یئنی یازې‌لار / Yeni Yazılar
آنا صفحه Ana Səhifə / ادبیات / ناموس جینایتی / هديه‌ شفاقت

ناموس جینایتی / هديه‌ شفاقت

hediyye-sefeqet-www.YeniQapi.com-

ناموس جینایتی / هديه‌ شفاقت

– دئییر گۆیا أری‌دیر. آی سن اؤله‌سن! یۆز فایېز ساخلایېر بونو.

بیزیم کندده‌ کیشی‌لر بئله‌ گیج‌به‌سَری بیر گئجه‌ده‌ إویندن چېخارېب داش-قالا‌ق إدردیلر، بونلار دا آدلارېنې کیشی قۏیوبلار…

هديه‌ شفاقت

ناموس جینایتی

قادېن أل‌لرینی یانا آچېب إله‌جه‌ دۏنوب قالمېشدې. یارې قارا، یارې قهوه‌یی ساچ‌لارې پریشان حالې’یلا آسفالت اۆستۆنده‌ آخېب گئدن قېپ-قېرمېزې قانا قارېشمېشدې.

آزجا یانا چئوریلمیش اۆزۆنۆن گؤرۆنن حیصّه‌سیندن قۏرخو- هیجاندان بؤیۆین آلا گؤزۆ پلاستیک گلین‌جیک‌لرین شۆشه‌ گؤز‌لری کیمی ایفاده‌سیز و آنلام‌سېز باخېردې…

قفیل حادیثه‌نین چاشقېن‌لېغېندان دۏنوب قالا‌ن ساتېجې قادېن بیر آن سۏنرا اوجادان قیییا چکیب اؤزۆنۆ قۏنشو دۆکانا سالدې، مۆشتری گؤزله‌یَن تاکسی سۆرۆجۆسۆ قۏرخا -قۏرخا یئره‌ یاپېشان قادېنا یاخېنلاشېب ألینی بۏینونون اۆستۆنده‌ ساخلادې. أطراف آدام’لا دۏلماغا باشلادې. سۆرۆجۆ بیر آندا اۆره‌ڲی‌نین دؤڲۆنتۆسۆنۆ بۏغازېندا حیسّ إله‌دی:

– اؤلمه‌ییب…

بو سؤزۆن دئییلمه‌سی’یله أطرافدا جانلانما یاراندې. هر کس بیر-بیرینه‌ “ساغ‌دېر، ساغ‌دېر” دئیه‌رَک خبری اؤتۆرمه‌ڲه‌ باشلادې. کیم ایسه “اسکۏرېیا زنگ إدین” دئییب چېغېردې، کیمسه‌ ده‌ “إله‌میشیک” دئییب اۏنو سوسدوردو. آغبیرچَک بیر قادېن باشېنې قالدېرېب بینایا بۏیلاندې: ”هاردان آتدې بو بدبخت قېزې اؤزۆنۆ؟” آدام‌لاردان بعضی‌لری باش‌لارېنې قالدېرېب یوخارې باخدېلار. آمّا گنج قادېنېن هاردان دۆشمه‌ڲی اۏنلارې نییه‌ ماراقلاندېرما‌لې’یدې کی؟…

کیمسه‌ یاخېنلاشېب قادېنا تۏخانماق ایسته‌ییردی کی، باشقا بیری اۏنون قۏلوندان توتوب کنارا چَکدی؛ “نئینیرسن، تۏخانماق اۏلماز، قۏی حکیم گلسین.” کیمسه‌ ألینده‌کی سو شۆشه‌سی‌نین قاپاغېنې آچېب اوزانانېن باشېندان آشاغې تؤکدۆ، بیر آندا غریبه‌ قارېشېق‌لېق یاراندې، کیمسه‌ تئلئفۏنونو چېخارېب تنه‌‌لی باخېش‌لارې نظره‌ آلمازدان شکیل چَکدی، کیمسه‌ گئجیکن تعجیلی یاردېمې سؤیمه‌ڲه باشلادې، بیر آندا پۏلیس ماشېنې‌نېن سَسی کۆچه‌نی دۏلدوردو، هاردان’سا خبر توتوب قارېشقا شیرین شئیه‌ گلَن کیمی حادیثه‌نین باشې‌نېن اۆستۆنۆ آلان تئلئویزییا‌چې‌لار بیر-بیرینه‌ قارېشدې و تعجیلی یاردېم سۏندا اؤزۆنۆ چاتدېردې.

