دئنه بیلسینلر / امین حاجیلو

دئنه بیلسینلر / امین حاجیلو

دئنه نئجه اونودولار قرنفیلدن قۏخوسو
پایېزېن سرین یوخوسوندا
اؤپدۆڲۆنده آیېن دۏداق‌لارېنې
دئنه بیلسینلر نئجه اونودولار حیات‌لاردان اۏخشامالار
گئده‌نی گئتمکده گؤرمک
گئده‌نه دور دئمک آنلامېندا ایدی اۏ زامان‌لار
اۏ زامان‌لاردا«اۏ»سن ایدین
دئنه بیلسینلر سن اۏلدوغونو
ایشاره‌نین اۏلونان اۆزۆنده ایدین
گؤرستدیم سنی
گئتمه‌ڲینی
هله گئتمک داها سېخ قالماق آنلامېندا ایدی اۏ زامان‌لار

دئنه بیلسینلر گئتمه‌دیڲینی
قالېب یارانېن اۆستۆنۆ اؤرتدۆڲۆنۆ
(دؤرد مؤوسۆم دَڲیشدیم سنین مؤوسۆمۆنه چاتېنجا
شاعیر اؤلمۆشدۆ
أل‌یازمالارېندا قارالادېغې آدې اۏخوماق ایسته‌ین أدبی تۏپلوما
یارانېن کئچمیشینی گؤرسه‌ده‌جکدیم
بیر ده فاک بارماغېمې
اؤلمه‌سه’یدیم)
آدېنا دؤندۆم
بۏیا باشا چاتمېشدې ماشاللاه
فعیل اۏلموشدو اؤزۆنه گؤره
یاناغېندان چکیب نؤقطه‌سینی اؤپدۆم
دئنه بیلسینلر نئجه اؤپدۆڲۆمۆ
نحو یالنېش‌لېق‌لاری ایچینده
و یۏلجولار کیمی، دؤنمه‌یه‌جکجه‌سینه
دئنه بیلسینلر گلمه‌دیڲیمی
اؤرنه‌ڲین دویغوسال باش‌لېقلی بیر حیکایه کیمی
حیکایه:
گلمه‌یه‌جکدی، گئجه‌نی قۏینونا آلېب یاتاغا گیردی
گئتمه‌یه‌جکدی قۏخوسو
یاتاقدان آیرېلدې

نۏت:
قرنفیلدن اونودولان قۏخونو دئییرم
سئودا سؤزۆندن اونودولان گؤزلرینی
هئچ بیری گئری دؤنمه‌دی