یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
40-نجې سېناق / آیهان میانالې
40-نجې دوراغېن ایلکین سېناغېنې کئچیرمکده‌یم!
سؤز بئله باشلایېر، قېسا و آپ-آیدېن.
هر دۏغولدوغوم آن، آنامې خاطېرلایېب، ایچیمده‌کی یاشانتې‌لارا دۆشۆنۆب، دۏیونجا فیکیر‌لره دالېرام.
وطن آد‌لې بیر وطن‌سیز‌لیڲین ایچینده، غریبسه‌دیڲیم ساعات‌لار، قاندال-قاندال بارماق‌لارېمېن ایزگه‌‌لرینی دوستاقلې گؤرۆرَم.
آرتېق سارې ساچ‌لارېم دَڲیل، آغ-آپپاق یۆنه اۏخشار ساچ‌لاردان سؤز گئدیر.
آرخاما باخېب بو نئچه ایلین یاساقلې-درد‌لی گۆن‌لرینی نئجه کئچیردیڲیمی دۆشۆندۆکجه، ایچیمده‌کی نه‌دن‌لرده بوغولماق کیمی حیسّ‌لرین یاشانتې‌لارېنا قاپسانېرام!
نئجه بو یۏلا دۆشدۆم، و نه‌دن!؟
ایل‌لرین اوزونو چۏخ اوزادې بو فېرلانتېلې یاشامې و سۏنونجو شامدان قاچان کیمی عیساسېز یوهنّانېن باغرېندا چاتلادېم.
40 ایل بوندان قاباق، إله بوگۆنکۆ گۆنۆن بو ساعاتېندا، مین درده بۆرۆنرکن، آنام منی بو دۆنیایا تاپشېرېب، بو تاپشېرېغېن آردېندان، منیم گلیشیم’له، دردین بۆتۆن پرده‌لرینی سېزلایېب، اؤته‌سیز گله‌جَک اۆچۆن، اؤزۆنۆ قاندېردې.
آغلایېب آغلاتدېم اۏ گۆن‌لرین گۆنده‌مینی. یاواش-یاواش گۆلمه‌ڲی اؤرگه‌نیب، یاشامېن گؤڲ‌قورشاغېنې شکیل دفترلرین باش صفحه‌لرینده چکیب، اؤته‌نین سوسموش گله‌جه‌ڲینه گۆلۆمسه‌مه‌ڲه چالېشدېم.
اۏ گۆن‌لرین ایزگه‌‌لریندن دانېشماق اۆچۆن، بیر کیتاب دَڲیل، مین کیتاب یازماغېم گَره‌کیر…!
بو گۆنۆن دردی آشېرې اۏلدوغوندا، کئچمیشین کدَ‌رینی اونودوب، ألیمه قلم آلېب یازماغا باشلادېم.
40 یاشېم اۏلدوغوندان دۏلایې، اؤزۆمده بو حاقّې گؤردۆم بوگۆنکۆ دردلرین حیکایه‌سینی یازام!
سؤز بیر یۏلدان باشلادې، بیر مۆقَدَّس یۏل!
داها دۏغروسو، قورتولوش یۏلو!
یۏلوموزون داشې وار، پالچېغې وار، آیاغا باتان تیکانې وار دئمیشدیلر!
یۏلوموزدا اؤلۆم وار، دؤنۆم یۏخدور دئمیشدیلر!
بو یۏلدا شرف وار، اینسان‌لېق وار، جاندان-مالدان کئچمک وار!
بو یۏلدا شهید اۏلماق، قورتولوش، قازانج، باشارې‌دېر دئمیشدیلر!
بو یۏل اؤزگۆرلۆڲۆن، باغېم‌سېز‌لېغېن یۏلودور دئمیشدیلر….
بو یۏل………
بیزیم یۏلا نه گلدی، نه اۏلدو بو یۏلا؟
یاواش-یاواش شعره-شؤهرَته دالدېق، شهری اونودوب شؤهرَته باتدېق. بورانې، جان وطنین دردینی بوراخېب، آد دردی‌نین ساواشچې‌لارې اۏلدوق.
آرتېق باشلادېق بیر-بیریمیزی أزیب، اۏنون-بونون چیڲینیندن چېخېب اوجالماغا!
مینیک وئرمه‌ین‌لری أزدیک، اؤلدۆردۆک، مینیک وئرن‌لرین ده باشېنا بیلدیڲیمیز اۏیون‌لارې گتیردیک.
داها یۏل ایتیب دومان‌لارېن باغرېندا چاتلاماقدا’یدې.
شهید‌لیک بیزه فخر اۏلان چاغېن باشېنا گلَن، گلمیشدی.
آرتېق اؤزۆمۆز اؤلدۆرۆب أزمه‌ڲه اینجارېمېز بۏ-بۏل وارې’یدې.
وطن دَڲیل، خالقېمېز یاتمېشدې. بو یوخونون شیرینلی-آجېلې هینکه‌سیندن اۏیادان بارماق‌لار دوستاقلانېب، سۆرگۆن‌سَییردیلـر!
دیلیمیز بو شعر-شؤهرَت باسقې‌سېندا أزیلیب، داغېلماقدا’یدې!
شۏوۏنیزمه گَره‌کن بیر قارشې‌لېق لازېم دَڲیلدی.
اۏنلار (سیز اۏخویون پارس شۏوۏنیزمی)، گؤزَل باجاردېلار بیز‌لری یۏلوموزدان آزدېرېب، کؤکۆمۆزۆ قورودا‌لار.
بیر سۆرۆمۆز جالای-وطن دئییب جان‌لارېنې اۏووج‌لارېنا آلېب یوردو-یووانې، دۏغما دییارې ترک إتدیلر.