حکیم آدام‌لارې یارا-یارا گلیب خسته‌نین نبضینی یۏخلادې، أطرافداکې‌لارې بیر آز دا ماراقدا ساخلایاجاق أدا’یلا طیبّ قارداشېنا ایشاره‌ إله‌دی کی، قادېنېن بۏینونا سارغې کئچیرمه‌سینه‌ کؤمَک‌لیک إله‌سین. سانیتارلار خَره‌ڲی ماشېندان دۆشۆرۆب گتیردیلر. حکیم بیر آن‌لېق باشېنې قالدېرېب یوخارې، بینایا سارې بۏیلاندې:

-نئچه’نجی مرتبه‌دن دۆشدۆ؟

بونو کیمسه‌ گؤرمه‌میشدی. حکیم سانیتارلارا ایشاره‌ إله‌دی. خَره‌ڲی قالدېرېب ماشېنا آپاردېلار. پۏلیس أطرافداکې‌لارې سۏرغو-سوالا‌ توتماغا باشلادې. چۏخ غریبه’‌یدی، قادېنې کیمسه‌ تانېمېردې، هئچ کیم ایندییه‌جن گؤرمه‌میشدی و حاقّېندا هئچ نه‌ بیلینمیردی. شاهید‌لرین ایفاده‌‌لری آلېندې، ساتېجې قادېن و تاکسی سۆرۆجۆسۆ أل‌لری أسه‌-أسه‌، “آللاه‌، بو نه‌ ایش ایدی دۆشدۆک، ایندی چکه‌جکلر اۏرا-بورا” دئیه‌-دئیه‌ ایفاده‌‌لری ایمضالایېب چکیلدیلر. حکیم تعجیلی ماشېنېنا یؤنلدیڲی آندا کیمسه‌ جسارت گؤرسه‌دیب:

-حکیم، ساغ قالا‌ر اۏ هۆندۆرلۆکدن دۆشن؟- دئیه‌ سۏروشدو.

حکیم بایاق‌کې أدالې حالې’یلا:

-آللاه‌ بؤیۆکدۆر، بیز نه‌ دئیه‌ بیله‌ریک – دئیه‌رَک چېخېب گئتدی…

آدام‌لار یاواش-یاواش داغېلېشماغا باشلادېلار، بینادان إنن‌لر إولرینه‌ قالخدېلار، کۆچه‌دن اؤتن‌لر یۏل‌لارېنا داوام إله‌دیلر، تاکسی سۆرۆجۆ‌لری سکی‌نین قېراغېنداکې کیچیک محله‌ چای‌خاناسېنا قایېتدېلار. پۏلیس ماشېنې چېخېب گئتدی، سَس-سَمیر کسیلدی.

قادینین بیر آز اؤنجه أل‌لرینی اوزادېب یاتدېغې یئرده‌ قان گؤللَنیب قالمېشدې، یاخېنداکې دۆکان‌لاردان بیری‌نین صاحیبی ایشچی‌سینه‌ سَسلندی:

-آ‌ده‌، آی اوشاق، بیر وئدره‌ سو گتیر آت بورا، بدبختېن قانې آخېب گئتسین، ایندی نه‌ چیبین بؤجک وار، گلیب یېغېلاجاق اۆستۆنه‌…

