیلر یۏلونوزو أڲمهیین
چۏخ كيشیلر گۆنشكيمی باتدېلار
چۏخ كيشیلر يېخېلدېلار ياتدېلار
چۏخ کیشیلر اؤزلرینه چاتدېلار
قاران‌لېقدا اولدوز كيمی سۆزدۆلر
هر آخېمدا باغرېمېزې اۆزدۆلر
قایتارېرام اوزاقلارا اؤزۆمۆ
آختارېرام کچمیشیمی ایزیمی
«ایمامیار»دان باشلایېرام سؤزۆمۆ
اۏ کیشی‌نین گؤڲلۆ-گؤزۆ تۏخایدی
إلیمیزده اۏنون تایې یۏخایدی
«میرزه عزیز» سارسېلمایان داغایدی
اۏنون اۆزۆ بو دۆنیادا آغایدی
اۏندا هله «جعفر بابام» ساغایدی
یېغېلاردېق کۆرسۆسۆنۆن باشېنا
گؤز تیکردیک اۆزۆڲۆنۆن قاشېنا
«حبیب دایی» آذان دئییب یاشاردې
اۏنون سسی سېنېرلاردان آشاردې
اۏجاق اۆسته چایدانلارې جۏشاردې
«مرجان خالام» ساچلارېنې هؤرَردی
اۏووج-اۏووج بیزه ایڲده وئرَردی
«علی بالا» یاشېل کؤینک گئیَردی
دسته باشی حۆسئین-حۆسئین دئیَردی
اوشاق ، قوجا، هامې اۏنو سئوردی
اۏ کی گئتدی دسته باشې داغېلدې
یاشایېش دا، أفسانهدی ، ناغېلدې
من گؤرنده«خیدمت‌علی» قۏجا’یدې
قۏجالمېشدې آما قددی اوجا’یدې
دام‌لارې‌نېن اۆستۆ باجا-باجا’یدې
چرشنبهده اۏردان شالې سالاردېق
أنیب گئدیب پایېمېزې آلاردېق
کندی گَزیب کندخودانې گؤرمهدیم
سېنېق سازېن تئللرینی هؤرمهدیم
«کَلَکلی»دن بیرجه چیچک درمهدیم
مشهد«فتّاح» یادا دۆشدۆ دارېخدېم
بو بندده بئش-اۏن دفعه قارېخدېم
«عبدۆل» عميم دام اۆستۆنده دوراردې
هردن بيزی آلداداردې ووراردې
اوشاقلارې اينجيدَردی يۏراردې
بيزده گئديب داملارېندا قاچاردېق
اۏنو گؤرجک يئللهنرديک اوچاردېق
بايرام اۏلوب «دانقاتدې»-نې قوراردېق
آشېقلارې بير–بير گئديب ووراردېق
اودوزانېن قولاقلارېن بوراردېق
«ناييب» داييم آستانادان چېخاردې
كورَنپهنی دالېمېزجا سېخاردې
قېش گئجهسی «جبرايېل»ېن سؤزلری
ناغېللارې ، يالانلارې ، دۆزلری
هر نه ايدی گۆلدۆرَردی بيزلری
اوزاناردې مۆشلۆڲۆنۆن تۆستۆسۆ
نه دادلېدې كۆرسۆلرين ايستی‌سی
«إیشان» عمی قۏروقچولوق إلَردی
دۏلاناردې داغ-درهنی گلَردی
دانېشاردې گۆلدۆرَردی گۆلَردی
درد ألیندن چوبوغونو چَکردی
دالدالانېب گؤزیاشېنې تؤکَردی
«سلیمخان»ېن دؤوره بؤرکۆ یاد اۏلسون
ایستهییرم اۏنون روحو شاد اۏلسون
بیزدن قالان کاش دَڲـَرلی آد اۏلسون
بیز گئده‌ریک عَمَلیمیز قالاجاق
گؤرَن بیزی کیملر یادا سالاجاق؟
«حاجی قولو» قورآن درسی وئرَردی
اۏ دۆشۆنۆب اوزاقلارې گؤرَردی
اۆرهڲینی قېزېل گۆله سَرَردی
ایتیرمهدی کئچمیشینی اؤزۆنۆ
إل یۏلوندا هارای چکدی سؤزۆنۆ
اونودولماز داغ کیشیلر إلیمده
سارالماسېن یارپاغېم دا گۆلۆم ده
«مَدَد» دایې گزیر منیم دیلیمده
قۏشابولاق مرد ایڲیدلر بسلهدین
دار گۆنۆنده إل اۏبانې سسلهدین
قوروماسېن اۏیوخلونون درهسی
یۏلا دۆشسۆن خرمنلرین جرهسی
«باجیقېز»ېن سارې یاغې کرهسی
چۏخلارې‌نېن داماغېندا دادې وار
اؤلۆب گئدن آداملارېن آدې وار
یادېمدادېر اوشاقایدیم اۏندا من
سوسوزوندان قۏورولموشدو چؤل چمن
جان وئریردی آغجاگؤلده یاسمن
«نازَن ننه» سېزیلدادې آغلادې
بولودلارېن اۆرهڲینی داغلادې
قارا گرمیج کند-کؤوشنی قۏووردو
«سیفاله»نېن تۆکۆن گؤڲـه سۏووردو
تک اؤکۆزۆن کنده‌سارې قۏووردو
هاوا دۏلدو یاغېش یاغدې چایلادې
اؤکۆزۆنۆ کسیب قوربان پایلادې
باخېن بئله کیشیلری نئیلهدیک
تمَددۆنۆن ساققېزېنې چئینهدیک
گۆله-گۆله یارامېزی گؤینهدیک
قۏیوب گئتدیک إل-اۏبانی اؤتۆردۆک
بیله-بیله اؤزۆمۆزۆ ایتیردیک
اینانېرام تۏرپاق چَکَر گتیرَر
بو مثلدیر کالاه قانقال بیتیرر
أصلین دانان هر بیر زادېن ایتیرَر
بو تۏرپاغېن اۆره‌ڲینده قالان بیز
آغرې‌سېنې قاداسېنې آلان بیز
«یۏرقون»ــا باخ یۏللار اۆسته دۆزۆلۆر
«یارای» هله یار دردی’له اۆزۆلۆر
«کهریز» آخېر گؤزلریمدن سۆزۆلۆر
«بولود» قالخېب داغدان داغا سۆرۆنۆر
یازېق«دومان» إل دردینه بۆرۆنۆر
«قېرخ بولاق» وار بو تۏرپاغېن جانېندا
آیاق توتور دامارېندا قانېندا
بیرجه لحظه کیمسه قالسا یانېندا
درین-درین بو سسلری دویاجاق
گؤزلرینه
قۏشا
بولاق
قۏیاجاق
بَنزَرگه‌لر / Bənzərgələr
قاییت / دومان بختیاری- توتساق دیلیمیز / دومان بختیاری (شعر)
- آغلاما ببـهگيم / دومان بختیاری
- یارالی قاطار / دومان بختیاری
باغرې قان اۏلموش تۏرپاغېم / دومان بختیاری
حؤرمتینی یاخشې ساخلا بو إلین / دومان بختیاری (شعر)- اوزون قوللاریندا یئریم هاردا دیر؟ / دومان بختیاری
دومان بختیاریدن تۆرکجه شعر تۏپلوسو، تبریزین کیتاب…
بو آخشام شعریمده خوش گؤردوک سنی / دومان صفر اوغلو
