یئنی قاپې Yeni Qapı یئنی قاپې، یئنی بير باخېشدېر تۆرک دۆنیاسېنا
آزاد قادېن هئیکَلینه / رامیز رؤوشن
یۏخ، سَنین جانېن دا داشدان دَڲیلمیش
گؤر سنی نه گۆنه قۏیدولار، قادېن.
ایلک اؤنجه چادرانې آچدېلار سَنین
سۏنرا پالتارېنې سۏیوندوردولار…
سۏنرا سنی سۏغان کیمی قات- قات
سۏیدولار، قادېن
ظالېم‌لارېن گؤزۆ ده یاشارمادې
بو قولدورلار ایچینده، ده،
سنی سۏیماغې ،کیم باجارمادې؟
بیر سئوگی‌نین ایشېغې دۆشمۆشدۆ اۆز – گؤزۆنه
سۏیدولار، اۏ ایشېغې دا سۏیدولار
قورمادېغېن إو–إشیڲی
دۏغمادېغېن اوشاغې دا سۏیدولار…
گؤر سنی نه گۆنه قۏیدولار، قادېن.
سۏنرا آبرېن، حَیان سۏیولدو گئتدی،
سۏنرا صبرین، دؤزۆمۆن
گؤز یاش‌لارې تالادې،
سۏیدو گئتدی، گؤزۆنۆ
گؤزلرین لۆم-لۆت قالدې.
سۏنرا گؤزلریندن اؤپدۆلر یئنه
آدېنا نغمه‌لر قۏشدو‌لار قادېن
سَندَن اؤترۆ’یمۆش سن دئمه
اینقیلاب‌لار، ساواش‌لار
آخان قان‌لار،
کسیلن باش‌لار، قادېن.
اینقیلابې نئینه‌یردین کی؟
سن اؤزۆن اینقیلابسان
سن باشدان آیاغاجان اۏخونماماېش کیتابسان.
کیمسه سنی گؤزلریندن
اۏخوماغا باشلادې کیمسه آیاق‌لارېندان
آمّا هئچ کس اۏخویوب سۏنا چاتا بیلمه‌دی
اۏرتا‌دا ایلیشیب قالدې هامې‌سې.
نه اۆستدن آشاغې باخېرسان بیزه
یۏخ’سا بیزی ده سن دۏغموسان قادېن
سَنین دۏغدوق‌لارېن آزاد دَڲیل’سه
اؤزۆن نئجه آزاد اۏلموسان قادېن؟
یۏخ، سَنین آزادلېغېن یارېمچېق‌دېر دئمه‌لی
سن ده یارېمچېقسان بیز ده یارېمچېق
یاخشېمېز دا پیسیمیز ده یارېمچېق
سن بیزی تزه‌دن دۏغ، آزاد قادېن هئیکَلی
آمّا جېرتدان دۏغما
سن بیزی دئو دۏغ
آمّا یارېمچېق یۏخ، بیزی بۆتؤو دۏغ
اۏندا سن ده تامام آزاد اۏلارسان
إی منیم داش آنام آزاد اۏلارسان.