2

قادېن یئنه‌ مطبخده‌ دۏنقولدانېردې. قاب-قاجاق چېرپېلېر، سیییرتمه‌‌لر حیرص’له‌ آچېلېب باغلانېردې. گلین ألینده‌کی بۏشقاب‌لارې سۆفره‌یه‌ دۆزه‌-دۆزه‌ قولاغې سَسده‌ أری‌نین گلیشینی گؤزله‌ییردی: “گلیب چېخسا’یدېن بیر، بونون دا سَسی کسیلردی.. نه‌ آزار اۏلدو منیم جانېما، نه‌ وئریب بو آلا بیلمیر مندن؟”… قایناناسې ألینی یئمک قازانېندان چکیب آجېقلې گؤزلرینی گلینی‌نین اۆزۆنه‌ زیلله‌دی:

-سَحَردن یویولوب دورور بو پالتارلار، نه‌ زامان هاوایا وئره‌جکسن، نه‌ زامان قورویاجاق، نه‌ زامان اۆتۆله‌نه‌جک؟

سۏنرا اؤز-اؤزۆنه‌ دۏنقولدانماقدا داوام إله‌دی:

-بونلار دا اؤز‌لرینه‌ آرواد دئییرلر. آرواد ها! پالتارې ماشېن یویور، قاب-قاجاغې ماشېن یویور، إوی ماشېن سۆپۆرۆر، بونلار نئیله‌ییر، بیلمیرَم؟ یازېق اوشاق، إله‌ هر آی بونون ماشېن‌لارې‌نېن ایشېق پولونو وئرمکدن اؤترۆ چېخېر جانې… بیز آرواد اۏلمامېشېق کی؟ ایشېق‌سېز لامپا حیسینده‌ سارالا‌-سارالا‌، چؤرک نۏبه‌لرینده‌ أزیله-أزیله، یېرتېق-یاماغېمېزې بیر-بیرینه‌ جالایا-جالایا اۏغول بؤیۆتمۆشۆک، بودو باخ- خانېم گلیب، ماشېن یویان پالتارې آسماغا دا أرینیر…

گلین پالتار‌لارې ماشېندان چېخارېب سبَده‌ یېغدې، سَس‌سیز-سمیرسیز إیوانا چېخدې. قادېن اۏنون ساکیت‌لیڲیندن بیر آز دا هؤلل‍َندی:

-اؤزۆنۆ ده‌ قۏیوب مال یئرینه‌، إله‌ بیل ایت هۆرۆر…

گلین إیوا‌نېن قېراغېنا برکیدیلمیش پالتار ایپی‌نین چکیب پالتار‌لارې بیر-بیر سانجاقلا‌ماغا باشلادې. قاینانا آرخاسې’یجا چېخېب إیواندان آشاغې بۏیلاندې. سَحَر چاغې إیواندان یېخېلا‌ن قادېنېن قان ایزلری هله‌ ده‌ گؤرۆنۆردۆ.

-گؤرۆر‌سن نئجه‌ دۆشۆب جانې یانمېش؟ گۆن‌لرین بیر گۆنۆ ده‌ من بئزه‌جه‌ڲم، آتاجاغام اؤزۆمۆ بو آلتېنجې مرتبه‌دن آشاغې. قالا‌جاق‌سېنېز أل‌لرده‌…

گلین دۏداغېنې دیشله‌دی: “سن هارا آتېرسان اؤزۆنۆ؟ هله‌ بیر آز دا کئچسه‌ منی ایته‌لَییب سالاجاقسان یئره‌. جانېن قورتارسېن دئیه‌”…

3

اۆچ گنج قېز پیلله‌کن‌لری یاواش-یاواش قالخماقدا’یدې. اۏنلاردان بیری، گؤرکَمیندن قطعیَّن شَهَر قېزېنا اۏخشامایانې آتامان‌لېق إدیردی:

-اۏ بیری پاتۏکدا آلماز واردې ها، فئعل‌لَنمیش؟ دئییرلر اۏیموش دۆشن…

ایکینجی قېز بۆزۆشۆب سَسینی قېسمېشدې:

-اۏلماز أشی! آلماز بورالاردا نه‌ گزیر؟

آتامان سَسینی یئکسلتدی:

