إتیکئت‌سیز اینسان‌لېغا، باسقې‌لار نه‌لر إده‌بیلر؟ / آیهان میانالې

إتیکئت‌سیز اینسان‌لېغا، باسقې‌لار نه‌لر إده‌بیلر؟ / آیهان میانالې

 

کۆتله‌نین دَرنَک‌سیزلیڲیندن آسېلې، هر اۏیونونو ایسته‌ییرلر یازېق یۏخسول‌لار باشېنا گتیریرلر. بو اۏیون‌بازلېقدا، أزیلیب بئلی بۆکۆلن، چرچیوه‌میزده‌کی یۏخسول‌لارېن ایلک ایسته‌ڲی، آج قالماماق و اۏنا دؤنه-دؤنه شۆکر إتمک‌دیر.

بیزیم دۆنیا گؤرۆش‌لریمیزده‌کی گیزله‌نن اؤگسۆزلۆک، باسقې‌لارېن تۆلکۆوارې سئناریۏلارېندا هر گۆن سرگی‌لَنیر.

هر زامان آتا-دده سؤزلریمیزدن بیری‌سی إله بودور: خالقې آج، باشقانې تۏخ ساخلا.

آج کۆتله‌نین ایستک‌لری ده، قارېن‌لارېندان ایکی کۆچه اۏیانا، اۏلابیلمز!

بو آرادا اۏنلارې آج ساخلایېب، قورتوم-قورتوم سویو بۏغازلارېنا تؤکمک و هر بیر اؤنمسه‌ین اۏلایدان اوزاق ساخلاماق، نۏرمال کۆتله‌نین أل ایچینده ساخلایېب، قۏروقسانماغېن ایلک قورالې‌دېر!

نۏرمال کۆتله‌نی سایسال‌لېغا یئتیرسک، یۆزده یئتمیش قۏروقسانېر. قالېر یۆزده ییرمی بئش، وارلې‌لار و یۆزده بئش آیدېن‌لار.

وارلې‌لار قۏرونوب نۏرمال کۆتله‌نی أزمک اۆچۆن أن اؤنملی قۏل‌لاردان‌دېرلار.

آیدېن‌لارې دا ایکی چؤزۆم’له أل ایچینده قۏروقسانماق اۏلار. یارې‌سېنې یارېم‌وارلې بورژووالارېنا یاخېنلاشدېرېب، باش‌لارېنې دۆنیا اۏلای‌لارېنا قاتماق، یارې‌سېنې دا توتوقلایېب، دوستاقلاماق، بعضن ده سۆرگۆنلۆڲه گؤندرمک!

سئناریۏلار گؤزل قاباغا گئدیر، هر شئی یۏلوندا و کیمسه‌نین سسی بیر-بیرینه چاتمایېر. اۏرتالاردا یاشایان دَڲیشیک‌لر، قایقې‌لارېن چئشیدسه‌دیڲی، بیری‌سینده چؤرک دردی، بیری‌سینده ایسه اۆرک دردی و آیدېن‌لارېمېزېن یالقېزلېق‌لارې إله گؤزه چارپېر کی، کیمسه نه اۏنلارې إشیدیر، نه ده اؤنمسه‌ییر.

ایندی بیر داها درینجه باخاق: بیری‌لری آج و یۏخلوق‌لارې‌نېن آردېندا گئدن‌لر(سیز اۏخویون چۏخونلوق)، بیری‌لری تۏخ و وار-یۏخ‌لارېنې قۏرویان (هر آخېن’لا)، و آزېن‌لېق‌لارې دا اۏیاق و آیدېن، اویوم‌سېزلېق‌لارا قارشې (دوستاق، سوسدورولموش و سۆرگۆن‌لر)

بو آرادا هر اۆچ آخېن بیر-بیری‌لریندن ایراق و اؤزگه‌سه‌ییرلر، نه‌دن کی قایقې‌لار ایله دردلری اؤزگه گلیر و چتین گؤرۆنۆز اۏ یۆزده بئش آزېن‌لېق آیدېن‌لارېمېزېن سسی (دوستاقلانماسالار، سوسدورولماسالار و یا سۆرگۆن اۏلماسالار!!!) یۆزده دۏخسان بئش فایېز خالقېمېزېن قولاغېنا چاتا، چاتېرسا دا، قایقې یارادا.

باجارېقلې بیر قوروم، کۆتله‌نی ألده ساخلاماق اۆچۆن بونلارې یئرینه یئتیریب، هر زامان، أن آز مصرف’له کۆتله‌نی اؤز ألی’یله ایداره إدر!

و بیزدن ایراق دۆشۆب، من‌لیکده بۏغولان کۆتله کیمی، نه گؤزل ایداره اۏلونانلاردان اۏلموشوق!

 

آیهان میانالې