یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
اۏ / قېزبستی سولطان
آز قالا هر گۆن قارشېلاشېردېم اۏنون’لا . بو منه ده خۏش گلیردی، گلمیردی دئیه بیلمه‌رَم .یئگانه وار‌لېق ایدی کی، اۏنو گؤرمکدن هئچ بئزمیردیم . بلکه ده بو بئزمه‌مک اۏنو گؤرمه‌ڲه آلېشقان‌لېغېمدان ایره‌‌لی گلیردی .
بیلمیرَم…
ساده‌جه بیلدیڲیم بیر شئی وار کی، اۏ منیم اۆچۆن بام-باشقادې .
آی‌لار اؤتدۆکجه نئجه دَڲیشدیڲینی آچېق آیدېن گؤرۆرَم. بعضی‌لری کیمی ایکی اۆزلۆ دَڲیل. اۏنون دؤرد اۆزۆ وار. آمّا بیلیر‌سیز دؤرد اۆزۆنۆ ده هر زامان آشیکارجا اۏرتایا قۏیور. ایکی اۆزلۆ‌لر کیمی آرخادان ایش چئویرمیر اۏ . اۏ دا منیم کیمی پایېزې چۏخ سئویر. حیسّ إدیرم. چۆنکی پایېز گلنده اۏ یان‌یؤوره‌یه فرقلی بیر گؤزَل‌لیک فرقلی بیر آکوستیکا قاتېر. اۏ دا منیم کیمی یارپاق‌لار تؤکۆلنده اؤزۆندن بئزیر سانکی . سۏلقونلاشېر ، اؤز عالَمینده یارپاق‌لارا یاس ساخلایېر. چۏخ حاق‌سېز‌لېق‌لارېن شاهیدی اۏلور، چۏخ گؤزَل‌لیک‌لره گؤز یۏلداش‌لېغې إدیر. دئمک ایسته‌دیک‌لری بیر اۏردو کیمی یېغېلېب اۆستۆنه جومور. آما اۏ سوسور ، داها دۏغروسو بۏغولور سوسقونلوغو ایله. ایچی نیطقی چۆرۆدۆر اۏنو منیم کیمی. دانېشماق اۆچۆن هئچ بیر ایمکانې یۏخدور ، اۏنون اۆچۆن سوسماغې سئچیر. بیر گۆن عزرائیل بالتا ووراجاق عؤمرۆمۆن کؤکۆنه و یېخېلېب دۆشه‌جه‌ڲَم مزار آد‌لې اۏدونلوغا. بیر گۆن اۏنو دا کسه‌جَکلر، بالتا ووراجاقلار کؤکۆنه دۆشۆب گله‌جَک یانېما . حتتا اینانېرام منی إله چۏخ سئویر کی، آرمود آغاجېم منه قۏووشسون دئیه قوروماق اۆچۆن ألیندن گله‌نی إده‌جک…
قېزبستی سولطان ( 02.03.2019)
Yazını bu əlifbada oxuyun: TÜRKCƏ