-آز قادام سَنین جانېنا، نه‌ اۏلماز؟ ایکی آیدې قۏشولوب قاچېب بیرینه‌، هئچ دَ‌ر‌سه‌ ده‌ گلمیر. دئییرلر اۏغلان آپارېب بئش-اۏن گۆن اۏر‌دا بوردا سۆلندیریب، قۏیوب کۆچه‌لرده‌. إوه‌ قایېتماغا اۆزۆ اۏلمایېب، پاپاسې دا دئییب گلسه‌ اؤلدۆره‌جه‌ڲَم… بو یوخارېداکې وار ها؟-باشې’یلا یوخارې مرتبه‌لره‌ ایشاره‌ إله‌دی-دئییرلر اۏ تاپېب گتیریب، إله‌ اؤزۆنۆن تایې‌دېر دا، إوه‌ کیشی-میشی گتیریرلـر…

-یوخارېداکې؟ اۏ کؤرپه‌ اوشاغې اۏلان؟

-هه‌ ده‌، اۏ.. اوشاغې دا آللاه‌ بیلیر کیمدن آلېب، پول-پارا قۏپارسېن، اۏ دا کئچمه‌ییب، ایندی ده‌ آلمازې چکیب یانېنا…

اۆچۆنجۆ، بایاقدان سَسی چېخمایان چلیم‌سیز قېز صؤحبَته‌ قاتېلدې:

-آلمازې بوردا گؤرَن اۏلوب؟

آتامان ناراضې‌لېق’لا‌ اۆز-گؤزۆنۆ قېرېشدېردې:

-گؤرَن اۏلماسا دا دئییرلر اۏ سَحَر یئره‌ دَڲن اۏنا اۏخشایېرمېش.. علامت‌لرینی مارکئتده‌کی ساتېجې دئمه‌دی؟ إله‌ اۏدور کی، وار.. اۏ دا بوردا نئیله‌یه‌جَک یوخارېداکې‌نېن یانېندا قالماقدان باشقا؟ هله‌ بلکه‌ ده‌ اؤزۆ ایته‌لَییب سالېب آشاغې؟

ایکینجی قېز قۏرخو ایچینده‌ دؤیۆکدۆ:

-یاواش دانېش، إشیدن اۏ‌لار، نه‌ییمیزه‌ لازېم‌دېر؟ بیر ده‌ نییه‌ ایتله‌ییب سالسېن کی؟

آتامان بیر آددېم دا گئری چکیلمک فیکرینده‌ دَڲیلدی.

-نییه‌ سالاجاق کی؟ یا سئوگیلی‌سینی أله‌ کئچیریب، یا دا سَحَر آز پول’لا‌ قایېدېب. چۏخ گۆمان سئوگیلی‌سینی ألیندن آلېب.. گؤرمه‌میسینیز، یانېنا بیر یاراشېقلې کیشی گلیب- گئدیر.. دئییر گۆیا أری‌دیر. آی سن اؤله‌سن! یۆز فایېز ساخلایېر بونو. بیزیم کندده‌ کیشی‌لر بئله‌ گیج‌به‌سَری بیر گئجه‌ده‌ إویندن چېخارېب داش-قالا‌ق إدردیلر، بونلار دا آدلارېنې کیشی قۏیوبلار. بیری قاپې‌سېنې دؤڲۆب سۏروشمور کی، آی بالام، بورا نه‌دیر سنین اۆچۆن، پۏزقونخانادېر؟…

اۆچۆنجۆ چلیم‌سیز ناراضې‌لېق’لا‌ باشېنې یئلله‌دی:

-دی یاخشې، نه‌ ایشیمیزه قالېب.. اؤز‌لری بیلر‌لر – و چانتاسېندان إوی‌نین آچار‌لارېنې چېخاردې. آتامان قاپې‌نېن آغزېندا دایانېب بیر مرتبه‌ یوخارېداکې قاپېنې دینله‌دی.