بیر سۆرۆ‌لریمیز دوستاق‌لارا قاپساندېرلېب، وارلېق‌لارېنې أزینتی‌لرین باغرېندا داملا-داملا اؤلۆمسه‌دیلر، و بیر سۆرۆ‌لریمیز درد ایچینده مله‌ییب هر گۆن ایچ‌لرینده مین کره اینتیهار إتدیلر….
آما سؤز بوردان آجېلاشېر:
چۏخ‌لارېمېز شاعیر اۏلدوق!
وطنی، بو مۆقَدَّس آنانې اونوتدوق، یۏلوموزدان آزېب هر شئییمیزی مین خرمَنین سامان‌لېغېندا، سۏووردوق.
دیلیم-دیلیم شعر‌لریمیزده باغېرېب، ایچ بۏشلوق‌لارېمېزې دۏلدوروب بو درد‌لی وطنین آدېندان چؤرک قازانماق اۆچۆن، آنا دۏغما یوردوموزون کۆره‌ڲینه، آرخادان بالتانې ووردوق.
وطنی اونودوب، دیلیمیزین بازار‌لېغېندا، اؤزۆمۆزه آد قازانماغا باشلادېق.
بیریسی اۏنو ووردو، اۏ بیریسی ایسه بونو، وور-ها-وور ساواشېندا دیلیمیزی، دیلیمله‌ییب بو چیرکین ساواشېن شن‌لیڲینده یئدیک. سوسوب لال اۏلدوق. قۏرخاق اینسان‌لار کیمی دَڲیل، هر شئیینی اونودوب ساتېشا قۏیان کیمسه کیمی، بازارا چېخېب، وار‌لېق‌لارېمېزې ساتدېق!
مین قورتوملوق سئودانېن یۏلوندا شهید دَڲیل، شهید إتدیک وطنه چېرپېنان اۆرَک‌لری!
وطن عسگرلری آرتېق أفسانه سایېلېر سانکې.
وطن نه‌دیر آخې!
ایکی اۆزلۆ اۏلدوق، یالان دانېشدېق، اۏنلار(!!!!) ایسته‌ین اۏلدوق.
آسېلېب، آسئمیله اۏلدوق. ایچدن بۏشالېب، شوعار اۏلدوق!
هارای-هارای من تۆرکم دئییب، ایچ بۏشلوق‌لارېمېزې باجې-قارداش اؤلدۆرمه‌سیندن بۏشالتدېق.
یالان چئوره‌نین، یالانچې‌لارې اۏلدوق. بۏشو-بۏشونا شیشیب، شیشدیردیک.
دیلیمیزی-یوردوموزو ساتدېرېب، کافه‌لرده، أنجۆمن‌لرده تۏپلانېب، مۏدئرن-مۏدئرن شعرلر یازدېق!
یئنه شعر یازدېق وطنین اؤلۆمۆنه، هئچ اوتانمادېق، قاتیل اۏلاراق قاتیل‌لری قېنایېب، لعنت إتدیک کافه‌لرده یازان هذیان‌لارېمېز’لا!
من آرتېق 40 یاشلې آرزې‌لارېنې مین مزار‌لېقدا قویلایان بیری‌سی‌یم.
ایچیمده‌کی مزار‌لېقدا، داها یئنی آرزې قویلاماق اۆچۆن یئر قالمایېب!
سؤز وئرمیشدیم اؤزۆمه، اۏغلوما، دیلیمی دوستاقدان قورتاراجاغام، إده بیلمه‌دیم! اۆزگۆنم!!!!
اۏغلومو، جانېمې-جیڲَریمی اؤزگه دیلینده اۏخوتدوم، آغلادېم، سېزلادېم، سوساراق دردلریمده، هر اۆزگۆن چاغېمدا باغېرېب آسېلدېم.
آنام باغېشلا منی!
بالام باغېشلا منی!
إلیم، دیلیم، خالقېم، باغېشلایېن منی.
ألیمدن گلن‌لر إله بونلار’ېیدې.
ایندی بو یاشدا گئری‌یــه باخېب، گله‌جکده آسېلېرام.
بو کۆتله‌نین منجیل‌لیکدن قورتولوشونو اومورسامېرام. بو کۆتله‌نین دوروموندان باغېم‌سېز‌لېق اییینی حیسّ إتمیرَم.
40-نجې سېناغېن سۏنوندا باتان من اۏلدوم، یاتان شاعیر‌لریمیز!
گؤزَل یۏخولار، یاتان شاعیر‌لره!
ألویداع إلیمین یاتان میللتچی‌لری!
ألویداع اؤزگۆرلۆک!
ألویداع باغېم‌سېز‌لېق!
Yazını bu əlifbada oxuyun: TÜRKCƏ
بَنزَرگه‌لر / Bənzərgələr
اۏ هله دیری دیر! / آیهان میانالې (حیکایه)
سئویم رۏمانېندان بیر پارچا / آیهان میانالې
سئویم رۏمانېندان بیر پارچا (2) / آیهان میانالې
دیل و اۏنون ایچیندهکی دیبسیز دۆنیا / آیهان میانالې
اۏیاندېقجا چۏخالېرېق، چۏخالدېقجا اوجالېرېق! / آیهان میانالې
آزادلېغېن دوروشوغو / آیهان میانالې (کؤشه یازې)
یازارلار و اینتیحار - إرنئست هئمینگوئی / آیهان میانالې
یارالې بوراخېلمېش اینسان‌لار / آیهان میانالې (کؤشه یازې)
ایکیدیللیلیک و اۏنون'لا ایلگیلی قۏنولار / آیهان…
