قارنېنداکې بۏشلوق / آیناز بزرگان (حیکایه)
اؤزۆنۆ تاپشېرمېشدې آیاق‌لارېنا هئچ دۆشۆنمزدن باش آلېب گئدیردی، ایچینده کؤهنه بیر یارا دئشیلیب گؤینه‌ییردی، اؤز-اؤزۆنه دئدی بو آغرې، بو درد هاردان گلیر یئرینی بیلمه‌لی‌یم. اۏتوروب فیکرینی بیر یئره یېغدې هئچ یئری آغرېمېردې آما درد، یارا ایچی‌نین درین‌لیڲیندن هئچ دیبی گؤرۆنمه‌ین بیر درین‌لیکدن باش آلېب گلیردی.
جانې تیتره‌دی، اوشاغېن آغلاما سسی هر یئری بۆرۆمۆشدۆ، گؤز دۏلاندېرېب اوشاغې آختاردې، اوشاق بیرآز اۏیان‌لېق یئره یېخېلېب اۆرکدن آغلایېردې. تئز اؤزۆن تۏپارلادې، قاچدې اوشاغې گؤتۆرۆب باغرېنا باسدې:
-جانېم آنان اؤلسۆن نۏلدو، نییه قاچاندا گؤزله‌میرسن دؤز باخېم قېچېوا.
شالوارې‌نېن پاچاسېن قۏوزادې دیزی بیرآز سییریلمیشدی؛ اؤپدۆ.
-باخ دۆزلدی.
اوشاق شاشقېن باخېش‌لار’لا باخېردې و دورمازدان آغلایېردې؛ قادېن تله‌سیک چانتاسېنې آچدې بیریارا باندې چېخارتدې دئدی:
-باخ بونو وورسام دیزیوه، یاران تئز دۆزه‌له‌جک، آغلاما بالام، آغلاما.
اوشاغېن یاراسېنې ساردې، یاواشجا باغرېنا باسدې آپاردې پارکدا اۏلان کوفا طرف؛
-گئدک اۏغلوم، سنی میندیریم کوفا؛ کوفا مینسن دا آغرېن دۆزه‌له‌جک، هئچ بیر شئیین قالمایاجاق.
قادېن اوشاغې میندیردی کوفا، دالدان ایته‌له‌مه‌ڲه باشلادې. اوشاق یاراسېنې یاواش-یاواش اونوتدو باشلادې أیلنمه‌ڲه. کوفون ترپنمه‌ڲی اۏنو هَیَجانا گتیریردی باشلادې گۆلمه‌ڲه، سۏنرا قېشقېرماغا، هئچ زامان، بو قدر کوفونان اوجالارا اوچمامېشدې. اؤزۆنۆ بیر قوش کیمی گؤڲده گؤرۆردۆ، اوشاق قېشقېردې:
-داها اوجا، داها اوجا.
قادېن اوشاغېن سئوینجیندن هَیَجانا گلدی، ایکی‌سی ده، دردلرین اونوتموشدولار؛ ایکی‌سی ده اۆرَکدن گۆلۆردۆلر؛ گۆلمک سس‌لری پارکدا بیر-بیرینه قارېشمېشدې، سانکې بونلاردان باشقا پارکدا کیمسه یۏخ ایدی…
بیر قادېن اوزاقدان قاچا-قاچا اۏنلارا یاخېنلاشدې، کوفو ساخلاتدې؛ اوشاق کوفدان یئنیب-یئنمز اؤزۆنۆ قادېنېن قوجاغېنا آتدې.
-آنا بو گۆن قوش اۏلدوم اوچدوم.
قادېن غضبلی باخېش’لا ایکی‌سینه باخدې اوشاغېن ألیندن یاپېشدې دئدی:
– سنه دئمه‌میشدیم اؤزگه‌لر’له دانېشما. آخېرېن اۏلسون کی سنی پارکا گتیریرم.
سۏنرا حیرص’له اوشاغېن قۏلوندان چکدی اوشاق آغلایا-آغلایا قادېنېن دالېسې’یجا یۏلا دۆشدو…
قادېن اؤزۆنۆ تاپشېرمېشدې آیاق‌لارېنا؛ هئچ دۆشۆنمزدن باش آلېب گئدیردی. ایچینده کؤهنه بیر یارا دئشیلیب قانایېردې. ألینی قۏیدو قارنېنا؛ قارنېنداکې بۏشلوق، درد اۏردان جانېنا فېشقېرېردې…
بَنزَرگه‌لر / Bənzərgələr
قار دنهلری / آیناز بزرگان (حیکایه)
یانېت‌سېز سۏرغولار / فائضه بزرگان (حیکایه)
ناغېللارداکې اؤزلَم / فائضه بزرگان (حیکایه)
ایکی یاشلې کؤرپهنین آجې حیکایهسی / واریث یۏلچویئو…
بوز / اومان میانالې (حیکایه)
جزا / سئوینج إلسئور (حیکایه)
یالقېز إو / سحر روحی (حیکایه)
ایلان / رحیم علییئو (حیکایه)
دَلی کیم دیر؟! / رسول قدیری (حیکایه)