-نئجه‌ ساکیت‌چیلیک‌دیر؟ قېنېنا چکیلیب دوروب… إله‌ دئمه‌ڲیمیز لازېمې’یدې کی، بونو توتوب آپارسېنلار، گئتسین بالا-بالا…-و قادېنېن یانېنا گلیب گئدن یاراشېقلې کیشینی خاطېرلایېب گۆلۆمسه‌دی…

4

قېز‌لارېن قالدېق‌لارې إوین اۆست قاتېندا، دؤردۆنجۆ مرتبه‌ده‌کی قادېن بئش یاشېنداکې اۏغلونون یئمه‌ڲینی یئدیره‌-یئدیره‌ سَحَردن ایچینی دیدیب-داغېدان دۆشۆنجه‌لرین جایناغېندا چېرپېنېردې. أری بو آخشام گلمه‌یه‌جَکدی. اۏنلارېن عاییله‌ قورماسېنا قارشې چېخان آتاسې‌نېن قۏرخوسوندان هر آخشام دا گله‌ بیلمیر، اۆچ-بئش گۆندن بیر، گئجه‌ دۆشندن، قۏنشولار إوینه‌ چکیلندن سۏنرا گیز‌لی-گیز‌لی قاپېنې دؤیۆر، بیر-ایکی ساعات دایانېب چېخېب گئدیردی. نیکاح باغلادېق‌لارې گۆندن بری سحری بو إوده‌ آچدېغې اۏلمامېشدې. آتاسېندان ایت کیمی قۏرخوردو…

آمّا نه‌ قدر گیز‌لی گلیب گئتسه‌ ده‌ ماراقلې قۏنشولار دویوق دۆشمۆشدۆلر و کیشی‌نین اؤزۆنۆ گیزلَتمه‌ جهد‌لری بؤهتانا، شره‌، قېناغا چئوریلیب قادېنېن باشېندان تؤکۆلۆردۆ. حَیَطده‌کی‌ قادېن‌لار اوشاق‌لارېنې اۏنون اۏغلو’یلا اۏیناماسېنا ایجازه‌ وئرمیردیلـر، چؤرک دۆکا‌نې‌نېن اۆست-باشېندان پینتی‌لیک یاغان کؤک ساتېجې‌سې اۏنا گؤز سۆزدۆرۆر، کۆچه‌نین آغزېندا تۏپالاشان محله‌ جاهیل‌لری سؤز آتېردېلار. اۆسته‌لیک بیر عمللی ایش ده‌ تاپا بیلمه‌میشدی. قارداش‌لارې قبول إدیلمه‌میش عاییله‌یه‌ گؤره‌ أل‌لرینی اۏندان اۆزمۆشدۆ‌لر، آنا‌سې آرابیر، آیدا ایکی -اۆچ دفعه‌ بازار‌لېق إدیب گتیریر، بونو دا قارداش‌لارېندان گیزلین إدیردی.

قازانجې‌نېن هر قپیڲی اۆچۆن إوده‌ حئسابات وئرَن أری اۏنلارې إحتیاج ایچینده‌ ساخلایېردې…

سَحَر کۆچه‌ده‌ قۏپان هارای’لا‌ اؤزۆنۆ چؤله‌ آتمېشدې.. یئره‌ سریلمیش قادېنې گؤردۆکده‌ سارسېلمېشدې. اؤلۆم بۆتۆن گؤزَل‌لیڲی و چیرکین‌لیڲی ایله‌ قارشې‌سېندا دایانېب دوروردو. “اؤلۆب جانې قورتاردې” دۆشۆنجه‌سینه‌ قاپېلسا دا أطرافداکې‌لارېن “هله‌ ساغ‌دېر”، “بلکه‌ ده‌ شیکست قالا‌جاق”، “أل‌لرده‌ قالدې یازېق” سؤز‌لریندن چېخېلماز‌لېق ایچینده‌ قالمېشدې. اؤلۆمدن قۏرخموردو، اۏغلو اۆچۆن ده‌ نیگاران دَڲیلدی، آتا‌سې اۏنو چۏخ گۆمان آپاراجاقدې، یا دا دایې‌لارې… هر حالدا قۏهوم‌لارې اوشاغا صاحیب چېخاجاقدېلار.. آما اؤزۆنۆ آتان قادېنېن ساغ قالماسې اۏنو قۏرخویا سالمېشدې…

اوشاق ألی’یله‌ قاشېغې ایته‌لَدی.. نَفَسی دارالمېشدې، إیوانا چېخدې، ایستر-ایسته‌مَز آشاغې بۏیلاندې.. تۆک‌لری اۆرپَشدی.. باجارمایاجاقدې داها، ساغ قالما إحتیمالې اؤلۆم فیکری‌نین اۆستۆنه‌ قۏرخو کؤلگه‌سی سالمېشدې…

5

بیرینجی مرتبه‌ده‌کی کیچیک إوده یاشایان قارې-قۏجا آخشام یئمه‌ڲینه‌ حاضېرلاشېردې. قارې چؤرک قابېنې ماسایا گتیریب أری‌نین قارشې‌سېنا قۏیدو، اؤزۆ ده‌ اۏنون’لا اۆز-اۆزه‌ أڲلَشدی:

-سحرکی أحوالات نئجه‌ بیتدی گؤره‌سن؟ آدامې تاپېلدې‌مې یازېغېن؟

قۏجا باشېنې یئلله‌دی:

-آدامې اۏلان دا اؤزۆنۆ اۏ بۏیدا هۆندۆرلۆکدن یئره‌ آتارمې؟ گؤرمه‌دین‌می، هئچ کیم ده‌ تانېمېر. اؤزۆ قصدَن گلیب إله‌ یئردن آتېلېب کی، تانېیان بیلن اۏلماسېن…

قاشېق’لا یئمه‌ڲینی دؤیَجله‌یه‌-دؤیَجله‌یه‌ بیر خئیلَک فیکره‌ گئتدی..

-گۆنده‌ بیری آتېر، یاندېرېر، آسېر اؤزۆنۆ.. یازېق جاوان‌لار. بونلارا بیر یییه چېخان اۏلمایاجاق‌مې؟…

6

محله‌ده‌کی بینا‌لارېن کیشی‌لری حَیَطده‌کی‌ چای‌خانایا یېغېلېب تئلئویزیۏنون سَسینی قالدېرمېشدېلار. آغېز دئیه‌نی قولاق إشیتمیردی، خبر‌لر هله‌ باشلانمامېشدې…

7

پالاتا بیر آدام‌لېق ایدی. کیشی یاتاغا یاخېن اۏتوروب باشې بینت’له سارېنمېش قادېنېن ألینی أل‌لری ایچینده‌ ساخلامېشدې. قادېنېن دۏداغې پارتلامېش، گؤزلری‌نین آلتې قان سالمېشدې.

طیبّ باجې‌سې نۏبَتی ایڲنه‌نی ووروب چېخدې. ساکیتچی‌لیک چؤکدۆ. قادېن گؤز قاپاق‌لارېنې آغېر-آغېر قالدېرېب دۏداق‌لارېنې زۏر’لا آرالادې:

-سَنین ده‌ باشېنا ایش آچدېم..

کیشی زۏر’لا دا اۏلسا گۆلۆمسه‌دی، صیفَتیند‌ن دویدوغو قۏرخونون ایزلری هله‌ سیلینیب گئتمه‌میشدی:

-عزیزیم، بونلارې فیکیرلشمه‌ڲین عبث‌دیر. هر شئی کئچیب، أساس اۏدور کی، سنه‌ هئچ نه‌ اۏلمایېب.

قادېن یئرینده‌ آزاجېق ترپه‌نیب دوروشونو دۆزلتمک ایسته‌دی. باشېنې زۏر’لا قالدېرېب آیاق‌لارېنا سارې بۏیلاندې، اۏنلارې ترپتمه‌ڲه‌ چالېشدې. بارماق‌لارېنې آزجا حرکت إتدیریب باشېنې یئنی‌دن یاستېغا قۏیدو:

-سن آلداتمېرسان کی؟ شیکست قالمارام، إله‌می؟

-یۏخ عزیزیم، حکیم نه‌ دئدی؟ بیر آز واخت یاتاجاقسان، یۆنگۆل مۆعالیجه‌، چېخارداجاقلار…

– آمّا گۆل کیمی إوی ألدن بوراخدېق، داها صاحیبی راضې اۏلماز.

-یۏخ، داها یۏخ، زنگ إله‌دی، آپاردېم آچارې وئردیم، ناراضې‌لېق إله‌دی کی، صاباح پۏلیس دۏلوشاجاق إویمه‌، باشېما ایش آچدېنېز… یاخشې کی، بیرینجی مرتبه‌دن دۆشمۆسن… من سنه‌ دئییردیم تک گئتمه‌یه‌سن…

قادېن پئشمان نظرلرینی کیشییه‌ زیلله‌دی:

-ایسته‌دیم أشیا‌لار داشېنمامېشدان گئدیم بیر أل گزدیریم، تمیز‌لیک إدیم. آزجا هاوا آلماق ایسته‌میشدیم، هم ده‌ إیوا‌نېن دَمیرلرینده‌ قوروموش سارماشېق چیچک‌لری ایلیشیب قالمېشدې، ألیمی اوزاتدېم کی، تمیزله‌ییم… نه‌ بیله’یدیم گۆپپۆلتۆ’یله گله‌جم یئره‌؟…

قاپېیا بۏیلاندې:

-گئتدیلر؟

-هه‌، هامې‌سې چکیلدی گئتدی، حادیثه‌ یئرینه‌ صاباح باخارېق دئدیلر، ایضاحات آلدېلار، گئتدیلر…

-سنی اینجیده‌جَکلر…-قادېنېن سَسیندن عۆذر ایسته‌مک دویولوردو-باشېنا ایش آچدېم…

-منی اینجیدیب نئیله‌یه‌جَکلر، یېخېلا‌ندا گؤرَن اۏلماسا دا منیم اۏ ساعاتدا ایشده‌ اۏلدوغومو تصدیقله‌یه‌جک ایش کارتې وار… ناراحات اۏلما، ایکی گۆنه‌ حَلّ إدیب بیتیره‌جکلر…

قادېن باشېنې بیر کۆنجده‌ قۏیولموش تئلئویزیۏنا طرف چئویردی، سَسی آلېنمېشدېسا دا خبر‌لری آپاران دیکتۏر اؤز ایشینده’یدی.

-چکیبلر هر حالدا، ایندی وئره‌جکلر، مشهور دا اۏلدوق

کیشی تئلئویزیۏنون سَسینی یۆکسلتدی. دیکتۏر خانېم بۆتۆن بدبخت حادیثه‌لری سادالایا- سادالایا گلیب سحرکی حادیثه‌نین اۆستۆنده‌ دایاندې:

-بو گۆن با‌کې شهرینده‌ قادېن اؤزۆنۆ چۏخ‌مرتبه‌‌لی بینانېن دامېندان یئره‌ آتاراق اینتیهارا جهد إدیب. حادیثه‌ زامانې آغېر یارالانسا دا اۏنون یاشامېنی قورتارماق مۆمکۆن اۏلوب. حادیثه‌نین ناموس جینایتی یئرینده باش وئردیڲی إحتیمالې ایره‌‌لی سۆرۆلۆب. آراشدېرما‌لار داوام إتدیریلیر…

کیشی قادېنا، قادېن کیشییه‌ باخدې. کیشی حیرص’له‌ تئلئویزیۏنو سؤندۆردۆ:

-بئله‌ خبردن سۏنرا اۏ بینادا یاشاماق اۏلاردې؟

یازار / Yazar : آیهان میانالیAyhan Miyanalı

بو یازېنې دا اۏخویون /Bu Yazını da Oxuyun

IMG_20190901_052539_472

وداع مارشې / فرشته صیامی

وداع مارشې / فرشته صیامی هاوا آلاجا قاران‌لېق سس‌سیز قال وداع مارشې چالېنېر قولاق‌لارېمدا من …


Warning: count(): Parameter must be an array or an object that implements Countable in /home/yeniqapi/public_html/wp-includes/class-wp-comment-query.php on line 399

Leave a Reply

Your email address will not be published. Required fields are marked *